كۆمبۆنەك ل دۆر پشتەڤانیكرنا پڕۆژەیێ بلندكرنا پشكدارییا ژنان هاتە ئەنجامـدان
ب ئامادەبوونا د. عەلی تەتەر، پارێزگارێ دهۆكێ و شەمعون شلیمون ئیشۆ، جێگرێ پارێزگارێ دهۆكێ و هەژمارەكا دەڤەردار و ڕێڤەبەر و نوونەرێن ڕێكخراوان، دوهی 9/9/2026 كۆمبوونەك ل دۆر پشتەڤانیكرنا پڕۆژەیێ بلندكرنا ڕێژەیا پشكداریكرن و سەركردایەتیا ژنێن گەنج د بیاڤێ مرۆڤایەتی و پلاندانان و بەرسڤدانا كارەساتان دا ل پارێزگەها دهۆكێ هاتە ئەنجامدان.
پڕۆژە ژ لایێ ڕێكخراوا ناڤخۆیی یا (Better World) ب هەماهەنگی ل گەل ناڤەندا هەڤپشكا هەماهەنگییا قەیرانان ل وەزارەتا ناڤخۆ یا حكومەتا هەرێما كوردستانێ و ئیدارا پارێزگەها دهۆكێ و ڕێڤەبەرییا كۆچ و كۆچبەران و بەرسڤدانا قەیرانان ل دهۆكێ و جڤاتا بلند یا ئافرەتان ب پشتەڤانییا (UN WOMEN) ل سنۆرێ دەڤەرداریێن دهۆك و سێمێل و شێخان و بەردەڕەش و ئامێدییێ دهێتە ئەنجامدان.
پارێزگارێ دهۆكێ د پەیڤەكێ دا بەحس ل ڕۆل و شیانێن ژنان د ئەرك و كار و بیاڤێن جودا دا و گرنگییا هەڤسەنگییا كاری د دام و دەزگەهان دا كر، دیسا ئاماژە ب ڕۆلێ هەژمارەكا ژنێن بەرپرس و ڕێڤەبەر ل سنۆرێ پارێزگەها دهۆكێ دا، پاشی دەستخۆشی ل رێخەرێن پڕۆژەی كر و پشتەڤانییا ئیدارا پارێزگەهێ بۆ سەرئێخستنا پڕۆژەیێ ناڤبری دوپاتكر.
