رێڤەبەریا خوەسەر و هەسەدە دێ هێنە هلوەشاندن
جێگرێ وەزیرێ بەرگریێ یێ سووریێ دیار دکەت رێککەفتنا شامێ و هەسەدێ گەهشتیە قووناغا دووماهیێ و دێ هێزێن سووریا دیموکرات و رێڤەبەریا خوەسەر ڤێ حەفتیێ هێنە هلوەشاندن و حوکمەتا ناڤەندی دێ حوکمێ ل هەموو ئاخا سووریێ کەت.
سیپان حەمۆ جێگرێ وەزیرێ بەرگریێ یێ سووریێ دیار کر، ل گۆر رێککەفتنا کو بەری نها د ناڤبەرا شامێ و هەسەدێ دا هاتیە کرن دڤێت ڤێ حەفتیێ هەسەدە و رێڤەبەریا خوەسەر بهێنە هلوەشاندن، چونکی پڕانیا خالێن رێککەفتنێ هاتینە بجهئینان و ل گۆر رێککەفتنێ ژی دڤێت حوکمەتا ناڤەندی یا شامێ حوکمێ ل هەموو سووریێ بکەت و گۆت: (بێگومان نابیت ل وەلاتەکێ دا دو حوکم هەبن، وەسا دێ ئالۆزیێن مەزن روو دەن، حوکمەتا سووریێ دێ حوکمێ ل هەموو ئاخا سووریێ کەت و ژ بەر ڤێ یەکێ ژی ل ڤێ حەفتیێ دێ هەسەدە و رێڤەبەریا خوەسەر ب فەرمی هێنە هلوەشاندن).
ناڤهاتی د بەردەوامیا ئاخڤتنا خوە دا ئەو یەک ژی دیار کر، هەسەدە و رێڤەبەریا خوەسەر شیان د قووناغێن گەلەک دژوار دا خزمەتا خەلکێ سووریێ بکەن، ئێدی قووناغەک نوو ل سووریێ دەستپێکریە و ژ بەر ڤێ یەکێ ژی دێ هلوەشاندنا رێڤەبەریا خوەسەر و هەسەدێ ب فەرمی هێتە راگەهاندن و سازیێن سەر ب رێڤەبەریا خوەسەر ژی بێگومان دێ ئێدی سەر ب شامێ بن و دێ وەسا بەردەوامیێ دەنە کارێن خوە و گۆت: (پڕانیا هێزێن هەسەدێ نها سەر ب وەزارەتا بەرگریێ نە و هێزێن ئاسایشێ ژی بووینە پشکەک ژ وەزارەتا ناڤخوە، سازیێن رێڤەبەریا خوەسەر ژی دێ وەسا سەر ب وەزارەتێن دی یێن حوکمەتا سووریێ بن، ئانکۆ دێ حوکمەتا سووریێ حوکمێ ل هەموو ئاخا سووریێ کەت و ئەو یەک ژی دهێتە رامانا دەستپێکرنا قووناغەکا نوو بۆ هەموو گەلێن سووریێ).
هەژی ئاماژەپێدانێ یە کو سیپان حەمۆ بەری نها ئێک ژ فەرماندارێن هێزێن سووریا دیموکرات بوو و پشتی رێککەفتنا هەسەدێ و شامێ سپیان حەمۆ وەکو جێگرێ وەزیرێ بەرگریێ یێ سووریێ کار دکەت.
سەبارەت ب داخۆیانیا سیپان حەمۆ گەلەک ژ چاڤدێرێن سیاسی یێن رۆژئاڤایێ کوردستانێ ژی نەرازیبوونا خوە دیار کرن و راگەهاندن کو بەری نها داخوازا سیستەمەک فیدرالی بۆ سووریێ دهاتە کرن و پاشی ژی هەموو هێزێن سیاسی یێن کوردی داخوازا سیستەمێ نە ناڤەندی بۆ سووریێ کرن، لێ هەتا نها ئەو یەک ژ ئالیێ شامێ ڤە نەهاتیە قەبوول کرن، هەتا نها شام ب فەرمی رازی نەبوویە کو سیستەمێ پەروەردێ ل دەڤەرێن کوردی یێن ل باکورێ سووریێ ب زمانێ کوردی بیت، هەروەسا حوکمەتا شامێ هەتا نها چو داخوازیێن کوردان ژی قەبوول نەکریە، ژ بەر ڤێ یەکێ ژی د دەمەکێ وەسا دا هلوەشاندنا رێڤەبەریا خوەسەر و هێزێن سووریا دیموکرات دێ ئەنجامێن خوە یێن گەلەک خراب بۆ کوردان ل سووریێ هەبیت، چونکی نابیت بێی وەرگرتنا چو مافان ئەو دەستکەفتیێن کوردان بهێنە ژناڤبرن.
گەلەک ژ چاڤدێرێن سیاسی، نڤیسەر، رەوشەنبیرێن کورد و کەسایەتیێن رۆژئاڤایێ کوردستانێ ژی ب رەنگێن جودا جودا نەرازیبوونا خوە ل هەمبەر هلوەشاندنا رێڤەبەریا خوەسەر و هەسەدێ دیار دکەن و داخواز دکەن کورد ب هەموو رەنگەکێ خەباتێ بۆ بدەستڤەئینانا مافێن خوە یێن رەوا بکەن.
