ئەو كچا بچووك یا چو جاران هێمن نەدبوو!

محەمەد عەبدوللا

ژیێ وێ نێزیكی حەفت سالییێ بوو، وەك پێلەكێ كو هەمی جیهان ڕێكنەكەفتبیت ل سەر هندێ كو ئەڤ زارۆكە یا تەمام نینە و كێشەیەكا كێماسییێ یا ل دەڤ هەی..
بەردەوام یا ب بزاڤ و خەیال بەرفرەهـ بوو، چو ل مال و چو ل قوتابخانەیێ، نەدشیا چەندەكێ ب روینیتە خوار و گوهداریا وانەیێن خۆ بكەت، ژبەر هندێ مامۆستایان گازندە ژێ دكرن و هندەك جاران ژی سزا ددا..
ل مال ژی هەر هەمان تشت بوو، دایك و بابێن وێ ب گازی و هەوار و گازندە بوون ژ دەستێن وێ و دگۆتن: ئەڤ زارۆیە یا سەرنەكەفتییە، هەتا وەلێكرن كو ئەو ب خۆ ژی هەست پێ بكەت كو زارۆیەكا سەرنەكەفتییە و یا د هەمی تشتان دا جودایە.
ژ نەچاری برنە چارەسەریا نۆشداری و دەرمانان، لێ چو مفا نەبوو.
لژنەیەكا تایبەمەند و پسپۆر بۆ وێ هاتە پێكئینان داكو چارەسەریا لڤین و خەیالفرەهییا وێ بكەن، گەلەك ژ پسپۆران نەشیان چو چارەیان لێ بكەن، تەنێ پرۆفیسۆرەكێ پیر نەبیت كو ب بێدەنگی سەرنج ددا ڤێ زارۆكێ و پاشان بڕیار دا كو وێ بكەنە د ژوورەكا شویشەبەند دا و ڕادیۆیەك بۆ هەلكر و دەنگێ مۆزیكێ بلند بوو، ل وی لایێ پەنجەرەیێ لژنەیێ چاڤدێریا زارۆكێ دكر، ئەو ژی بێ چاڤەڕێبوون هێمن و تەنا بوو و دگەل ئاواز و ڕیتما مۆزیكێ دەست ب سەمایێ كر و ب دووماهی هات، جیلیان یا تەمام و تەنا و دلشاد بوو..
پڕۆفیسۆرێ پیر بەرێ خۆ دا دایكا جیلیانێ و گۆتێ:
كچا تە چو كێشە نینن، ئەو تەنێ سەماكەرەكا سروشتییە، وێ ببەنە قوتابخانەیا هونەرێ سەمایێ..
ڕۆژا پاشتر، جیلیان برە قوتابخانەیەكا تایبەت ب سەمایێ ڤە و پشتی ب دووماهی هاتنا ڕۆژا ئێكێ یا خواندنێ، جیلیان ب كەیفخۆشی ڤە هاتە مال و گۆت:
دایێ، ئەوا ئەز دێ بێژم دبیت هوون باوەر نەكەن، زارۆكێن وێ درێ چو ژ مە جودا نەبوون، ئەم هەمی وەك ئێك بووین و مە سەما دكر..
هوون دزانن ئەڤ كچا بچووك كی بوو و چ ژێ دەركەفت؟
ئەڤ زارۆكە (دیم جیلیان لین) بوو، ئەو سەماكەرا جیهانی یا خودانا سەمایێن ناڤدار یێن وەك (پشیك – Cats) و (تارماییا ئۆپێرایێ)یە، ئەڤڕۆ ژی جیلیان ل هەمی جیهانێ یا ناڤدارە..

وەرگێڕان ژ ئەنتەرنێتێ‌

کۆمێنتا تە