38 سال ل سەر برینەكا ئـاریایی و نەنڤستی
رێژین نهێلی
كارەساتێن ئەنفالێن بەهدینان چەند دەم ب سەر دا دەرباز دبیت، ئەو برینە هەر یا نوی یە و سارێژ نابن و د بیردانكا تاكێ كورد و گشت مرۆڤاتیێ دا نا دەركەڤن. ل 25ی تەباخی َتا 6ی ئیلۆنا سالا 1988ی رژێما ئیراقێ تاوانەكا نەمرۆڤانە ل دژی دەڤەر و گوندێن دەڤەرا بەهدینان ئەنجام دا و كارەساتەكا كێم وێنە بوو د مێژوویا مرۆڤایەتیێ دا ل هەمبەر مللەتێ كورد هاتیەكرن، ل وی دەمی ژمارەكا مەزن یا هاولاتیێن مە ب دەستێ حوكمەتا ژناڤچوویی یا ئیراقێ و ب رێكا هەمی جۆرێن چەكێ قەدەغەكری دەست ب وێرانكرنێ كر و ڤیایە مللەت و تاكێ كورد بەرەف نەمان و چارەنڤیسەكێ نەدیار ڤە ببەن و د ڤێ كارەساتێ دا چەندین هەڤوەلاتیێن بێگونەه هاتنە شەهیدكرن و ئەشكەنجەدان و دەربەدەركرن و ژ ناڤا مال و گوند و وارێن وان هاتنە دویرئێخستن. لەورا ژی ئەنفال نەبەس رویدانەكا مێژوویە، بەلكو نیشانەكا دیارە ژ زولم و زۆردارییا دوژمنان ب سەر مللەتێ كورد دا، كو هەتا ئەڤرۆ ژی خێزان چاڤەرێی نیشان و هیڤیەكێنە ژبۆ ڤەگەڕاندنا كەس و كارێن خوە یێن بەرزەبووی.
گۆرێن ب كۆم و زارۆكێن پاش باب مایین و ئیشێن گران یێن دایكان ژی بووینە بەلگەیەك ل سەر ڤێ تاوانا نەمرۆڤانە و ڤێ تراژیدییا دژوار، لەوما بیرئینان ل كارەساتا مەزن یا ئەنفالان ئەركەكێ نەتەوەیی و مرۆڤایەتی یە. فەرە راستییا وێ كارەساتێ بۆ نفشێ نوی و تازە پێگەهشتی ب دروستی بهێتە ڤەگوهاستن و شرۆڤەكرن. داكو ئەو تاوانا مەزن نەهێتە ژبیركرن و دیسا رێك نەهێتە دان د دیرۆكا هەبوونا كوردان داكو ئەڤ رویدانە دوبارە بنەڤە. ژبیرنەكرنا قوربانیان نیشانا هندێ یە كو پاراستنا ڤان جۆرە بیرەوەریان رێیا ئاشتی و دادپەروەریێ رۆناهی دكەت و هەر وەسا ئەو دەنگێ هاتیە كپكرن ب گوللە و چەكێن كیمیاوی ئەم وان دەنگان زیندی بكەینەڤە و وێ ناسنامەیا پیرۆز یا كورد بوونا مە یا كو دوژمنان ل بەربوو ژ ناڤ ببەن و بپارێزین و نیشا هەموو جیهانێ بدەین كو كورد هەر دێ مینن و كوردستان دێ هەر یا ئاڤەدان و د گەشێ دا بیت.
ل سالڤەگەرا ئەنفالا بەهدینان سەرێ رێز و نەوازشێ بۆ هەمی قوربانیێن ئەنفالان و شەهیدێن كوردستانێ دچەمینن.
