د كهمپێن تهنگ دا، هیڤیێن مهزن دژین
عهبدولسهلام شێخ
د مێژوویا ئهنفالێن گهلێ كورد دا برینهكا ڤهكریه و چ جارا ساخ نابێت . بهلێ دهرسهكا دی د مێژوویا خوودا هاته نڤێسین، ڤهگوهاستن ژ نهخۆشی و نههامهتیێن چادران بۆ خانی و شهقێن تهنگ و سارد ل كهمپا دیاربهكرێ (ئامهدێ) ل وێرێ ئازادی تێدا هاتبوو زیندانكرن و ژیان لێببوو ههناسهدانهكا ب زووری.
ژیانا بهردهوام د ناڤ چادران دا ل بن باران و ساردییا دهشتێ، تشتهك وهختی بوو، بهلێ گۆڕینا وان بۆ شهقێن نوی نیشانا دهستپێكرنا قۆناغهكا دی یا زیندانكرنا ب گشتی بیه. ئهڤ شهقه ل سهر شێوازهكا سهربازی و ئهمنی هاتبوونه دروستكرن. دهوروبهرێن كهمپێ ب تێلێن دڕ و سیمێن راچاندی ب توندی هاتبوونه دهورهدان . چاڤدێریهكا دژوار ل سهر ههبوون، ژ لایهكێ پاسهوان چهندرمه ژ لایێ دیڤه قهرهقۆڵێن پۆلیس و ئاسایشێ شهڤ و ڕۆژ زێرهڤانی ل سهر تهڤگهرا ئهنفالكراوان دكر.
ئهو شهقێن هاتبوونه دهستنیشانكرن، ژ سێ قاتا پێكدههاتن. ههر قاتهك ژ دو داهێرا (شهقهیێن بچووكتر) و ههر داهێرهك ژی ژ دوو ژوور، هۆل، حهمام و تهوالێتهكێ دهستپێدكر . بهلێ ئهڤ شوێنه تێرا زۆرییا رێژهیا ژمارهیا خهلكێ نهدكر.
سهختیا ژیانێ و دهردهسهری ل ناڤ شهقان دا
ژ بهر زۆرییا ژمارهیا كهس و سهرۆك خێزانان ل كهمپا دیاربهكرێ و كێماسییا جهێ، تێكلیهكا مهزن دروست ببوو. ب ناچاری د ههر داهێرهكێ دا ٣ بۆ ٤ مال خێزان تێدا دژیان. ئهڤه ببوو ئهگهرا تهنگاڤیا گهلهك ب ئازار و سهخت.
نان و خوارن ب زۆری و ب كێماسی دهاته دابهشكرن . ئهگهر ڕۆژهكێ نان نههاتبا، وی ڕۆژێ هیچ نان پهیدا نهدبوو و خێزان د برسیاتیێ دا دمان.
كهلوپهلێن ناڤ مالێ ب سادهترین شێوه دهاتن رازاندن، زڤستانا ئامهدێ سهرمایهكا زۆر ڕهق و ب دژوار ل گهل خۆ دئینا. د ناڤ وان ژوورێن چۆل و سارد دا، ڕووبهڕووبوونا سهرما ئامهدێ بێ كهلوپهلێن گهرمكرنێ ئهشكهنجهیهكا ڕۆژانه بوو.
ئازادییا گرتی یا كهمپا دیاربهكرێ نه فههما پهناگهههكا مرۆڤایهتیێ، بهلكۆ فههما زیندانهكا مهزن ههبوو. ب هیچ ڕهنگهكێ رێپێدان بۆ هاتن و دهرچوون ژ كهمپێ بۆ ناڤ بازاڕی و ناوچهیێن باژێری نهبوون. مرۆڤ ل وێرێ تنێ ژ بۆ مانێ دژیان، بێی كو چ مافهكێ سهرهتایا مرۆڤایهتی یان ئازادییا ههژی ههبیت.
ئهڤ قۆناغا مێژووی ل كهمپا دیاربهكرێ، وهك دیدهڤانهكا زیندی ل سهر ئیرادهیا مانا خهلكێ د ناڤبهرا سێ دهرگههێن برسیاتی، سهرما، مهیدانا تهنگ ل زیندانێ دا دمینیتهڤه.