ئەمەلێ كلیپەكا نوو بەلاڤكر
زنار تۆڤی:
خانما سترانبێژ (ئەمەل سەعید كوردە) نووترین سترانا خۆ ب ناڤێ (چ بوویە) بەلاڤكر و دبێژیت: سترانا من یا نوو بەرهەمەكێ سۆزدارییە و چیرۆكا ئازارا دلی و شەڤێن ژ بیركرنا خۆشتڤییەكێ ڤەدگێڕیت، هەلبەستا ڤێ سترانێ یا (مازیار فایەق) ە و ئاواز و دابەشكرن و ئامادەكرنا مۆزیكێ ژلایێ (رۆژ كەریم) ڤە هاتیە ئەنجامدان، ب رەنگەكێ كلاسیكی یێ جوان كارێ وێنەگرتنێ بۆ ڤێ سترانێ هاتیە كرن و (دیار مەهدی) كارێ دەرهێنانێ بۆ ڤیدیۆ كلیپێ كرییە، هەروەسا ئەڤ بەرهەمە ل گەل ڤیدیۆ كلیپێ، بزاڤەكە بۆ ڤەگەریانا هەستێ سترانا كلاسیك و پێشكێشكرنا چیرۆكەكا سۆزداری ب رەنگەكێ سادە، كو نێزیكی هەستێ گوهداری بیت. هەروەسا گۆت: ئەڤ سترانە بۆ ئەوان كەسایە یێن كو ئێش و ئازار گەهاندیە دلێ هندەك كەسان و ئەو كەسێن ب شەڤان خەو ب چاڤێن وان نەكەفتی و هێشتا ل گەل بیرەوەری و هەستێ ئەوێ پەیوەندییێ دژین، ئەز هیڤیدارم ب رێیا ڤی بەرهەمی من شیابیت خزمەتا گوهدار و حەزژێكەرێن سترانا كوردی كربیت.
ئەمەل سەعید كوردە، پەیمانگەها هونەرێن جوان، پشكا مۆزیكێ ل سلێمانیــــــــــــــێ خواندییە، ل دەستپێكێ ل گەل كۆمەلا هونەرێن جوان ل سلێمانیێ دەست ب كارێن هونەری كرییە، هەتا نوكە چـــــــــــــــەندین بەرهەم تۆماركرینە.
