مافێ من هاتییە خوارن
زنار تۆڤی
میدیاكار و سینەماكار (رەزوان خۆدامی) كو خەلكا باژێرێ سنە یە ل رۆژهەلاتێ كوردستانێ، د دیدارەكێ دا بۆ رۆژنامەیا ئەڤرۆ گۆت: د ژیێ (13) سالیێ دا من دەست ب كارێ راگەهاندنێ كرییە و من وەكو پێشكیشكارا تەلەڤزیۆنی ژی كاركرییە، پشتی هنگی من دەست ب كارێ سینەمایێ كر و هەتا نوكە من ڕۆلێ سەرەكی د چەندین فلمێن درێژ دا گێڕایە، هەروەسا ئەز ئەكتەرا سەرەكی مە د فلمێ درێژ یێ ب ناڤێ (دووماهی ستران) دا، بەلێ ناڤێ من د پشكا ماركیتینگ و ریكلاما وی فلمی دا نە هاتییە، هەروەسا چ پارە ژی وەكو موچە یان ژی ژبەر وی ڕۆلێ من تێدا گێڕای من وەرنەگرتینە، ئەو فلمە نێزیكی (70) خولەكان یێ درێژە، ب رەنگەكێ گشتی سێ ئەكتەران پشكداری تێدا كرییە و ئەز ئەكتەرا سەرەكی مە د وی فلمی دا، هەروەسا چیرۆكا وی فلمی ل سەر هندێ یە، كچەكێ دڤێت ببیتە سترانبێژ، بەلێ برایێ وێ ناهێلیت ئەو كچە سترانان بێژیت و تووشی كێشەیان دبیت، ب گشتی ئەو فلمە بەحسێ مافێ ژنێ دكەت.
هەروەسا گۆت: شاباز زمانی ب تنێ وەكو سترانبێژەك د وی فلمی دا پشكدار بوویە، پاشی وی ئەو فلمە ب ڕەنگەكێ دارای كرییە، ب مخابنی ڤە، هەموو مافێن مەعنەوی و هونەری یێن وی فلمی بۆ خۆ داناینە، لەوما دبێژم مخابن بۆ جڤاكەكێ هونەری كو وەسا دزانیت هونەر ب پارە دهێتە كڕین و هونەری بكریت، دیسان مخابن بۆ میدیایێن باشورێ كوردستانێ كو زێدەباری چەندین جاران ئەز ئاخفتم و من پەیوەندی ب وان كر، وان چ پشتەڤانی ل من نەكر، لەوما دبێژمە ڤە، كو هونەر و مافێ هونەرمەندان ب پارە ناهێتە كڕین و مافێ من ژی هاتییە خوارن.