مە دڤێت پرسێن هەی ل گەل ئەمریکا چارەسەر بکەین
سەرۆک کۆمارێ ئیرانێ دیار کر، هەڤدیتنێن وان ل گەل ئەمریکا بەردەوامن و وان دڤێت پرسێن هەی چارەسەر بکەن، سەبارەت ب دەرتەنگا هورمزێ ژی نها هەڤدیتن دهێنە کرن، لێ گرنگە ئەمریکا ژی دەست ژ زێدەگاڤیێن خوە بەردەت و ب هەلوەستێن خوە یێن خراب ئاستەنگان ل هەمبەر رێککەفتنێ دروست نەکەت.
مەسعود پزیشکیان سەرۆک کۆمارێ ئیرانێ ئەو یەک ژی دیار کر، ئیرانێ بەری نها ژی دیار کریە بەرهەڤە ب رێیا دانوستاندنان پرسێن هەی ل گەل ئەمریکا چارەسەر بکەت، لێ دڤێت ئەمریکا ژی رێزێ ل داخوازیێن گەلێ ئیرانێ بگریت، هەکە ئەمریکا بڤێت ب زۆرێ و گەفان داخوازیێن خوە بسەپینیت ئەو یەک چو ئەنجامێن خوە نابن و دێ ئیران ژی هەتا دووماهیێ بەرگریێ کەت.
سەرۆک کۆمارێ ئیرانێ د دووماهیا ئاخڤتنا خوە دا داخواز ژ هەموو وەلاتێن دەڤەرێ ژی کر کو نەبنە پشکەک ژ ستراتیژیا شەڕی یا ئەمریکا بۆ دەڤەرێ، چونکی ئەو یەک دێ ئەنجامێن خوە یێن گەلەک خراب بۆ هەموو دەڤەرێ هەبیت، هەر وەلاتەک پشتەڤانیێ ل ئێرشێن ئەمریکا بۆ سەر ئیرانێ بکەت دێ بیتە ئارمانجا ئێرشێن ئیرانێ، چونکی وەکو ئیران وان خوە بۆ شەڕەکێ مەزن بەرهەڤ کرینە.
