ئاڕێشەیا ئاڤا ڤەخوارنێ ل دەڤەرداریا باتیفا دهێتە چارەكرن
زاخۆ، دلۆڤان هالۆ:
نزار جەعفەر، ڕێڤەبەرێ فەرمانگەها ئاڤا دەڤەرداریا باتیفا بۆ ڕۆژنامەیا ئەڤرۆ دیاركر كو ژبەر بەرفرەهبوونا باژێڕكێ باتیفا ئاڤا گوندێن گۆڤكێ و دێریشكێ و بەهنۆنێ دێ بنە سێ ژێدەرێن سەرەكی یێن ئاڤا ڤەخوارنێ بۆ وەلاتیێن دەڤەرداریا باتیفا.
ڕێڤەبەرێ فەرمانگەها ئاڤا دەڤەرداریا باتیفا گۆت: «بەری نوكە ب تنێ ئاڤا گوندێ دێریشكێ ژێدەرێ ئاڤا ڤەخوارنێ بوو، لەوما ئاڕێشەیا كێمبوونا ئاڤێ هەبوو، ل سەر ڕاسپاردەیا مەسرور بارزانی، سەرۆكێ حوكمەتا هەرێما كوردستانێ ڕازیبوون ل سەر دروستكرنا پڕۆژەیێ ئاڤا گوندێ گۆڤكێ هاتیەدان و هەتا وەرزێ زڤستانێ دێ ئاڤا گوندێ گۆڤكێ ژی كەڤیتە كاری».
گۆت ژی: «ب دروستكرنا ڤان هەر سێ ژێدەرێن ئاڤێ، ل زڤستانا ئەڤ سالە چو ئاڕێشەیێن نەبوونا ئاڤێ ل دەڤەرداریا باتیفا پەیدا نابن».
