سێ پشكێن نوو ل زانكۆیا زاخۆ دێ هێنە ڤەكرن
زاخۆ، دلۆڤان هالۆ:
د. ڕەمەزان جەعفەر، هاریكارێ سەرۆكێ زانكۆیا زاخۆ بۆ كاروبارێن قوتابیان بۆ ڕۆژناما ئەڤرۆ دیاركر كو بۆ سالا نوو یا خواندنێ، سێ پشكێن نوو یێن ئەكادیمی ل زانكۆیا زاخۆ دێ هێنە ڤەكرن و دبێژیت: د نوكە دا جڤاكێ مە ب شێوەیەكێ بەرچاڤ پێدڤی ب بسپۆریێن دەروونی و پەروەردەیی و ژینگەهێ هەیە، لەورا زانكۆیا زاخۆ ئەڤ بەرپرسیارەتیە هەلگرت، داكو كادرێن پێدڤی بۆ پڕكرنا ڤێ ڤالاهیێ بەرهەڤ بكەت.
هاریكارێ سەرۆكێ زانكۆیێ بۆ كاروبارێن قوتابیان گۆت: «پشكا ئێكێ: پشكا ڕێنمایكرنا دەروونی یە، ب مەرەما بەرهەڤكرنا كادرێن بسپۆر د بیاڤێ ساخلەمیا دەروونی دا ژ بۆ هاندانا هزرەكا دروست و پێشكێشكرنا ڕێنومایان بۆ تاكێن جڤاكی د قەیران و رەوشێن جودا دا، پشكا دووێ: پشكا پەروەردەیا تایبەتە، ژ بۆ مەرەما پێگەهاندنا مامۆستا و شارەزایێن ئەكادیمی یێن كو بشێن ب شێوەیەكێ زانستی سەرەدەریێ ل گەل كەسێن خودان پێدڤیێن تایبەت بكەن و شیانێن وان بەرەڤ پێشڤە ببەن و پشكا سێیێ: پشكا زانستێن ژینگەهـ و ساخلەمی یە، بۆ دروستكرنا كەسایەتیێن زانستی كو بشێن چارەسەریێن ژینگەهێ پێشكێش بكەن و ساخلەمیا گشتی یا دەڤەرێ و جڤاكی بپارێزن».
گۆت ژی:»ئارمانج ژ ڤەكرنا ڤان هەرسێ پشكان بەرفرەهكرنا دەرفەتێن وەرگرتنێ یێن زێدەترە بۆ دەرچوویێن قووناغا ئامادەیی، داكو بشێن د بیاڤێن جودا و سەردەمیانە دا ل زانكۆیێ بەردەوامیێ ب خواندنا خوە بدەن، زەنگینكرنا پرۆسێسا فێركرنێ یە ل زانكۆیێ، كو قوتابی ب شێوەیەكێ ئەكادیمی و پڕاكتیكی ل سەر دەستێ مامۆستایێن شارەزا فێری زانستێن نوو ببن».
