هەسەدە و رێڤەبەریا خوەسەر نامینن
فەرماندارێ هەسەدێ یێ کۆبانێ دیار دکەت د چەند رۆژێن بهێت دا هەسەدە و رێڤەبەریا خوەسەر دی هێنە هلوەشاندن و ل سووریا نوو دێ ئێک دەولەت و ئێک ئالا هەبیت و ئارمانجا وان چو دەمەکێ ئاڤاکرنا دەولەتەکا جودا ل سووریێ نەبوویە.
مەحمود بەرخوەدان فەرماندارێ هەسەدێ ل کۆبانێ دیار کر، د چەند رۆژێن بهێت دا هێزێن سووریا دیموکرات (هەسەدە) دێ هێتە هلوەشاندن و نها پڕانیا هێزێن وان وەکو لیوا بووینە پشکەک ژ وەزارەتا بەرگریێ یا سووریێ و ئێدی پێدڤی ب مانا هێزێن سووریا دیموکرات نینە و گۆت: (ل گەل هەسەدێ دێ رێڤەبەریا خوەسەر ژی هێتە هلوەشاندن، د قووناغا نوو یا ل سووریێ دا دێ تنێ ئێک دەولەت و ئێک ئالا هەبیت و کورد ژی دێ وەکو عەرەبان د رێڤەبرنا سووریێ دا پشکدار بن).
ناڤهاتی ئەو یەک ژی دیار کر، دەمێ هەسەدە هاتە دامەزراندن وی دەمی ژی ئارمانجا هەسەدێ ئەو نەبوویە کو دەولەتەکا جودا ل سووریێ ئاڤا بکەت، بەلکو وان کار بۆ پاراستنا گەلێ کورد ل سووریێ کرینە و هەسەدێ ئەرکێ خوە بجه ئینایە و د قووناغا نها دا ئێدی پێدڤی ب مانا هەسەدێ ناکەت و گۆت: (دێ ل سووریێ ئێک دەولەت، ئێک لەشکر و ئێک ئالا هەبیت و سووریێ دێ یا مە هەموویان بیت و هەموو وەلاتیێن سووریێ دێ پێکڤە وەکو برا ژین و دێ گەهنە هەموو مافێن خوە و ژ بەر ڤێ یەکێ ژی دێ کورد و عەرەب و پێکهاتەیێن دی یێن ل سووریێ پێکڤە کار بۆ ئاڤاکرنا سووریایەک نوو کەن).
فەرماندارێ هەسەدێ ل کۆبانێ د پشکەکا دی یا ئاخڤتنا خوە دا ئاماژە ب ڤێ یەکێ ژی کر کو، یا نها ل سووریێ روو ددەت د راستی دا پشکەکە ژ قووناغا ئاشتیێ یا ل تورکیا، ئەردۆغان و باخچەلی شیان کارەکێ گەلەک مەزن بکەن، وان شیان کارەکێ مەزن بۆ پاشەرۆژا دەڤەرێ ب گشتی بکەن و گۆت: (سەرکەفتنا قووناغا ئاشتیێ تنێ ژ بۆ کوردێن تورکیا نینە، بەلکو دێ کاریگەریا خوە ل سەر هەموو کوردان کەت، ئەردۆغان و باخچەلی باش زانین هەتا کورد ژی نەگەهنە مافێن خوە ئالۆزیێن ل تورکیا و هەموو رۆژهەلاتا ناڤین چارەسەر نابن، وان کارەک گەلەک مەزن کرن و کاریگەریا قووناغا ئاشتیێ دێ ب سالان بەردەوام بیت).
مەحمود بەرخوەدان د دووماهیا ئاخڤتنا خوە دا ئەو یەک ژی نەڤەشارت کو کوردێن سووریێ داخوازا ئاڤاکرنا دەولەتەکا جودا نەکرینە و کوردان دڤێت د سیستەمێ نوو یێ سووریێ دا پشکدار بن و سووریێ دەولەتا کوردانە ژی و کورد دشێن ل گەل هەموو پێکهاتەیێن ل سووریێ پێکڤە بژین.