چەكێ ئاڤاكرن و خرابكرنێ
مونا عەبدولسەلام بەرواری
د جیهانا مە یا ئەڤڕۆ دا مرۆڤ رۆژانە ب هزاران پەیڤان دبێژیت یان دخۆینیت، گەلەك جاران ئەم هزر د بهایێ وان پەیڤان دا ناكەین یێن كو ژ دەڤێ مە دەردكەڤن، لێ د راستی دا پەیڤ نە بتنێ دەنگن بەلكو هێزەكا مەزن د ناخێ خۆ دا د حەوینن، پەیڤ دشێت ببیتە دەرمان بۆ برینەكێ، یان ببیتە چەكەكێ تیژ كو دلی بریندار بكەت، ژبەر هندێ خودانكرنا پەیڤێ بەرپرسیاریەتیەكا مەزنە ل سەر ملێن هەر ئێك ژ مە.
دەمێ ئەم پەیڤێن جوان و هاندەر دبێژین ئەم ژینگەهەكا پڕی ئومێد و وزەیا ئەرێنی ئاڤا دكەین، گۆتنا پەیڤەكا سادە وەك سوپاس یان دەستێن تە دخۆش بن، دشێت رۆژا مرۆڤەكێ دی ب تەمامی بگوهۆڕیت، چ د ناڤ خێزانێ دا بیت یان جهێ كاری و جڤاكی دا پەیڤێن پالدەر دبنە ئەگەرێ بلندبوونا باوەری ب خۆبوونێ و بهێزبوونا پەیوەندیێن جڤاكی.
مرۆڤێ سەركەفتی ئەو نینە یێ كو ب دەنگێ بلند د ئاخڤیت، بەلكو ئەوە یێ كو دزانیت كا چەوا پەیڤێن خوە بێژیت و ل كیڤە و ج دەم و چەوا.
ژلایەكێ دی ڤە پەیڤێن نەرێنی و برینداركەر دشێن تشتا هوسا خراب بكەن كو ب سالان دووبارە دروست نەبن و گەلەك جاران پەیڤەكا نەخۆش ژلایێ كەسەكێ نێزیك ڤە دهێتە گۆتن بێی كو هزرا خوە تێدا بكەت، لێ ئەو پەیڤ د مێشكێ بەرامبەر دا دمینیت و باوەریا وی ناهێلیت. پەیڤێن مە رەنگڤەدانا هزر و رەوشەنبیریا مە نە، دەمێ ئەم ب رێز و حورمەت دئاخڤین، ئەم بهایێ خۆ یێ ناڤخۆیی نیشا ددەین، بلا ئەم هەموو هەول بدەین پەیڤێن مە ببینە پرەك بۆ گەهشتنا دلان، نەكو دیوارەك بۆ ژێكجودابوونێ بلا پەیڤێن مە ئاڤاكەر بن، چونكی جیهان پێدڤی ب پتر حەزژێكرن و تێگەهشتنێ یە، هەروەكی مەزنان گۆتی (ساخدبن جهێن خەنجەران لێ ساخنابن جهێن خەبەران).
