مەكتەبا ڕێكخستنێ: شۆڕەشا ئیلۆنێ مەزنترین شۆڕەشا گەلێ كوردستانێ یە
مەكتەبا رێكخستنا پارتی ل بەهدینان ب هەلكەفتا ب هەلكەفتا 65 سالیا دەستپێكرنا شۆڕشا ئیلۆنا مەزن پەیامەك بەلاڤكریە و تێدا هاتیە: شۆڕەشا ئیلۆنا مەزن ل ژێر ڕێبەریا بابێ رۆحیێ نەتەوا كورد، بارزانیێ نەمر، دەستپێكر و بوو وەرچەرخانەكا مێژوویی و ئێك ژ كاریگەرترین قووناغێن دیرۆكا سیاسی و نەتەوەیی یا گەلێ مە.
ئاشكرا ژی كر، دەسەلاتدارێن ئیراقێ دژایەتیا مافێن گەلێ مە كر، لەو بەرامبەر وێ سیاسەتا چەوت و بكارئینانا چەكی، گەلێ كورد ژ بلی بەرگریێ چو بژاردەیێن دی ل پێشیێ نەمان، گەلێ مە چەكێ مەردینیێ هەلگرت و ل 11ی ئیلۆنا 1961 شۆڕەشا ئیلۆنا مەزن ڕێبەریا بابێ رۆحیێ نەتەوا كورد، بارزانیێ نەمر، دەستپێكر.
د پەیاما مەكتەبا رێكخستنێ دا هاتیە: «شۆڕەشا مەزنا ئیلۆنێ شكەستنا دەروونی یا تاكێ كورد و كوردستانێ د ڕەهەندێن بەرژەوەندی و بڕیارێن نیڤدەولەتی دا بۆ دەرفەت و باوەری ب خۆبوونێ گوهۆڕی و شكەستن و بێ ئۆمێدی، ب رێیا بەلاڤكرنا هشیاریا هزری و هشمەندیا نەتەوەیی و گیانێ بەرخودانێ، بەرەڤ ڕابوون و سەركەفتنێ ڤە بر، شۆڕەشا ئیلۆنێ هەر زوو جهێ خۆ د دل و دەروونێ تەڤایا نیشتمانپەروەرێن گەلێ مە دا چێكر و قووناغەكا نوو ژ خەبات و تێكۆشان و دامەزراندنا سیستەمێ بڕێڤەبرن، پەروەردە، ساخلەمی، ڕاگەهاندن، یاسایی ل دەڤەرێن ڕزگاركری دەستپێكر، دیسا ب دەهان داستانێن شكۆمەند و سەركەفتێ تۆماركرن».
ئاشكرا ژی كریە كو شۆڕەشا ئیلۆنێ ب تنێ شەڕەكێ چەكداری نەبوو، بەلكو بزاڤەكا جەماوەری یا گشتگیر و شۆڕەشەكا جڤاكی، ڕەوشەنبیری، سیاسی و ڕێكخستنی بوو، كو شییا هەموو چین و توێژێن جڤاكی ژ هەموو دەڤەر و پارچەیێن كوردستانێ ل دەوربەوەرێن ئارمانجەكا نەتەوەیی و ڕێبەریەكا ئێكگرتی كۆم بكەت. ب بەرخودان و خۆڕاگریا پێشمەرگەیێن قارەمان و ب پشتبەستن بە ئیرادەیا پۆلایین یا خەلكێ كوردستانێ و خوینا پاكا شەهیدان و ڕێبەری و كاریزمایا بابێ رۆحیێ نەتەوەیا كورد بارزانیێ نەمر، هیڤی و ئومێدێن ئازادیێ و ژیانەكا سەرفەراز بۆ گەلێ كوردێ ستەملێكری ڤەگەڕاندەنەڤە و سەلماند كو دۆزا ڕەوایا گەلێ كورد ب هێز و سەركۆتكرنێ چارەسەر نابیت.
د پەیاما مەكتەبا رێكخستنا پارتی دا هاتیە: «د ڤی یادا پر شكۆداردا و پێخەمەت پاراستنا دەستكەفتێن شۆڕەشێن ئیلۆن و گولان و سەرهەلدانێ و پاراستنا ئارامی سەقامگیریا كوردستانێ، دەربازكرنا كاودانێن دەڤەرا ڕۆژهەلاتا ناڤین كەتیە تێدا، دوپاتیێ ل كارا كارنا دەزگەهێن شەرعی و دەستووریێن هەریما كوردستانێ دكەین و پێداگیریێ ل سەر تەبایی و پێكڤەكاركرنێ ل گەل تەڤایا هێز و لایەنێن سیاسی یێن هەرێما كوردستانێ دكەین، دیسا رۆلێ كارێزمایی یێ بابێ ڕۆحیێ گەلێ كورد و هێمایێ خەبات و بەرخودانا گەلێ كوردستانێ بارزانیێ نەمر ب بیردئینین. سەرێ ڕێز و نەوازشێ بۆ شەهیدێن شۆڕەشا ئیلۆنێ و تەڤایا شەهیدێن بزاڤا ڕزگاریخوازیا گەلێ كوردستانێ و سەر كاروانێ شەهیدان بارزانیێ نەمر و كاك ئدریسێ جوانەمەگ دچەمینین».
