ژینگەها پاقژ هێمایێ وەلاتەكێ ب ڕەوشتە
بێوار حەمدی
رەنگە ئەم پرسیار بكەین، ئەرێ ما ژینگەهێ چ گرێدان ب ڕەوشتی ڤەهەیە؟ ئەرێ ما ئەڤ بابەتە نە د ژێكجودانە؟ بەرسڤ: ژینگەهـ مالا مەیە و پاراستنا پاقژیا وێ رەوشتە، بێگومان شاشی نەیا تاكەكی یە كو رەوشتی و ژینگەهێ ژێكجودا بكەت، بەلكو شاشی یا د وێ چەندێ دا كو پەروەردە و تێگەهێ مە ژ زارۆكینیێ یا ئەم پێ هاتینە فێركرن ل سەر ژینگەهێ یێ شاشە، من باوەرە ل هەرێما كوردستانێ هیچ قوتابخانەیەك و جهەكێ فێركاریێ نەبوویە كو بەحس ل پاراستن و پاقژیا ژینگەهێ نەهاتبیتەكرن، لێ رەنگە ل هەموو جهان بەحسێ گرێدانا ژینگەهێ ب ڕەوشتی ڤە نە هاتبیتە كرن، ئەرێ دەمێ ئەز عەلاگەكێ گلێشی یان ژی هندەك پاشماوەیێن خۆ د جاما تڕومبێلێ دا دهاڤێژمە ژدەرڤە ما ئەڤ دیاردە یە دەربرینێ ژ ڕەوشتێ من ناكەت؟ بێگومان دەربرینێ ژێ دكەت و دەربرینێ ب گشتی ژ پەروەردە و كەسایەتیا مە ژی ب گشتی دكەت، رەوشت ئەو بتنێ نینە یا بۆ مە هاتیە گۆتن، ژبەركو ئەو رەوشتێن ژینگەه د ناڤدا نەبیت كێماسیێن مەزن د وی ڕەوشتی دا هەنە، ژینگە نە مالا دووێ یە، بەلكو هەر مالامەیا ئێكێ یە، ژ بەركو ئەو خانیێ ئەم تێڤە دژین ژی ژینگەها مەیە، ئەگەر ئەم كێمەكێ ژی ژ پاشمایان بهاڤێژینە ل سەر مەحفیرا مالا خو دێ بینی هەرئێك ژلایێ خوە پێڤەر هات و ئەو جهە پاقژكر، لێ دەمێ ژ مال دەردكەڤیت، دبیت ئێدی پاقژی بوو وی یا گرنك نەبیت، ل سەر ڕێكێ بچیت هەر تشتێ دەستان دا دێ هاڤێژیت یان د تڕومبێلێ دا یان هەر جهەكێ ژ دەرڤەی مال، ژینگەها مە رەوشتێ مەیە، دەربرینێ ژ رەفتار و پەروەردەیا مە دكەت ل چاڤ وەلات و جڤاكێن د، دەمێ بیانیەك ڤێ ڕەفتارا هاڤێتنا گلێشی ل سەر جادێ ژ مە دبینیت، گومان تێدا نینە یان ئەو ژی دێ خۆ ئینیتە وی ئاستی و هەمان رەفتار كەت، یان ژی دێ پیڤەرێ رەوشتێ مە ب گشتی ل سەر وێ رەفتارێ هەلسەنگینیت، لەوما ژی گەلەك یا گرنگە ئەم پتر د پیڤەرێن رەوشتی بگەهین داكو بشێین وەلاتێ خوە ب ژینگەهەكا پاڤژ بهێلین و دیسا رەوشتێ پاراستنا ژینگەهێ فێری نفشێ داهاتووی ژی بكەین.
