هـەڤژینێ مـن گۆتبوو ئـەم هـەر چووین، ئێمانەت هـوین و زاڕۆكێن خـۆ
رەمەزان دەشتمری
دەمێ ل سپێدەهییا ڕۆژا 25/8/1988 حوكمەتا ئیراقێ یا ئەوی سەردەمی ب چەكێ كێمیاوی دەڤەرێن ڕزگاركری و ئەوێن ل ناف شوڕەشێ بومبەرانكرین و هێزا ئەسكەری و دگەل فەوجێن جاشان هێرشی دەڤەرێ كرین و گوند سۆتین و تالانكرین. هەڤوەلاتی خانم ئەسمەر حاجی گێندەل نۆردینی ئێك ژ ئەنفالبۆیان دبێژیت: ئەو ڕۆژا فڕۆكەیێن جەنگی چەكێ كێمیاوی ل دەڤەرێ ڕەشاندین كو ئەوی دەمی ئەم ل گوندێ هاروینا بوون و ل ئەوی دەمی مە پتر ژ سێ هزار سەرێن بزنێ ڕەش هەبوون. ل دەمژمێر هەشتێ سپێدهیا ڕۆژا 25/8/1988ێ گۆتن: ئەڤە خەلكێ باركرن و یێ قەستا سەرسنووران دكەن، ئەوبوو ئەم و ل گەل مالا خەزیرێ من رەمەزان مژدین نوورینی و ل گەل مالا مامێ من عەلی و مە دەستێ زاڕۆكێن خوەگرتن و ئەم بۆ گوندێ چەمتڕی چووین. و پاشی بۆ گوندێ بەرزیركێ هاتن. ل ئەوێ شەڤێ ئەم ل گوندێ مێسكێ ماین. ل ڕۆژا دیتر مە قەستا دەڤەرا بەرواریا كر و ئەم گەهشتن نێزیكی گوندێ گركا بەرواریا مەدیت خەلكەك یێ پاشدا دزڤڕن و گۆتن: ڕێك نینە و خەلك نەشێن ل جادا گشتی دەربازببن. ئەم نەچاربین و پاشدا ب زڤڕن. ل ڕۆژا 28/8/1988ێ ئەم بۆ گوندێ سەرسیلافكێ هاتن و مە بەرێ خوە دایێ ئەسكەرێ حكومەتا ئیراقێ و دگەل فەرجێن جاشان ل دور مە زڤڕین و ئەم گرتین و ل ترومبێلێن ئەسكەری سیاركرن و بۆ كەلها هیزا وان برن و زیندانكرن. ل ئەوێ شەڤێ ئەم ل بارەگایێ ئەسكەری هێلان و زەلامێن مە ژی، ژ مە جوداكرن و برن. ل ڕۆژا دیتر ئەم ل ترومبێلین عەسكەری سیاركرن و بۆ كەلها نزاركێ ل دهۆكێ ئینان و زیندانكرن. دەمێ ئەم ژ ترومبێلان ئیناین خوار و بۆ ناڤ ئاڤاهیێ كەلها نزاركێ دا مە دیت ڕەشەكێن ئەمنێ ب دار و سۆندە و كێڤلان ئەم قوتاین هەتا ئەم بۆ ناڤ ئاڤاهیێ كەلهێ دا برین. ل ناڤ ئاڤاهیێ كەلهێ دا وەكی ڕۆژا حەشرێ و گری و قلیزێن و هاوار و گازی یا ئەوێ خەلكێ یا دچوونە بەر ئەسمانا و ب كێڤلا و بلۆكا زەلام دقوتان. ل ئەوێ شەڤێ ئەم بێ نان و خوارن و ئاڤ ل كەلهێ دا مایین. ل دەمەكێ ئەز دا چم هندەك ئاڤا گەرم بۆ زارۆكێن خوە ئینم، من بەرێ خۆ دایێ هەڤژینێ من خالد گازی من كر و گۆت: هوین هشیارێ خۆ بن و هەكەر زاڕۆكەكی هەوە مربت، دلێ خوە نەهێلن پێڤە و ئیمانەت هوین و ئێكودو و ئەم هەر چوون و نازڤڕن. هێشتا من ل گەل هەڤژینێ خۆ نەئاخفتی، من بەرێ خۆ دایێ زەلامەكی ئەمنێ جلكێن ڕەنگ كەسك ل بەربوون و دەست ئاڤێت دارەكێ ڕاهێلاتە من و ب ئەوی داری دەیناتە ئەڤان قولنجێن من و ئەز قوتام و ب دویڤ من كەت هەتا ئەز گەهشتیم دەڤ زاڕۆكێن خۆ و ئەز ڕەڤیم. بەس هینگێ من هەڤژینێ خوە دیت. پاشی ئەم ل ترومبێلان سیاركرن و بۆ هۆلێن سەلامیێ ل پشتا باژێڕێ مووسل برن و زیندانكرن. ل هۆلێن سەلامیێ دەمێ خوارن بۆ مە دئینان چ ئامان دگەل مە نەبوون خوارنێ بۆ زاڕۆكێن خوە بكەنێ، لەوما ئەز نەچاربووم من خوارن وەكی برنج و ئاڤك دكرە سەر لێڤا كراسێ خۆ و بۆ زارۆكێن خۆ ئینان و ب لەپان مە ئەو خوارن دخوار. ل دەمێ ڕۆژا 6/9/1988ێ دەمێ لێبۆرینا گشتی هاتی ڕاگەهاندن. زەلامێن ئەمنێ گازی مەكرن و گۆتن: وەرن ل نیڤا گۆرەپانی ئاهەنگێ بگێڕین. ژ قەهرێن خۆ دا من ب زمانێ كوردی گۆتە ئەوی زەلامێ ئەمنێ: هەوە زەلامێن مە یێن گرتین و بەرزەكرین و كا هوین زەلامێن مە ئازاد بكەن و ئەم ژی دێ ئاهەنگێ بۆ هەوە گێڕین. چاوا من وە گۆت: ئەڤی زەلامی. ئەوێ ئەمنێ ل من خۆڕی و قەسێن كرێت گۆتنە من و دەست ئاڤێت كێڤلی و ڕاهێلاتە من و ئەز ڕەڤیم و بۆ ناڤ ئەوان هۆلا چووم و من خۆ قورتالكر. ئەوبوو پاشی ئەم ڕەوانەیی دەشتا هەولێرێ ل جەژنیكان ئاكنجیكرن. بەلێ چ جاران ڕۆلێ خەلكێ هەولێرێ ژبیر ناكین هەر د ئەوێ شەڤا ئەم بۆ جەژنیكان برین ئەوی خەلكێ هەمی جۆرێن هاریكارییێ بۆ مە گەهاندن. مە ڕۆژانێن خوە ل كومەلگەها جەژنیكان بۆراندن هەتا سالا 1990 حوكمەتێ گۆتە ئەوی خەلكێ هوین دشێن بۆ سەر جهـ و وارێن خۆ بزڤڕن. ئەوبوو ئەم ل گەل ژنتیێن خۆ و خەسیا من و ژنماما من، مە دەستێ زاڕۆكێن خۆ گرتن و مە قەستا باژاڕێ زاخۆ كر. ل ئەوی دەمی مە خانیەك ل تاخێ عەباسیكی هەبوو و زەلامەكی ئەمنێ د خانیێ مەڤە خۆ ئاسێ كربوو. مە داخواز ژێكر كو خانیێ مە ڤالە بكت، بەلێ ئەوی خوە ل بەر ئاسێ كر و دەرنەكەت و ئەم نەچاربووین و كەتنە دەری كۆلانان و من دەستێ زارۆیێن خۆ گرت و ل مالا خویشكا خۆ ئاكنجی بووم و هینگێ من پێ چێنەبی ئاڤاهیەكێ بۆ خۆ كرێ بكم و بچنە تێڤە. هەتا دەمێ سەرهلدانا سالا 1991 ئەوی زەلامێ ئەمنێ ب سەرشۆری ژ خانیێ ب جهـ هێلا دەركەت و ئەم چوون د خانیێ خوەڤە و ژبەركو مە كەس نەبوو، مە نەشیا كریا خانی ژ ئەوی زەلامێ ئەمنێ وەربگرن. ل دەمێ ئەنفالێ شەش كەس ژ مالا بەرهەوا ئەنفالێ كەتن و بێ سەر وشوین بین. ئەو ژی هەڤەبوون: خالد رەمەزان مژدین نۆردینی، رەمەزان مژدین نۆردینی، عەلی مژدین نۆردینی، حاجی رەمەزان نوردینی، سلێمان رەمەزان نوردینی، ئوسمان رەمەزان نوردینی. ئەوە شەش كەسەبین ژ مالا مە بەر هەوا ئەنفالێ كەتین و هاتین هنداكرن و پتر ژسێ هزار سەرێن بزنێ ڕەش ل دەمێ ئەنفالان جاشان بۆ خۆ برن و ئەم ژی ڕەپ و ڕویت و بێ خۆدان كەتن د ناڤ دەستێن دوژمنی دا و ل كومەلگەها جەژنیكان ئاكنجیكرن.
