دو ڕاهێنەرێن پارێزگەهێ پلەدارییا جیهانی وەرگرت
قەیس وەیس
ب فەرمی هەردو ڕاهێنەرێن یانەیا دهۆكێ بۆ یارییا پایسكلان تارق سەعید و شڤان ئەكرم چوونە د ناڤ پلەدارییا جیهانێ یا ڕێزبەندییا ڕاهێنەران، پشتی د خولەكا تایبەت دا بۆ ڕاهێنەرێن هەلبژارتیێن ئیراقێ و یێن یانەیان ب سەركەفتیانە ب دووماهی ئینایی و باوەرنامەیا نێڤدەولەتی وەرگرتین، ئەوا 30 ڕاهێنەرێن ئیراقی و كوردستانی پشكداربووین كو ژلایێ فدراسیۆنا یارییا پایسكلان ڤە هاتییە ڕێكخستن.
لدۆر ڤێ یەكێ و گرنگییا خولێ تارق سەعید ڕاهێنەرێ یانەیا دهۆك و هەلبژارتیێ ئیراقێ بۆ ئەڤرۆ گۆت: پێخوەشحالین ئەم دو ڕاهێنەرێن پارێزگەهێ دناڤ خولێ دا پشكداربووین كو دهێتە هژمارتن ئێكەم جارە ل سەر ئاستێ ئیراقێ دهێتە ڕێكخستن و مەرەم ژی پێ ئەوە ڕاهێنەر پلەدارییا جیهانی وەربگریت وەكو هەر ڕاهێنەرەكێ دی یێن وەلاتێن جیهانێ و دووڤ ئەنجامێن هەلبژارتی و یانەیا وی ژلایێ فدراسیۆنا ڤێ یاریێ یا جیهانی بهێتە باوەریپێكرن و پلەداركرن، ئەڤ خولە ژلایێ وانەبێژنێ نێڤدەولەتی بەرنیاس یێ ئیرانی ئۆمێد سیراجی ل بەغدا هاتبوو دانان كو ب شێوەیێ تیۆری و پراكتیكی چەندین یاسایێن نوو یێن فدراسیۆنا جیهانی و ڕێنما و سیستەمێ نوو یێ بڕێڤەبرنێ.
ژلایەكێ دووڤە ناڤهاتی گۆت: ئێك ژ گرنگترین خول بوو هاتییە ڤەكرن و گەلەك یا فەر بوو، ژبەركو هەر پێشهاتەكێ نوو مە وەرگرت، دیسان پێكڤەگرێدانەكا سیستەمی دگەل ڕاهێنەرێن وەلاتێن دی ڤە هاتییە گرێدان، هەروەسان دێ بیتە ئەگەرەك زێدەتر ئاستێ خوە پێشبێخین پێخەمەت بكەڤینە د خزمەتا پێشكەڤتنا ڤێ یاریێ، ڕێژەیا 30 ڕاهێنەران ژی بەلگەیە ل سەر گرنگییا وێ و مفا وەرگرتنا هەر پێزانینەكا زانستی، لدووڤ تەكنەلۆژیا سەردەم زێدەباری تەكتیكێن بەریكانەیان و شرۆڤەكرنا هەڤڕكێ خوە و چاوانییا سلامەتییا یاریزان و ڕاهێنانێن زانستێ دەرۆنی، ئەڤە هەموو خالێن سەرەكی بوون جهێ مفایێ بوون.