جڤاتا نوونەران رازی نابیت لەشکرێ بیانی بھێتە عیراقێ
سەرۆکێ ھەڤپەیمانیا دیموکراتیا سڤیل ل عیراقێ دبێژیت چەندین دەڤەرێن عیراقی یێن کەفتینە د بن کونترۆلا تیرۆرستێن داعش دا و ب ھزاران وەلاتیێن عیراقی یێن دەربەدەر بووین و پێدڤیە رێ ب ھاتنا لەشکەرێن بیانی بھێتە دان کو وان دەڤەران ژ داعش ئازاد بکەن، د ھەمان دەمدا شارازایەکێ قانوونیێ عیراقی ب دوور دزانیت جڤاتا نوونەرێن عیراقێ رازیبوونا خوە ل سەر ڤێ پێنگاڤێ بدەت.
میسال ئالۆسی سەرۆکێ ھەڤپەیمانیا دیموکراتیا سڤیل ل عیراقێ بۆ ئەڤرۆ گوت” بەردەوام دەنگوباسێن دوورپێچکرنا یەکەیێن لەشکرێ عیراقێ ژ لایێ داعش و کەفتنا ھندەک دەڤەران د بن کونترۆلا وان دگەھیتە گوھێن مە و ژ ئەنجامێ ڤێ چەندێ ژی ب ھزاران وەلاتیێن عیراقێ یێن دەربەدەر دبن، لەوما ب پێدڤی و گرنگ دبینم ھێزێن لەشکرێن بیانی بھێنە دناڤ عیراقێ دا و وان دەڤەران ژ تیرۆرستێن داعش ئازاد بکەن”.
ل دۆر ھەلویستێ حەیدەر عەبادی سەرۆک وەزیرێن عیراقێ کو دیارکربوو ئەو ب چو شێوەکی نە ل گەل ھاتنا لەشکرێن بیانی یە بۆ ناڤ ئاخا عیراقێ و پێدڤیە سەروەریا عیراقێ بھێتە پاراستن، میسال ئالۆسی گوت” نزانم چ سەروەریە ئەو بەحس لێ دکەن؟ ب دیتنا من ھەر ژ رۆژا داعش مووسل و سەلاحەدین و چەندین دەڤەرێن ئەنبار کونترۆلکرین، سەروەریا عیراقێ یا ھاتیە ژ دەستدان”.
ناڤبری دیارکر کو ھێرشێن ئەسمانی یێن ھێزێن ھەڤپەیمانیا نێڤدەولەتی دژی تیرۆرستێن داعش کاریگەریا خوە نابیت بێ ھەبوونا ھێزێن لەشکری یێن بیانی ل سەر ئاخێ کو تمامکەر بیت بۆ ھێرشێن ئەسمانی و گوت” بۆ نموونە سەرەرای ھێرشێن ئەسمانی یێن توند ل سەر تیرۆرستێن داعش ل باژێرێ (ھیت) ل پارێزگەھا ئەنبار، لێ ئەو ھێرش نەبوونە ئەگەر کو ھیت نەکەڤیتە د بن کونترۆلا داعش دا، دیسا باژێرێ (کوبانێ) ل سووریێ ژی نموونەیە ل سەر ڤێ چەندێ کو سەرەرای ھەبوونا ھێرشێن ئەسمانی یێن بەردەوام ژ لایێ ھێزێن ھەڤپەیمانیا نێڤدەولەتی ل سەر تیرۆرستێن داعش ل دەوروبەرێن وی باژێری، لێ وان ھێرشان نەشیان رێ ل کونترۆلکرنا داعش بۆ چەند دەڤەریان د ناڤ کوبانێ دا بگریت”.
ژ لایێ خوەڤە تارق حەرب شارەزایێ قانوونیێ عیراقی ل دۆر ڤێ پرسێ دبێژیت” ھاتنا ھێزێن لەشکری یێن وەلاتێن ھەڤپەیمانیا نێڤدەولەتی بۆ ناڤ ئاخا عیراقێ پێدڤی ب رێککەفتنەکێ یە بۆ رێکخستنا بەلاڤکرنا وان ھێزان و شێوێ پەیوەندیێ ل گەل لەشکرێ عیراقێ و ژڤانێ مانا وان ھێزان ل سەر ئاخا عیراقێ، دیسا ب زەحمەتە بێ ھەبوونا (حەسانا قانوونی) وەلاتیێن ھەڤپەیمان ھێزێن خوە بھنێرنە عیراقێ و پرسا حەسانێ ئەگەرێ سەرەکی بوو یێ گیرۆبوونا ئیمزاکرنا رێککەفتنا عیراقی – ئەمریکی ل سالا ٢٠٠٨”.
ل دۆر داخوازا جڤاتا پارێزگەھا ئەنبار بۆ پێدڤیا ھاتنا ھێزێن لەشکرێ بیانی بۆ پارێزگەھا ئەنبار بۆ پاراستنا وێ ژ داعش، تارق حەرب دبێژیت” ھەکە حوکمەتا عیراقی رازیبوون ل سەر ڤێ داخوازیێ دیارکر، وی دەمی دێ حوکمەت رەشنڤیسێ رێککەفتنێ و قانوونا تایبەت ب وێڤە بەرھەڤ کەت و بۆ جڤاتا نوونەران ھنێریت بۆ رازیبوونێ ل سەر و دەرکرنا قانوونەکا تایبەت ب ڤێ چەندێ ڤە، یان ژی رازینەبوونێ ل سەر”.
لێ گوت ژی”جڤاتا نوونەران رازیبوونا خوە ل سەر ھاتنا ھێزێن لەشکری یێن وەلاتێن ھەڤپەیمانیا نێڤدەولەتی بۆ ناڤ ئاخا عیراقێ دا ناکەت، ھەکە ھات و خوە حەکمەتا عیراقی ب خوە ژی رازیبوونا خوە دیاربکەت”.
سەبارەت ھاتنا نێزیکی ٣٠٠ شیرەتکارێن لەشکری یێن ئەمریکی بۆ عیراقێ، تارق حەرب دبێژیت”ھاتنا وان وەکو کارمەندێن بالیۆزخانا ئەمریکی ل بەغدا بوو کو (حەسانا) قانوونی یا ھەی”.