باوهری ب تشتێ چینی
نیوار محهمهد سهلیم
د جیهانا ئەڤرۆ یا پیشەسازییا ترۆمبێلان دا، گوهۆڕینێن بهرچاڤ دهێتە دیتن. کۆمپانیێن چینی شیاینە د دەمەکێ کێم دا وێنەیێ خۆ ژ کارگەهێن لاساییکەر بەر ب داهێنەرێن جیهانی بگوهۆڕن. ئەڤرۆ ترۆمبێلا چینی نەبتنێ هەڤڕکە، بەلکو د گەلەک واران دا پێشەنگە.
کۆمپانیێن وەک (BYD, Geely) سەلماند کو سەردەمێ بەرهەمێ «ئەرزان و بێ کوالێتی» ب دووماهی هات. ب رێیا وەبەرهێنانێن مەزن د وارێ ڤەکۆلین و گەشەپێدانێ دا، ئەڤ کۆمپانییە نها ترۆمبێلێن وەسا بەرهەم دئینن کو ژ لایێ دیزاین، سلامەتی و تەکنەلۆژیایێ ڤە د ئاستێ هەرە بلند یێ جیهانی دانە. ئەوان شیا باوهریا کڕیاران ب دەست خۆ ڤه بینن و بیسەلمینن کو داهێنان ل دەڤ وان سنۆر نینن.
خالا هەرە بهێز یا چینێ، ترۆمبێلێن کارەبایی نە. چین نها وەکو ناڤەندا سەرەکی یا بەرهەمهێنان و فرۆتنا ترۆمبێلێن کارەبایی ل جیهانێ دهێتە نیاسین. خودانا پێشکەفتیترین تەکنەلۆژیایا پاتری و سیستەمێن زیرەکە. ل کۆمپانیێن جیهانی کرێ کو ب رێز ڤە تهماشهی ڤێ پێشکەفتنێ بکەن و بزاڤێ بكهن خۆ د گەل ڤێ پێلێ بگونجینن.
ئێک ژ نهێنییێن سەرکەفتنا بەرهەمێ چینی، بهایێ وان یێ ههڤڕكیێ یه. د دەمەکێ دا کو ترۆمبێلێن ئورۆپی، ئەمریکی و ژاپۆنی ب بهایێن گران دهێنە فرۆتن، چین شیایە هەمان کوالێتی یان ژی بلندتر ب بهایەکێ گونجایتر پێشکێشی کڕیاران بکەت. ئەڤ هاڤسەنگییە بوویە ئەگەرێ راکێشانا سەرنجا بازاڕێن نێڤدەولەتی و شکاندنا وی وێنەیێ جاران کو دگۆتن «هەر تشتەکێ چینی یێ خرابە».
سەرباری ڤان هەمی سەرکەفتنان، هێشتا هندەک ئاستەنگ ل پێشیا ترۆمبێلێن چینی ماینە. ل وەلاتێن خودان مێژوو د پیشەسازییا ترۆمبێلان دا، کڕیار هێشتا هندەک دودلییان دەربارەی ژیێ درێژ یێ ترۆمبێلا، دابینکرنا پارچەیێن یەدەگ و خزمەتگوزاریێن پشتی فرۆتنی هەنە. ئەڤە ژی پێدڤی ب دەمەکێ پتر هەیە دا کو چین بشێت ب تەمامی باوهریا جیهانی مسۆگەر بکەت.
ترۆمبێلێن چینی د قۆناغەکا زێڕین یا گوهۆڕینان دایە. ئاراستەیا گشتی نیشان ددەت کو ئەڤ پیشەسازییە ب لهزاتیهكا مەزن بەر ب پێش دچیت و د پاشەڕۆژەکا نێزیک دا، دێ بنە خودانێن پشکا شێری ل سەر جادەیێن جیهانێ، ئەو دودلییا هەی دێ تەمامی نامینیت.
