ژ 11ێ ئیلۆنێ هـەتـا 11ێ ئـادارێ
شێرزاد نایف
من نەڤێت تێكستێ خۆ ب زانستێ (ستێرناسیێ ـ تنجیم) دەست پێ بكەم، بەلێ لۆژیكێ ژمارە 11، مە دبەتە 11 ستێرێن یۆزارسیفێ پەیامبەر كو د خەونا خۆ دا دیتین، 11 برایێن وی بوون، ب مخابنی ڤە لێ خائین ببوون، وەكهەڤی سیناریۆیا دۆزا مە كوردان و شۆرشێن مەیە، ل شۆرشا ئیلۆنێ یا كو ژ 11 ئیلۆنێ دەست پێ كری و ب دەستكەفتیێ 11 ئادارا 1970 ب ئەنجام هاتی!. لێ د ئەنجامدا ب هەمان خیانەتا برایێن یووسفێ مسرێ ب نسكۆ كەفتی، هەر وەكو ژیوار دخوازیت نیشا مە بدەت كو ژمارە 11 د زانستێ ستێرەناسیێ دا بۆرجا وەرچەرخێنەرە، خولا كۆدەتایا رۆژێ ل ئەسمانی هەر 11 سالان جارەكێ یە و شەڕێ جیهانی یێ ئێكێ ل دەمژمێر 11 ژ رۆژا 11 و هەیڤا 11 نۆڤەمبەرا سالا 1918 بداوی هاتبوو، و مەكۆكا ئەسمانی یا ئەپۆلۆ ژمارە 11 یە، هەروەسا دەسپێكرنا ئاڤاكرنا پەنتاگۆنێ ل هەیڤا 11 سالا 1941 بوو، بۆردۆمانا مەدرید ل 11 سالا 2004 بوو، یا ژ هەمیان زیقتر ژی 11 ئەم نابێژینێ ئیلۆنا 2001 ئەم دبێژین 11 سپتەمبەرێ وەختێ رێكخراوا (ئەلقاعیدە) ل ئەمریكا دای، داكو لۆژیك ل دژی هەڤ بن..هتد. هەر چەندە من هند باوەری ب ڤی زانستی ڤە نینە یێ كو دبێژنێ (زانست) گرێدانا چارەنڤیسێ مرۆڤی ب لڤینا ستێران ڤە، چونكو نێزیكی جادۆگەریێ یە. لێ ئەڤ بۆیەرا وەرچەرخێنەر ژبلی كو بۆیەرەكا سیاسی و لەشكری بوو، لێ بۆ هەر تاكەكێ كورد وەكو نیشانەكێ یە د گیانێ وی دا، كو ئەڤە ژی دچیتە د رەهەندێ جڤاكی دا، چونكو ل دەستپێكێ شۆرشا ئیلۆنێ وەكو شۆرشا ئێكێ یا چەكداربوونا سەرانسەری ب ڤی قەبارەیێ خۆ یێ مەزن بوو كو هەمی پارچێن كوردستانێ ب خۆڤە گرتبوون، ژ جڤاكی دەركەفتبوو، جۆرەكێ ئێكبوونا هەمی چین و توێژێن مللەتی ب خۆڤەگرتبوو، بۆ قوربانیدان ل دژی سەركۆتكرنێ. تشتێ ڤێ شۆرشا مەزن مەزنتر دكەت و ژ هەمی شۆرشان جودا دكەت، درێژیا دەمێ وێ یە، كو ژ سالا 1961 دەست پێ دكەت هەتا سالا 1975، مینا رۆتینەكا رۆژانە یە كو دبیتە ماوەیێ تەمەنەكی، ژ بەر هندێ ژی هەتا نها رامان و وانەیێن وێ ماینە د مەژیێ هەر ئێك ژ مە دا، لەورا گەلەك كەسێن بەرەڤاژی پێلێ برێڤەدچن، دبێژنە مە هوون هەمی تشتان ب شۆرشا ئیلۆنێ ڤە گرێددەن!. مانێ مە دایبابێن مە چارێكا ژیێ خۆ پێڤە بریە و مە ژی ژی نیڤا ژیێ خۆ ل ناڤا وان بۆیەران دا بریە، كەس ژ مە نینە شەهیدەك نەدایی یان تووشی جۆرێن جینۆسایدێ نەبووی، ژبەر هندێ ئەم و شۆرشا ئیلۆنێ بووینە دو تشتێن پێكڤە گرێدای ژێكڤەنابین، هەلبەت دەما ئەم باس ب شۆرشا گولانێ ژی دكەین هەر بەردەوامیدانا شۆرشا ئیلۆنێ یە، بەلێ ب ناڤەكێ دی و بەروارەكا ل دویڤدا، كو پشتی سالەكێ ژ داویهاتنا ئیلۆنێ بوو، وەكو رەنگڤەدانەك ل سەر رێككەفتنا خیانەتكارانە یا جەزائیرێ، ب (قیادا موئەقەت) هاتە برێڤەبرن و ئەو رێرەوا جەنەرال بارزانیێ نەمر مستەفا دانایی رادەستی هەردو میراتگێرێن قوربانیدانێ كاك ئدریسێ بارزانی و سەرۆك مەسعود بارزانی كریە، یێ ئێكێ ب مخابنی ڤە ژیانەكا كورت بوو، لێ بەرهەمەكێ درێژ ل پاش خۆ هێلا، سەرۆك بارزانی ژی ئەو كاروان بەردەوامی پێ دا هەتا كو شۆرشا گۆلانێ ژی دەربازی سەرهلدانا سالا 1991 كری، هەتا ئەڤرۆ ژی ب حسیبا مە، شۆرشا ئیلۆنێ یا بەردەوامە و تیپێن وێ ژی ب هەمان لۆژیكا ژمارەیا مە هەر 11 نە.
