هیڤیدارین د زووترین دەم دا خەلكێ مە ڤەگەڕیتە سەر گوندێن خوە
لژنەیا ئەمنی یا جڤاتا پارێزگەها نەینەوایێ دەنگۆیێن بەرهەڤییا گرۆپێن چەكدارێن شنگالێ بۆ ڕادەستكرنا چەكێن وان ڕەتكرن و، ڕاگەهاند، هەتا نوكە چو پێنگاڤەكا كریاری بۆ وێ مەبەستێ نەهاتییە هاڤێتن و پتر ژ چار هزار چەكدار ل دەڤەرێ ماینە.
محەمەد جاسم، سەرۆكێ لژنەیا ئەمنی ل جڤاتا پارێزگەها نەینەوایێ، ڕاگەهاند، ئەو دەنگۆیێن باس ل بەرهەڤییا گررۆپێن چەكدارێن دەڤەرا شنگالێ بۆ ڕادەستكرنا چەكێن وان دكەن دوورن ژ ڕاستیێ و، ل مەیدانێ دا چو پێنگاڤەكا كریاری نەهاتییە هاڤێتن.
سەرۆكێ لژنەیا ئەمنی ئاماژە ب بزاڤێن بەری نوكە كر و، گۆت، د سەردەمێ كابینەیا محەممەد شیاع سوودانی دا نێزیكی دو هزار چەكداران ناڤێن خوە بۆ ڕادەستكرنا چەكی تۆمار كربوون، لێ ئەو پرۆسە سەركەفتی نەبوو. ڕۆهنكر ژی ، ل دووڤ پێشبینییان د نوكە دا پتر ژ چار هزار چەكدار ل دەڤەرا شنگالێ هەنە.
محەمەد جاسمی دوپاتی ل سەر كێشەیا سەرەكی یا نوكە یا دەڤەرێ كرەوە وڕاگەهاند، نوكە پرسا هەرە گەرم و ب لەز دانانا قایمقامەكێ نوو یە بۆ قەزا شنگالێ.
ئەڤە د دەمەكێ دایە، ڕۆژا سێشەمبی، ئێكێ ئەیلۆنا 2026، ل كۆمبوونەكا ئەمنی ب سەرپەرشتییا عەبدولئەمیر شەممەری، ڕێڤەبەرێ نڤیسینگەها فەرماندەیێ گشتیێ هێزێن چەكدارێن ئیراقێ، ڕەوشا شنگالێ و ئاڤەدانكرنا قەزایێ هاتبوو گەنگەشەكرن.
میدیایێن ئیراقی ئاماژە ب وێ چەندێ كربوو، بەغدا ب نیازە نێزیكی دو هزار چەكدارێن نێزیك ژ پەكەكێ كو ل شنگالێ نە، بێخیتە سەر هێزێن ئەمنی، كو ئەڤە جودا دبیت ژ هێزێن حەشدا شەعبی.
ڕێككەڤتنا شنگالێ ل چریا ئێكێ یا سالا 2020 د ناڤبەرا حوكمەتا هەرێما كوردستانێ و حوكمەتا فیدڕالییا ئیراقێ ب سەرپەرشتییا نەتەوەیێن ئێكگرتی هاتبوو ئیمزاكرن. ئارمانجا سەرەكییا ڕێككەڤتنێ ئاساییكرنا ڕەوشا قەزایێ و دەركرنا هەموو گرۆپێن چەكدارە ژ ناڤەندا باژێڕی، د ناڤ وان دا پەكەكە و حەشدا شەعبی و هێزێن دی، بۆ وێ چەندێ كو ب تنێ هێزێن پۆلیسێن فیدڕالی و ئاسایشا نیشتمانی كۆنتڕۆلا دەڤەڕێ بكەن. لێ ب جهئینانا ڤێ ڕێككەڤتنێ ل دەمێ چەند سالێن بۆڕی دا تووشی بەربەستەكا مەزن بوویە.
پشكەك ژ گرۆپێن چەكدارێن ناڤخوەیا شنگالێ وەك (یەبەشە) و هندەك ژ گرۆپێن حەشدا شەعبی، ڕێككەڤتن ڕەتكریە و بەرهەڤ نینن دەڤەرێ چۆل بكەن. مانەڤا ڤان هێزان بوویە ئەگەرێ تێكچوونا ڕەوشا ئەمنی و ڕێگرییەكا مەزنە ژی ل پێشبەری زڤڕینا هزاران ئاوارەیێن ئێزدی بۆ سەر جهێن خوە و دەستپێكرنا پرۆسەیا ئاڤەدانكرنا شنگالێ. ل هەمان دەم دا ژبەر ململانێیان هەتا نوكە ئیدارەیەكا نوو بۆ قەزایێ نەهاتییە دروستكرن، ڤێ چەندێ ژی وەكر كو پرسا دانانا قایمقامەكێ نوو و ئیدارەیەكا یاسایی بۆ شنگالێ ببیتە ئێك ژ بابەتێن ئالۆز و هەستیار د ناڤبەرا ئالییێن پەیوەندیدار دا.
