15 سالە 19 پڕۆژەیێن وەبەرهێنانێ ل ئاكرێ نەهاتینە تەمامكرن
رەمەزان زەكەریا:
ل سالا 2011 هەتا نوكە 23 پڕۆژەیێن وەبەرهێنانێ بۆ ئاكرێ دەركەفتینە و هزار و 900 دۆنەمێن ئەردی ژ لایێ باژێرڤانیێ ڤە بۆ هاتینە تەرخانكرن، بەلێ هەتا نوكە ب تنێ چار پڕۆژە هاتینە بجهئینان.
ئەو پرۆژەیێن هاتینە بجهئینان ژی، گەلەك د بچوویكن و ل سەر ڕووبەرێ كێمتر ژ 10 دۆنەمان هاتینە بجهئینان، ژ وان 19 پڕۆژەیێن دمینن، د سێ پڕۆژەیان دا دوبارە كاری تێدا دەست پێكرییە و ل قووناغا دووماهیێ نە، 16 پڕۆژەیێن دی ژی پشتی 15 سالان هێشتا نەهاتینە تەمامكرن، هندەك پڕۆژەیان ب تنێ بەرێ بیناتێ بۆ هاتیە دانان و هندەكان ژی ب رێژەیێن جودا كار تێدا هاتییە كرن.
بلند ڕەزا، سەرۆكێ باژێرڤانیا ئاكرێ بۆ ئەڤرۆ گۆت: «ئەو پڕۆژەیێن هاتینە تەمامكرن، هەموو د سەردەمێ كابینەیا نەهێ دا بووینە، كو پێكهاتینە ژ مۆلەكێ و نەخۆشخانەیەكێ و دو پڕۆژەیێن بازرگانی».
ناڤبری گۆت ژی: «ئەم ل گەل دەڤەردارێ ئاكرێ كۆمبووینە و مە داخواز كرییە لایەنێن پەیوەندیدار بهێنە سەر خەت و ب هووری چاڤدێرییا تەمامیا پڕۆژەیان بكەن، هەر وەبەرهێنەرەكێ نەشێت پڕۆژەیێ خۆ تەمام بكەت، ژێ بهێتە وەرگرتن و بۆ وەبەرهێنەرەكێ دی بهێتە دان».
