ئەڤ سالە بەرهەمێ هژیرێن ئاكرێ دێ گەهیتە ٩ هزار تەنان
رەمەزان زەكەریا
دەڤەرا ئاكرێ ئێكە ژ ناڤچەیێن سەرەكی و گرنگ یێن بەرهەمهێنانا هژیران ل سەر ئاستێ هەرێما كوردستانێ دهێتە ناسین، بەرهەمێ وێ ژبەر تام و كوالیتیا خۆ یا دەگمەن ل سەرانسەری هەرێمێ و ئیراقێ ناڤدارە ئەڤسالە پێشبینیا بەرهەمەكێ زێدە دهێتە كرن.
فازل مستەفا، ڕێڤەبەرێ چاندنا ئاكرێ بۆ ئەڤرۆ گۆت: ب ئەگەڕێ بارینا زێدەیا بەفر و بارانێ د زڤستانا سالا بووری دا كوالیتیا هژیرێن ئەڤسالە ل ئاكرێ دێ پلا ئێك بیت كەشوهەوای مفایەكێ مەزن گەهاندیە بەرهەمێ هژیران. بەفرێ رۆلەكێ كاریگەر هەبوویە ژناڤبرنا ڤایرۆس و نەخۆشیێن داران دا، لەورا هەتا نوكە ژی چ نەخۆشیەك ل سەر دارێن هژیران دیار نەبوویە و ئەڤە ژی كوالیتیا بەرهەمی دگەهینیتە بلندترین ئاست.
ناڤبری گۆتژی: ل سنوورێ ئاكرێ نێزیكی ٢٥٠ هزار دارێن هژیران هەنە هەر دارەك نێزیكی ٣٥ كیلۆگرامێن هژیران ددەت، ب ڤان پیڤەران ژی پێشبینی دهێتە كرن بەرهەمێ ئەڤسالە بگەهیتە نزیكی ٩ هزار تەنان.
ناڤهاتی گۆت: زۆربەیا بەرهەمێ هژیرێن ئاكرێ بۆ پارێزگەهێن ناڤەڕاست و باشوورێ ئیراقێ دهێتە فرێكرن، بەلێ ژبەر كو هژیر بەرهەمەكێ گەلەك نازكە نەشێت چەند ڕۆژان ب بێ تێكچوون بمینیت، جوتیار و بازرگانێن هژیران پێدڤیەكا زۆر ب ئامێرێن باشێن ڤەگوهاستنێ و هێنككەران هەیە دا كو بەرهەم ب تەمامی و ب سەلامەتی بگەهیتە بازاڕان.
ئاشكرا كر: دەستپێكا پێگەهشتنا بەرهەمی بهایێ وان یێ گرانە، بەلێ چەند بەرهەم زێدەتر بیت ل ناڤ بازاری بها ژی كێم دبیت و سالانە ل وەرزێ هژیران پێگەهشتنێ خاستەكا زۆر ل سەر هژیرا ئاكرێ هەیە.
