ئیسماعیل سەلیم: دەمێ ئەز دمرم لۆگۆیێ (كوردستان تیڤی) دانە سەر كێلیا من
سندس سالح سلێڤانەیی:
ئیسماعیل سەلیم، پەیامنێرێ دیارێ دەزگەهێ سەتەلایتا كوردستانێ /نڤیسینگەها دهۆك، د دیدارەكێ دا بۆ رۆژنامەیا ئەڤرۆ گۆت: وەسیەتا من ئەوە دەمێ ئەز دمرم لۆگۆیێ (كوردستان تیڤی) دانە سەر كێلیا گوڕێ من، ژبەركو من رۆژێن خۆش لڤی دەزگەهی فێری گەلەك تشتان بوویمە، ژوانا حەزژێكرنا وەلاتی.
هەروەسا گۆت: دەمێ ل سالا (1995) ئەز هاتیمە تەلەفزیۆنا دهۆك و من كارێ پەیامنێریێ دكر، ل وی دەمی ڕاگەهاندن گەلەكا ب زەوق بوو، هەروەسا گەلەك خەلكی دگۆتنە مە ئەز حەزدكەم دیدارەكێ دگەل من بكەن و دەمێ دیدار دگەل دهاتە كرن دابێژیت كەنگی دێ بەلاڤ بیت دا چاڤەڕێ بم، لێ نوكە وەسا نەمایە و گەلەك جاران دێ بێژینە كەسەكی دا دیدارەكێ دگەل تە بكەین، دێ بێژیت نە، چنكو دێ من د سۆشیال مەدیایێ دا كەنە (فلم) هەروەسا هندەك ژی هەنە دەمێ دیدار دگەل دهێتە كرن دێ بێژیت دەمێ بەلاڤ بوو بۆ من فرێكە، لەورا دبێژم د بەرێ كارێ ڕاگەهاندنێ گەلەك ب زەوق تر بوو.
