هۆكارێن نەجێگیرییا ئاستی
ئیحسان حەسەن
گەلەك جاران ئەز دبینم دناڤا داخویانیێن حەژێكەر و پشتەڤانێن تیمێن مە یێن گوردستانێ دا، چ ئەوێن پشكدار دخولێن ئیراقێ دا، دیسان یێن كوردستانێ، دەمێ بەحسێ نەجێگیریا ئاستێ تەكنیكی یێن تیمێن خوە دكەن، هەردەم دخوازن كو تیمێن وان ڤیان لسەر هەین ئاستەكێ باش پێشكێش بكەن، چونكو وەرزشێ هووسا نیشامەدا یە چ تیم نینن بشێن دهەموو خولەك و یارییەكێ دا ل ئاستێ خوە یێ بلند بمینن، دیارە هژمارەكا هۆكاران هەنە دبنە ئەگەرێ نەسەقامگیری و نەجیگیریا ئاستی تیمێن وەرزشی، یا ژهەمیا گرنكتر و سەرەكی هنگاڤتنێن یاریزانان كو كاریگەریێ لسەر ئاستێ تیمێ دكەن ب تایبەت دەمێ هژمارەكا یاریزانێن سەرەكی تووشی هنگاڤتنێ دبن، بۆ ماوەیەكێ درێژ ژتیمێ دووردكەڤن دبیتە ئەگەرێ هندێ كو بوشاییەكا مەزن یا تەكنیكی پەیداببیت وكارتیكرنێ ل ئەنجامان بكەت، یا دویێ دەمێ گوهۆرین دپێكهاتییێ تیمێ دا ب ئەگەرێن جودا پەیدادبن، ژبەر كو یاریزانێن نوو ئەوێن ژجهێ یەدەكان دهێنە دناڤا یاریێ دا، پێدڤی ب دەمی نە تا كو خوە دگونجینن دگەل رەوش و هەڤالێن خوە د تیمێ دا، یا سێیێ خشتێ یاریان ئەگەر یێ بزحمەت و توند بیت و هند دەرڤەتا بێهنڤەدانێ نەبیت ژبەر هاتن و چوونان دناڤا باژێران دا، دبیتە ئەگەرێ مانیبوونا یاریزانان و كێمبوونا شیانێن وان یێن جەستەیی و هزری، یا چارێ فشارا دەرونی لسەر یاریزانان چ ژلایێ پشتەڤانێن تیمێ ڤە، چ ژلایێ كارگێریا وێ تیمێ ژبۆ تۆماركرنا ئەنجامێن دلخوشكەر، هەروەسا فشارا سەركەڤتنێ یان ژ دەستدانا خالێن یاریێ ئەگەرەكێ دی یە، یا پێنجێ بریارێن دادڤانان یێن نە دروست و شاشیێن وان كاریگەریەكا ئێكسەر لسەر ناخ و دەرۆنێ تیمێ دروست دكەت، هندەك جاران هێز و زاخا یاریزانان لاۆاز دكەت، یا شەشێ رەوشا دارایی یا نەباش ئەوا گەلەك جاران تیمێن مە دناڤا هەڤركیێن خولێ دكەڤنێ هۆكارەكێ دیە، كو یاریزان ئەو ئاستێ چاڤەرێكری نیشان نەدەن، ئەگەر ئەم بەحسێ هندەك ئەگەرێن دەرەكی ژی بكەن وەكو رەوشا كەشوهەوای، لاوازیا مەیدانێن یاریان و پربوونا یاریگەهان ژ پشتەڤانان، هەموو دبنە پشكەك ژ ڤی رەوشێ، ئەڤە تشتەكێ سرۆشتییە و پێدڤییە ئەم وەكو حەژێكەرێن وەرزشا كوردستانێ و پشتەڤانێن تیمێن كوردستانێ خوە تێبگەهینین كو ئەڤ نەجیگیریا ئاستی گەلەك یا ئاسایی یە و ل گورەی پێناسەیێن زانستی یێن وەرزشی، دهەمی خولێن وەرزشی یێن جیهانی دا رووددەت، مەزنترین یانەیێن جیهانێ تووشی ڤان قۆناغێن نە سەقامگیریا ئاستی دبن، ئاستێ تیمان لسەر كۆمەكا ئەگەران یا راوەستیایە، مرۆڤ نەشێت دهەمی حەفتی و یاریاندا پێشبینیا ئاستەكێ ئێكجار مەزن ژ تیما خوە بكەت، یا من دڤێت بێژم پێدڤییە هەموو لایەك چ پشتەڤان بن، یان ژی تیم و كارگێری بن، دەستێن ئێكودو بگرن و ب شێوەیەكێ گونجای رەفتارێ دگەل نەسەقامگیریا ئاستێ تیمێن خوە بكەن، دوور كەڤن ژ رەخنەیێن توند ب تایبەت ددەمێن نەخۆش دا، داكو قۆناغێن پشكداریێن خوە ب كێمترین زیان دەربازبكەن، بگەهنە وان ئەنجامان یێن كو ئەم هەموو ل پاشەرۆژێ شانازیێ پێ ببەین.
