ژ بەر هەستیارییا قووناغا ئاشتیێ گەلەک تشت ناهێنە ئاشکرا کرن
چاڤدێرەکێ سیاسی دیار دکەت، نها رەوشا دەڤەرێ گەلەک هەستیارە و بەرپرسێن تورکیا ژی دترسن کو هندەک هێز ئاستەنگان ل هەمبەر قووناغا ئاشتیێ دروست بکەن و ژ بەر هندێ ژی گەلەک تشت بۆ رایا گشتی ناهێنە ئاشکرا کرن.
د. وەهاب جوشکون بسپۆرێ کاروبارێن سیاسی دیار کر، رەوشەکا گەلەک ئالۆز ل دەڤەرێ هەیە و بەرپرسێن تورکیا ژی گەلەک دترسن کو هندەک وەلاتێن دەڤەرێ ئالۆزیان دروست بکەن و ببنە ئاستەنگ ل هەمبەر قووناغا ئاشتیێ و ژ بەر ڤێ یەکێ ژی گەلەک تشت ب نهینێ دهێنە ئەنجام دان و بۆ رایا گشتی ژی ناهێنە ئاشکرا کرن، دوهی ژی کۆمبوونەک هاتیە کرن و تێدا جێگرێ ئەردۆغانی دیار کریە، دڤێت گەلەک تشت نەهێنە ئاشکرا کرن و گرنگە هەموو سازیێن دەولەتێ ب رەنگەکێ هەستیار کارێ خوە ئەنجام بدەن و هەست ب بەرپرسیاریا خوە یا دیرۆکی بکەن و رێ نەدەن هندەک هێز ل دەڤەرێ ئاستەنگان ل هەمبەر قووناغا ئاشتیێ ل تورکیا دروست بکەن.
ناڤهاتی ئەو یەک ژی دیار کر، تورکیا دڤێت بابەتێ پرسا پەکەکێ هەتا دووماهیا ئەڤسالە ب تەمامی چارەسەر بکەت و پاشی ژی دەست ب چاکسازیێن سیاسی و قانوونی ل تورکیا دهێنە کرن، چونکی بەرپرسێن تورکیا باش دزانن هەکە کورد نەگەهنە مافێن خوە دێ جارەکا دی رەوشا ناڤخوەیی یا تورکیا ئالۆز بیت، ژ بۆ ڤێ یەکێ ژی دبیت پشتی سەرێ سالێ بابەتێ دستوورەکێ نوو بۆ تورکیا بکەڤیتە رۆژەڤێ و ئەو یەک ژی دێ بیتە ئەگەرێ گوهۆڕینێن نوو ل تورکیا و گۆت: (پێدڤیا تورکیا ب دستوورەک نوو و دیموکراتی هەیە، دستوورێ نها بخوە بوویە ئاستەنگ ل هەمبەر چارەسەرکرنا پرسا کوردی، دڤێت یا پێدڤی بۆ چارەسەرکرنا پرسا کوردی ل تورکیا بهێتە کرن، ژ بەر ڤێ یەکێ ژی ئەردۆغان و هەڤالێن وی د رژدن هندەک تشتان ب نهێنی ئەنجام بدەن و رێ نەدەن هندەک هێز ئاستەنگان دروست بکەن، چونکی چەندین وەلاتێن دەڤەرێ ناخوازن شەڕی ل تورکیا ب دووماهی بهێت و ئەو وەلاتە دشێن ئاستەگان دروست بکەن).
محەمەد گولتەکین چاڤدێرێ سیاسی ژی دیار کر، پتر ژ ٨٠٪ خەلکێ تورکیا پشتەڤانێێ ل قووناغا ئاشتیێ دکەن، خەلک ل دژی شەڕی نە، ئەو یەک ژی گەلەک گرنگە و پشتەڤانیەکا گەلەک مەزنە بۆ حوکمەتێ، ژ بەر ڤان خالان ژی ئەردۆغانی دڤێت ب هەر رەنگێ هەی قووناغا نها بگەهیتە ئەنجامەک گەلەک باش، کارێن گەلەک باش ژی هەتا نها هاتینە کرن، لێ ژ بەر هەستیاریا قووناغا و ئاژاوەگەریێ گەلەک تشت ب ئاشکرا ناهێنە کرن، لێ بزاڤێن ل پشت پەردەیی و ئاخڤتنێن ئەردۆغانی ژی نیشا ددەن کو حوکمەتا تورکیا و ئالیێن پەیوەندیدار بەردەوام یێ کار دکەن دا بشێن پرسا شەرێ چەکداری ل تورکیا ب دووماهی بینن و بۆ هەتا هەتای چەک بهێنە بێدەنگ کرن.
چاڤدێرێ سیاسی ئەو یەک ژی دیار کر، کورد ب سالانە ل تورکیا داخوازا ئاشتیێ و چارەسەریێ دکەن، کورد ل دژی شەڕی نە، ب هزاران گوندێن کوردان هەتا نها وێران بووینە، کوردان دڤێت شەڕ نەمینیت دا ئەو بشێن دەڤەرێن خوە ئاڤەدان بکەن و دەست ب ژیانەکا نوو بکەن، شەڕی زیانێن گەلەک مەزن گەهاندنە کوردان، ب هزاران لاوێن کورد بوونە قوربانی، ئانکۆ ب کورتی کورد پشتەڤانێن قووناغا ئاشتیێ نە، لێ د هەمان دەمی دا کورد ل تورکیا چاڤەرێ نە کو ب کریاری کار بۆ چارەسەرکرنا پرسا کوردی بهێتە کرن، ژ بەر ڤێ یەکێ ژی دڤێت پشتی شەڕ ب تەمامی نەما و چەک ژی هاتنە ژناڤبرن، دەولەتا تورکیا دەست ب چاکسازیێن قانوونی و سیاسی بکەت، دڤێت کورد بگەهنە مافێن خوە.
ل ئالیێ دی گەلەک ژ نڤیسەر، ڤەکۆلەر، رۆژنامەڤان و چاڤدێرێن سیاسی ل تورکیا و باکورێ کوردستانێ ژی داخواز ژ دەستهەلاتا تورکیا دکەن کو ژ بۆ چارەسەرکرنا پرسا کوردی یا پێدڤی بهێتە کرن، دڤێت ئاستەنگێن ل هەمبەر پەروەردەیا ب زمانێ کوردی ل تورکیا نەمینن و هەروەسا دڤێت سیاسەتا قەیوومان ژی ب دووماهی بهێت، گرنگە هەڤسەرۆکێن باژێرڤانیان ئەوێن کو بەری نها ژ بەر هندەک ئەگەران ژ کارێ وان هاتبوونە دوورخستن د زووترین دەم دا ڤەگەرنە ڤە سەر کارێن، هەروەسا دڤێت سەلاحەدین دەمیرتاش و هەڤالێن وی بهێنە ئازاد کرن، چونکی ئەو یەک دێ بیتە ئەگەر باوەریا کوردان ژی ب قووناغا نها بهێت، چونکی نها کورد دو دلن و گەلەک کەس وەسا هزر دکەن پشتی هەلبژارتنان ئەردۆغان و هەڤالێن وی قووناغا نها ب دووماهی بینن، ئانکۆ هێشتا ژی باوەریا کوردان ب تەمامی ب دەولەتێ نینە و ژ بەر ڤێ یەکێ ژی دڤێت ب کریاری هندەک تشت بهێنە کرن.
ل گۆر باوەریا چاڤدێرێن سیاسی تورکیا نەچارە ئێدی پرسا کوردی چارەسەر بکەت، چونکی رۆژهەلاتا ناڤین بەر ب گوهۆڕینێن مەزن ڤە دچیت، کورد پتر ژ هەر دەمەکێ هشیارن و ئێدی کورد قەبوول ناکەن بێی ماف بژین و دڤێت ل تورکیا ئێدی سەرەدەریا وەلاتیێن پلە دو ل گەل کوردان نەهێتە کرن، بەری نها هەردەم بەرپرسێن تورکیا دیار دکرن کو ژ بەر شەڕی ئەو نەشێن ژ بۆ چاەرسەرکرنا پرسا کوردی یا پێدڤی بکەن، نها شەر نەما و د راستی دا چو بەهانەیێن دەولەتا تورکیا ژی نەمان و دڤێت پشتی سەرێ سالێ تورکیا دەست ب قووناغەکا نوو بۆ چارەسەرکرنا پرسا کوردی بکەت و گرنگە ب جهێ قووناغا تورکیا بێ تیرۆر پەیڤا قووناغا ئاشتی و برایەتیێ بهێتە بکارئینان، ئەو یەک دێ کاریگەریا خوە یا گەلەک باش ژی هەبیت.
