ئـەڤـرۆ ڕێوڕەسمێن جـەژنـا جـەمـایـێ ل لالشێ دێ هێنە گێڕان
دهۆك، لەزگین جۆقی:
جەژنا جەمایێ، ئێكە ژ جەژنێن دێرینێن ئێزدیان، رێورەسمێن وێ بۆ دەمێ حەفت رۆژان ل پەرستگەها پیرۆزا لالشێ دهێنە گێڕان.
خواجە خەتاری، ئولدارێ ئێزدیان بۆ رۆژنامەیا ئەڤرۆ دیار كر، رێورەسمێن جەژنا جەمایێ ل پەرستگەها لالشێ دێ هێنە گێڕان و گۆت: «د ڤێ جەژنێ دا، هەر ئێزدییەكێ قەستا لالشێ بكەت، دڤێت د سەر پرا سەلاتێرا دەربازببیت و بچتە سەر حەودا كانیا سپی و دەست و چاڤێن خۆ ب ئاڤا وێ یا پاك و پیرۆز، پاك و تەمیز بكەت، هەروەسا دڤێت كانیا سپی و دەریێ قاپیێ و زمزمێ و سندرویكا شیخادی و بەرێ شباكێ و نیشانگەها شێخ فەخر (ئختیارێ مەرگەهێ) و مەزارگەهێ شێشمس و سەرەدانا مەزارگەهێن شێخ و پیرێن خۆ بكەت».
گۆت ژی: «ل هەموو ئێڤاریان سەما دهێتە كرن و قەول و قەسیدە دهێنە گۆتن، دیسا ل رۆژا پێنجێ ژ جەژنێ پەری دهێنە سواركرن و ل رۆژا شەشێ ژ جەژنێ رێورەسمێن قەپاغێ دهێنە گێڕان، ل رۆژا حەفتێ ژ جەژنێ بەرێ شباكێ دهێتە سواركرن».
زێدەتر گۆت: «ئەو كەسێن نە مۆركری ب ئاڤا كانیا سپی دهێنە مۆركرن و سەر دەریێن خاسا سماتێ چێدكەن و گۆڤەندا دەرێ كانیێ دهێتە گێڕان».
