عۆد پارچەیەکە ژ دلێ من
بێوار حەمدی:
مۆزیکژەنێ گەنج (رامان هیشام) کو بۆ دەمێ شەش سالانە ئامیرێ عودێ دژەنیت د دیدارەکێ دا بۆ بەرپەرێ هونەری یێ ڕۆژناما ئەڤرۆ گۆت: ژ دەسپێکێ من ژ خۆلێن فێرکرنا مۆزیکێ دەسپێکر و ل سەر دەستێ هونەرمەندێ مەزن «سەمیر زاخویی» فێربووم، لێ پشتی بۆ من دەرفەت پەیدابوویی بۆ جارا ئێکێ ل سالا 2022 چوومە سەر دەپێ شانۆیێ و هوسا بەردەوام بووم.
ناڤهاتی د بەردەوامیا ئاخفتناخوە دا گۆت، ل سالا 2024 من ناڤێ خوە ل پەیمانگەها هونەرێن جوان تۆمارکر ل پشکا مۆزیکێ و نوکە ژی قوتابیمە ل قوناغا سێیێ، عود پارچەیەکە ژ دلێ من و وەتەرێن وێ ژی پارچەیەکن ژ دەمارێن لەشێ من، ژبەرکو ل سەر تەوەرێن عودێ هەست دبنە هونەر.
ناڤهاتی ئەو چەندە ژی دا زانین، کو نوکە ئەندامم دگەل تیپا «کورد ڤوکس» ئەڤ تیپە بۆ پتر پێشخستنا کارێ هونەری و ئاڤاکرنا کەسایەتی یە و ئەز وەکو مامۆستایێ مۆزیکێ ژی کاردکەم ل بنگەهێ وەرزش و هونەری و لاوان ل زاخۆ و ئارمانجا مەژی ئەوە شیانێن قوتابیان ب هێزتر لێ بکەین داکو ببنە مۆزیکژەنێن ژێهاتی و ل پاشەرۆژێ خزمەتا وەلاتێ خوە بکەن.
ل دووماهیێ ژی ناڤهاتی گۆت: ب مخابنی ڤە ژیانا مۆزیکژەنان یا تژی ئاستەنگە، ژ بەر کو هیچ داهاتەکێ باش وتایبەت نینە و چو بزاڤ ژی ناهێنەکرن داکو مۆزیکژەن ژی ببنە خودان داهاتەکێ باش، لێ حەزژێکرنا من بۆ هونەری وەکریە کو ڤان هەموو ئاستەنگان دەربازبکەم داکو بشێم بگەهمە هەمی هیڤی و ئارمانجێن خوە.
