من بزاڤكرینە هەر تشتەكێ نوو دبوارێ وێنەگریێ دا بینمە دهۆكێ
مووسا خالد
وێنەگر (ڤین مەحموود) د دیدارەكێ دا بۆ رۆژنامەیا ئەڤرۆ گۆت: هەر چەندە ئەز دەرچوویا كولیژا كارگێڕی و ئابووری مە ل زانكۆیا دهۆك، لێ حەزژێكرنا من بۆ كارێ وێنەگریێ یا بەری چەندین سالان بوو، لەورا پشتی دەلیڤە هاتی مە (هەیڤ ستۆدیۆ) ڤەكر و كارێ من یێ سەرەكی گرتنا وێنەیێن زاڕۆكان، هەروەسا یێن خێزانانە و بەردەوام بزاڤێ دكەم گرنگترین دەمێ ژیانا وان ب شێوەیەكی هونەری و جوان بپارێزم و ئەڤە پێنج سالن ڤی كاری دكەم.
هەروەسا گۆت: د پێنج سالێن بۆری دا من ب بەردەوامی خۆ پێشخستیە و ئەزموون و پێزانینێن خۆ دبۆارێ وێنەگریێ دا زێدەركرینە، هەروەسا من بزاڤكرینە هەر تشتەكێ نوو و پێشكەفتی دبۆارێ وێنەگریێ دا بینمە دهۆكێ، بۆ زانین خێزان و هەڤالێن من پشتەڤانێن سەرەكی نە بۆ بەردەوامی دان بكارێ من، هەروەسا باوەریا مالا من و ستافێ من یێ كاری هێزەكا دی دایە من كو یا بەردەوامبم، هەروەسا د پلانا من دایە ب نووترین خزمەتكاری د جیهانا فوتۆگرافیا زاڕۆكان دا پێشكێشی خەلكێ خۆ بكەین، هەروەسا هیڤیا من ئەوە جهێ من ببیتە دەرگەهەك كو گەلەك كچ و ژن ل بەر دەستێ من فێری كارێ وێنەگریێ ببن.
