بێی پشکداریا دەمیرتاشی سەرکەفتنا قووناغا ئاشتیێ یا ب زەحمەتە
سەرۆکێ پارتا نوو یا تورکیا دیار کر، ئەو پشتەڤانیێ ل قووناغا ئاشتیێ ل تورکیا دکەن، لێ دڤێت دەمیرتاش ژی بهێنە ئازاد کرن و ئەو ژی پشکداریێ د پێشڤەچوونا قووناغا ئاشتیێ دا بکەت و بێی دەمیرتاشی سەرکەفتنا قووناغا ئاشتیێ یا زەحمەتە.
ئۆزگور ئۆزەل سەرۆکێ پارتا نوو یا تورکیا د داخویانیەکێ دا بۆ دەزگەهێن راگەهاندنا تورکیا دیار کر، ئەو وەکو پارتا نوو پشتەڤانیێ ل قووناغا ئاشتیێ دکەن و سەرکەفتنا قووناغا ئاشتیێ د بەرژەوەندیا هەموو تورکیا دایە، لێ گرنگە هندەک کارێن دی بهێنە کرن، بەری نها گەلەک جاران هاتیە دیار کرن کو دێ دەمیرتاش هێتە ئازاد کرن، لێ مخابن دیارە ئاکپارتی یاریێ ب دەمی دکەت و هەتا نها ژی بریارا ئازادکرنا دەمیرتاشی نەهاتیە دان و گۆت: (دادگەها مافێن مرۆڤی یا ئورۆپا بریارا ئازادکرنا دەمیرتاشی دایە و دڤێت تورکیا پێگیریێ ب وێ بریارێ بکەت، لێ مخابن هەتا نها تشتەک وەسا نەهاتیە کرن و ئەو یەک ژی جهێ داخێ یە).
سەرۆکێ گشتی یێ پارتا نوو یا تورکیا ئەو یەک ژی دیار کر، دەمیرتاش کەسەک کاریگەرە د سیاسەتا تورکیا دا و رۆلەک گەلەک مەزن د سیاسەتا تورکیا دا گێرایە، مخابن جهێ وی زیندان نینە و دڤێت نوکە ئەو ل پەرلەمانێ تورکیا با، هەکە ئەردۆغانی دڤێت قووناغا ئاشتیێ یا سەرکەفتی بیت دڤێت د زووترین دەم دا دەمیرتاس بهێتە ئازاد کرن، چونکی بێی دەمیرتاشی سەرکەفتنا قووناغا ئاشتیێ دێ یا ب زەحمەت بیت و گۆت: (دەمیرتاش هەردەم پشتەڤانی ل ئاشتیێ و چارەسەرکرنا پرسا کوردی ب رێیا دانوستاندنان کریە و نها ژی پشتەڤانە، ژ بەر ڤێ یەکێ ژی دڤێت ژ بۆ سەرکەفتنا قووناغا ئاشتیێ دەمیرتاش بهێتە ئازادکرن و گرنگە چو ئاستەنگی ژی ل هەمبەر خەباتا وی یا سیاسی ل تورکیا نەهێتە دروست کرن).
ناڤهاتی د دووماهیا ئاخڤتنا خوە دا ئەو یەک ژی دیار کر، دڤێت د زووترین دەم دا پرۆژە یاسایا ئاشتیێ بهێتە پەرلەمانی، چونکی جڤاکێ تورکیا چاڤەرێی ڤێ یەکێ دکەت و مخابن هەتا نها یاسا نەهاتیە و دڤێت د زووترین دەم دا پرۆژە یاسایا ئاشتیێ بهێتە پەرلەمانێ تورکیا.
ئەو یەک د دەمەکێ دایە کو بەری چەند رۆژان بەرپرسەکێ دەم پارتی کو نەخواستبوو ناڤێ وی بهێتە ئاشکرا کرن بۆ مالپەرێ T24 دیار کربوو ئێک ژ خالێن ناکۆک یێ یاسایا ئاشتیێ ئەوە کو ئاکپارتی دبێژیت هەکە دەمیرتاش بهێتە ئازادکرن ژی نابیت هەتا ٥ سالان خەباتا سیاسی بکەت، ئەو یەک ژ ئالیێ دەم پارتیێ ڤە ب توندی هاتیە رەتکرن و دڤێت ئاکپارتی دەست ژ کارەک وەسا بەردەت و نابیت چو ئاستەنگی ل هەمبەر کار و خەباتا سیاسی بۆ دەمیرتاشی بهێتە دروست کرن.
