كلیلا بەردەوامیێ د داهێنانێ دا
مونا عەبدولسەلام بەرواری
ئاڤاكرنا ناڤخۆیا مرۆڤی پرۆسەیەكا بەردەوام و كویرە، كو ژ خۆ نیاسینێ و تێگەهشتنا بهایێن كەسی دەستپێدكت، د جیهانا ئەڤرۆ دا یاكو تژییە ژ گگوهۆڕین و فشارێن ژ دەرڤە، ئێكانە تشتێ مرۆڤی دپارێزیت و دەرگەهێن سەركەفتنێ بۆ ڤەدكەت هەبوونا ناڤخۆیەكا ب هێز و تژی وزەیە، ناڤخۆیا مرۆڤی وەك بناغەیێ ئاڤاهییەكی یە، چەند ئەڤ بناغەیە بهێزتر بیت مرۆڤ دشێت بلندتر لێبكەت و روی ب روی ئاستەنگان ببیت و ژلایەكێ دی ڤە داهێنان نە بتنێ بەهرەیەكا زكماكییە، بەلكو بەرهەمێ وێ ئاڤاكرنا ناڤخۆیی و ڕاهێنانێ یە.
پێنگاڤا ئێكێ بۆ ئاڤاكرنا ناڤخۆیا خوە نیاسینا خوەیە، مرۆڤ پێدڤییە خالێن خۆ یێن بهێز و لاواز بنیاسیت و دگەل خوە یێ ڕاستگۆ بیت دەمێ مرۆڤ دگەل كێماسی و خەونێن خۆ د ئاشتیێ دا دژیت هێزەكا مەزن د ناخێ وی دا دروست دبیت و ئەڤە ئاشتییا ناڤخۆی یە دبیتە ئەگەرێ هندێ كو مرۆڤ ژ ترسا شكەستێ ڕزگار ببیت، ترسا ژ شكەستنێ مەزنترین دوژمنێ داهێنانێ یە، ژبەر هندێ ناڤخۆیا تە یا ئاڤاكری بیت تۆ بەرێ خۆ ددەیە شكەستێ وەك دەلیڤەك بۆ فێربوونێ نە وەك دووماهیا رێكێ، داهێنان ژ تێكەلكرنا هزریێن جیاواز و دیتنا رێیا چارەسەریێن نوو بۆ كێشەیێن كەڤن دهێت، خواندنا بەردەوام گوهدانا بیروبۆچوونێن جیاواز و گەڕیان د ناڤ بۆارێن جۆراوجۆر دا رەوشەنبیرییا ناڤخۆیی دەولەمەند دكەت، مرۆڤێ داهێنەر هەردەم پسیاران دكەت و ل بەرسڤان دگەڕیێت، هزرەكا جوان ئەگەر پلان و كاركرنا ڕۆژانە ل پشت نەبیت، بتنێ وەك خەونەكێ دمینیت ئاڤاكرنا ناڤخۆیەكا بهێز ب ڕێكا ڕێكخستنا دەمی و دانانا ئارمانجێن ڕوون دهێتە دیاركرن، دەمێ مرۆڤی خشتەیەكێ ڕۆژانە یێ ڕێكخستی هەبیت، مێشكێ مرۆڤی پشتبەستنێ ل سەر ئارامیێ دكەت و ڤالاهییەكا پتر بۆ هزركرنا داهێنەرانە بۆ دروست دبیت هەروەسا دویركەفتن ژ كارتێكرنێن نەرێنی هێزا مێشكی دپارێزیت، ئاڤاكرنا ناڤخۆیا مرۆڤی گەشتەكا درێژە و پێدڤی ب بێهنفرەهییێ هەیە، چەند مرۆڤ پتر وەبەرهێنانێ د هزر و مێشك و ڕەوشەنبیرییا خۆ دا بكەت، پتر دشێت د بۆارێ خوە دا داهێنەر و كارتێكەر بیت، داهێنان نە تشتەكێ دەرەكی یە، بەلكو ڕەنگڤەدانا وێ ڕۆناهی و هێزێ یە كو د ناخێ مرۆڤی دا یا چاندییە.
