هیڤیا وێ ئەوە جهەكێ مەزنتر ڤەكەت
عایشە عەجیب
ئەمەل بۆتانی، خانمەكا دەستڕەنگینا خەلكا باژێرێ زاخۆیە، ئەڤە پتر ژ (10) سالانە خوارنێن كوردی و شریناهیان چێدكەت و د دیدارەكێ دا بۆ رۆژنامەیا ئەڤرۆ دبێژیت: بەری نوكە من جهەكێ تایبەت هەبوو، خوارن و شریناهی لێ ئامادەدكرن، لێ ژبەر هندەك ئاستەنگان، ژوانا گرانیا كریێ من ئەو جه داخست و نوكە بتنێ ل مال كاردكەم و ب ڕێكا ئۆنلاین دفرۆشم.
هەروەسا گۆت: من گەلەك خۆلێن چێكرنا خوارن و شریناهیان بۆ هژمارەكا كچ و ژنان ڤەكرینە و نوكە گەلەك ژوان جهێن خۆ یێن تایبەت هەنە و بۆ خۆ كاردكەت، بۆ زانین ژبلی دهۆكێ خوارن و شریناهیێن ئەز چێدكەم بۆ گەلەك جهێن دی دهێنە ڕەوانەكرن، ژوانا باژێرێن (میسل و بەغدا) و خۆشحالم كو ب داهاتی بۆ من ژێ دهێت دشێم هاریكاریا مالا خۆ بكەم و داخوازا من ژوان خانمان ئەوە ئەوێن بێكار دمالێ دا هەكە حەزا كارەكێ هوسا هەبیت بلا بهێن كاربكەن و بلا ئاخفتنێن خەلكی بۆ خوە نەكەنە ئاستەنگ دا كو بشێن بەردەوامیێ بكارێ خۆ بدەن و دەرگەهەكێ رزقی بۆ خۆ و مالا خۆ ڤەكەن و هیڤیا من ئەوە جارەكا دی بشێم جهەكێ مەزنتر بۆ كارێ خۆ ل زاخۆ ڤەكەم و دەلیڤەیا كاری بۆ هژمارەكا كچ و ژنان ل دەف خۆ ببینم.