ئیراقچی: پێگەهێ ئیرانێ گەلەک بهێز بوویە
وەزیرێ دەرڤە یێ ئیرانێ دیار کر، دەمێ ئەمریکا و ئسرائیلێ پێکڤە ئێرشی ئیرانێ کرن وی دەمی ترامپی گۆت ئیرانێ تنێ دو رێ هەنە یان دێ ژناڤ چیت یان ژی دێ خوە رادەست کەت و گۆت: (لێ ئیرانێ بەرخوەدانەک گەلەک مەزن کر، ئیرانێ شیا هەموو پیلانێن ئەمریکا و ئسرائیلێ ژناڤ ببەت، دەمەکە ترامپ یێ هیڤیان ژ مە دکەت دا ل گەل ئەمریکا دانوستاندنان بکەین، لێ هەتا ئەمریکا هەموو مەرجێن ئیرانێ قەبوول نەکەت بێگومان وەکو ئیران ئەم چو دانوستاندنان ژی ل گەل ئەمریکا ناکەین).
عەباس ئیراقچی ئەو یەک ژی دیار کر، ژ بۆ ڤەکرنا دەرتەنگا هورمزێ دڤێت ئەمریکا بەری هەر تشتەکێ هەموو هێزێن خوە ژ نێزیکی دەرتەنگا هورمزێ ڤەکێشیت و دۆرپێچا دەریایی ژی ب دووماهی بینیت و هەروەسا دڤێت ئەمریکا هەموو سزایێن کو بەری نها داناینە سەر ئیرانێ راکەت و ئێدی نەبیتە مەترسی بۆ ئیرانێ و گۆت: (دڤێت ئەمریکا گەرەنتیا ڤێ یەکێ ژی بدەت کو جارەکا دی ئێرشی ئیرانێ نەکەت و هەروەسا دڤێت رێگریێ ل ئسرائیلێ ژی بکەت، هەتا ئەمریکا ڤان داخوازیێن ئیرانێ قەبوول نەکەت نە دانوستاندنان دکەین و نە ژی دەرتەنگا هورمزێ دهێتە ڤەکرن).
وەزیرێ دەرڤە یێ ئیرانێ جارەکا دی داخواز ژ وەلاتێن رۆژهەلاتا ناڤین کر کو نەبنە پشکەک ژ ستراتیژیا شەڕی یا ئەمریکا و هەکە ئەو کارەک وەسا بکەن دێ ئیران ب توندی بەرسڤا وان دەت.
