گرنگیا دابینكرنا پەرتووكان بەری دەستپێكرنا سالا نوو یا خواندنێ
سەردار مەجید
ل گەل نێزیكبوونا دەستپێكرنا سالا نوو یا خواندنێ، هەمی چاڤ ل سەر وەزارەتا پەروەردێ نە بۆ هندێ كو ئامادەكاریێن پێدڤی بۆ پرۆسا خواندنێ بهێنەكرن. ئێك ژ گرنگترین وان ئامادەكاریان یا كو پێدڤیە ب رژدی ل سەر بهێتە كاركرن، دابینكرنا پەرتووكێن خواندنێ یە بۆ هەمی قوتابیان. ئەڤ پرسە نە یا سڤكە و كارتێكرنەكا مەزن ل سەر ئاستێ زانستی یێ قوتابیان و رێڤەچوونا پرۆسا پەروەردێ هەیە.
ل سالا بۆری، مە دیت كو چاوا نەبوونا پەرتووكان ل دەمێ دروست، بوو ئەگەرێ ئاستەنگێن مەزن. ل هندەك قوتابخانەیان، پرۆسا خواندنێ دەستپێكر و قوتابی چوونە سەر رەحلێن خوە، لێ پەرتووكێن وان نەگەهشتنێ. ئەڤ چەندە ب شێوەیەكێ نەراستەوخوە بوو ئەگەرێ كو كێمتر گرنگی ب وان بابەتان بهێتە دان یێن كو پەرتۆكێن وان نەبووین، و هەروەسا هەستەكێ بێهیڤیێ د ناڤبەرا قوتابیان و مامۆستایان دا پەیدا كر. دەمێ قوتابی نەشێت پەرتووكێ د دەستێ خوە دا ببینیت، ئاستێ متمانەیا وی ب سیستەمێ پەروەردێ كێم دبیت، و مامۆستایەك ژی دێ چاوا بشێت بابەتەكێ ئالۆز بێی ڤەگەریان بۆ پەرتۆكێ بۆ قوتابیێ خوە شیڤەكەت؟.
پێدڤیە وەزارەتا پەروەردێ ڤێ جارێ دەرەسینەكێ ژ كەیسێن سالا بۆری وەرگریت. پێدڤیە پلانەكا تۆكمە و زەمەنكری هەبیت بۆ چاپكرن و دابەشكرنا پەرتووكان. گەلەك جاران كیشە نە یا چاپكرنێ یە، بەلكو یا گەهاندنا پەرتووكانە بۆ قوتابخانەیێن دویر و گوندان. دڤێت وەزارەت ب كارەكێ رێكخستی و ب رێكا تۆرێن گەهاندنێ یێن خورت، پەرتۆكان ب گەهینیتە هەمی قوتابخانەیان بەری زەنگا ئێكێ یا خواندنێ لێبدەت.
نەبتنێ دابەشكرن، بەلكو دڤێت كوالێتیا پەرتۆكان ژی بهێتە بەرچاڤ وەرگرتن. قوتابی ب هیڤیا پەرتۆكەكا نوو دچیتە خواندنێ، لێ گەلەك جاران پەرتووكێن كەڤن و ژ هەڤڤەبووی بۆ قوتابیان دهێنە دابەشكرن، ئەڤە ژی دێ كارتێكرنا دەروونی ل سەر قوتابی هەبیت و حەزا وی بۆ خواندنێ كێم كەت.
ژ بەر ڤێ چەندێ، مە دڤێت وەزارەتا پەروەردێ ب هەمی شیانێن خوە ڤە، ڤی كاری بكەتە ئەولەویەتا ئێكێ یا خوە. ئاڤاكرنا ئایندەیێ قوتابیان ل سەر پەرتووك و زانستێ هاتیە ئاڤاكرن. ئەگەر ئەڤ بنەمایە ل دەستپێكێ نەهێتە دابینكرن، ئەم نەشێین چاڤەرێی بەرهەمەكێ باش یێ زانستی بكەین.
بێگومان، بەرپرسیاریا دابینكرنا پەرتووكان تنێ ل سەر وەزارەتێ نینە، بەلكو دڤێت كارگێریێن پەروەردێ ل قەزا و ناحیان ژی ب دروستی چاڤدێریێ ل سەر ڤێ پرۆسێ بكەن و ئاریشەیێن ل سەر ئاستێ لۆكالی تێبینی بكەن و چارەسەر بكەن. دڤێت ئەڤ سالە بێی گیرۆبوون و ب دابینكرنا تەڤایا پەرتووكان دەست پێ بكەت، داكو قوتابیێن مە شیێن دەستپێكەكا بهێز بۆ سالا خوە یا خواندنێ بكەن و ئاستێ زانستێ ل هەرێما مە ب گشتی بلندتر لێ بێت. چنكو قوتابی سەرمایێ گەلێ مە نە و دڤێت ئەم ب هەمی رەنگەكێ رێزێ ل دەم و داهاتێ وان بگرین.
