وەزارەتا خواندنا بلند: نابیت قستێ خواندنێ بەری پەسەندكرنا ناڤێ قوتابی بهێتە وەرگرتن
هەولێر، قائید میرۆ:
وەزارەتا خواندنا بلند و ڤەكۆلینێن زانستی ئاشكراكر، نابیت بەری پەسەندكرنا ناڤێن قوتابیان ژ لایێ وەزارەتێ ڤە، قستێ كرێیا خواندنێ ژ لایێ زانكۆ و پەیمانگەهێن ئەهلی ڤە ژ قوتابیان بهێتە وەرگرتن و پێدڤیە پێگیریێ ب رێنومایێن وەزارەتێ بكەن. عەباس ئەكرەم، پەیڤدارێ وەزارەتا خواندنا بلند بۆ رۆژناما ئەڤرۆ دیاركر، ل گورەی رێنومایێن وەزارەتا خواندنا بلند و ڤەكۆلینێن زانستی، پێدڤیە زانكۆ پەیمانگەهێن ئەهلی پێگیریێ ب پرۆسێسا وەرگرتنا قوتابیان بۆ خواندنا ئەڤ سالە بكەن، ل گورەی رێنومایێن وەزارەتێ و رێڤەبەریا خواندنا تایبەت قوتابی بهێنە وەرگرتن و گۆت: «مە ب نڤیسارا فەرمی هەموو زانكۆ و پەیمانگەهێن ئەهلی ئاگەهداركرینە، كو پێگیریێ ب مەرج و رێنومایێن وەزارەتێ بكەن بۆ وەرگرتنا قوتابیان».
عەباس ئەكرەم گۆت ژی: «نابیت ب چو شێوەیەكی قستێ خواندنێ ژ قوتابی بهێتە وەرگرتن، هەتا ناڤێ قوتابی ژ لایێ وەزارەتێ ڤە نەهێتە پەسەندكرن».
