سروشت و فولكلۆر د كلیپەكێ دا كۆمكرن
رەمەزان زەكەریا
هونەرمەند (بورهان خۆشناو) نووترین سترانا خۆ ب ناڤێ مەستوورە ب شێوازێ ڤیدیۆ كلیپ بەلاڤكر، ئەو ستران پەیڤ و ئاوازێن وێ فۆلكلۆرن و هێمن حسێن كاری ئامادەكرن و دابەشكرنا مۆزیكێ بۆكریە و ژلایێ ئاكۆ عومەر ڤە كاری ئەندازیاریا دەنگی بۆ هاتییەكرن ل دەڤەرا بالەكایەتیێ ل گوندێ سەكران ڤیدیۆ كلیپ هاتییە تۆماركرن.
ناڤبری گۆت: د ڤیدیۆ كلیپێ دا سروشتێ دەڤەرا بالەكایەتیێ و ب تایبەتی گوندێ سەكران و پشكەك ژ چیرۆكا سترانێ پێك دئینیت دیمەنێن سروشتی دگەل دەنگ و مۆزیكا سترانێ هاتینە پێكڤە گرێدان دا كو بەرهەم بتنێ سترانەك نەبیت وێنەیەكێ كلتووری و سروشتی بیت ژ ژینگەهـ و ناسنامەیا كوردی و مە ب پشت بەستن ل سەر میراتێ فۆلكلۆری و بكارئینانا شیانێن هونەری یێن نوو كریە بزاڤكریە دەنگ و ڕەنگێ سترانا كوردی دگەل جوانییا سروشتێ كوردستانێ ب هەڤڕا پێشكێش بكەین و ب شێوازەكێ سەردەمیانە بگەهینینە بینەر و گوهدارێن خۆ.