ترسا پارت و لایه‌نێن سیاسی و هه‌لبژارتنا سه‌رۆكێ هه‌رێما كوردستانێ!!
ئه‌ڤه ده‌مه‌كو مشت ومڕه‌كا توَند ل كوردستانێ یا په‌یدابووی و بابه‌تێ هه‌لبژارتنا سه‌رۆكێ هه‌رێما كوردستانێ یا بوویه بابه‌ته‌كێ گه‌رمێ راگه‌هاندن وگوَڤار و رۆژنامه وجڤات و مێزگه‌رد و هه‌تا بازار و ناڤ مالان ژی ڤه‌گرتیه، و ل هه‌ر جهه‌كی گه‌نگه‌شه ب ره‌نگه‌كی دهێته كرن و هه‌ر ئێك ل دووف زانین و شاره‌زایا خوه قه‌وانێ خوه لێ دده‌ت. ڕاسته هه‌ر كوسه‌ك د بیرو باوه‌ر و هزركرن و رایا خوه دا ئازاده، لێ هنده‌ك بابه‌ت هه‌نه دگرێدای خه‌لك و ملله‌تینه و نه‌ك گرێدایی كوَمه‌كا مرۆڤانه بۆ نمونه (په‌رله‌مان). بابه‌تێ هه‌لبژارتنا سه‌رۆكێ هه‌رێما كوردستانێ، نۆكو جڤاكێ كوردستانێ و دیسان پارتێن سیاسی ژی كرینه دوو پشك و رایێن ژێك جودا ل سه‌ر هه‌لبژارتنا سه‌رۆكێ هه‌رێمێ، هنده‌ك دبێژن: پێدڤیه ژلایێ په‌رله‌مانی ڤه بهێته هه‌لبژارتن و هنده‌ك دبێژن پێدڤیه ژلایێ خه‌لكێ بخوه‌ڤه بهێته هه‌لبژارتن. هه‌لبژارتن و ده‌نگدان مافێ ره‌وایێ هه‌ر تاكو كوسه‌كییه و مافه‌كێ سروشتیه و دڤێت ژڤی مافی وه‌لاتی نه‌هێته بێ باركرن، و سه‌رۆك ژی سه‌رۆكێ هه‌می كوردستانێ یه و نه‌ك یێ پارته‌كێ یان لایه‌نێكی بتنێ یه، هه‌لبژارتنا سه‌رۆكێ هه‌رێمێ نه وه‌ك هه‌لبژارتنا په‌رله‌مانتاره‌كی یه كو ئه‌و په‌رله‌مانتار سه‌ر ب لایه‌نه‌ك و پارته‌كێڤه‌یه و لاینگرێن وێ پارتێ بتنێ دێ ده‌نگێ خوه ده‌نه وی په‌رله‌مانتاری، نه‌خێر، سه‌رۆكێ هه‌رێمێ، سه‌رۆكێ هه‌موو كوردستانێ یه ب هه‌موو پارت و لایه‌ن و ئول و نه‌ته‌وان ڤه، و كوس نه‌شێت بێژیت سه‌رۆك سه‌رۆكێ من نیننه، به‌لێ دشێت بێژیت په‌رله‌مانتار په‌رله‌مانتارێ من نینه. له‌ورا دڤێت سه‌رۆكێ هه‌رێمێ ژلایێ خه‌لكیڤه بهێته هه‌لبژارتن، نه‌ك ژلایێ په‌رله‌مانی ڤه. ل ڤێره پرسیاره‌ك سه‌رهلدده‌ت، ترسا هنده‌ك لایه‌نێن سیاسی چیه ئه‌گه‌رێ سه‌رۆك ژلایێ جه‌ماوه‌ری ڤه هاته هه‌لبژارتن، ئایا وان لایه‌نان خه‌لك نینه، یان وان باوه‌ری ب جه‌ماوه‌ر و لاینگرێن خوه ناهێت؟ ئه‌گه‌ر باوه‌ریا وان بخه‌لك و لاینگرێن وان ناهێت، واته وان جه‌ماوه‌رێ خوه ب فرت و فێلا د هه‌لبژارتنێن په‌رله‌مانی دا دسه‌ردا بریه، و نوكو خه‌لكێ وان ب سه‌ر دره‌و و ده‌ڤخوشیێن وان هه‌لبوویه وئێدی باوه‌ریێ پێ نائینن و وان خه‌لكێ خوه ژده‌ست دایه، و ئه‌گه‌ر وان باوه‌ری ب خه‌لك ولاینگرێن خوه هه‌یه، بۆچی دترسن، بلا ئه‌و ژیك كاندیده‌كی بۆ سه‌رۆكاتیا هه‌رێما كوردستانێ كاندید بكون و بهێنه دمه‌یدانێدا. چونكو خودان جه‌ماوه‌رن وخودان كورسینه دپه‌رله‌مانیدا. لێ پێداگیریا وان لایه‌نان ل سه‌ر هه‌لبژارتنا سه‌رۆكی دپه‌رله‌مانیدا، ڕامانا وێ ئه‌وه وان جه‌ماوه‌رێ خوه ژ ده‌ست دایه وباش دزانن نه‌شێن ئه‌و كاندیدێ وان دڤێت سه‌ربێخن د ناڤ جه‌ماوه‌ری دا،چونكو جه‌ماوه‌ری ئه‌و نه‌ڤێت. هه‌لبژارتنا سه‌رۆكێ هه‌رێما كوردستانێ ژلایێ خه‌لكی ڤه گه‌له‌ك یا گرنگه ژبه‌ر چه‌ند ئه‌گه‌ره‌كا:-
ئێك: مافێ وه‌لاتیه سه‌رۆكێ خوه و یێ وی دڤێت ب هه‌لبژێریت، نه‌ك كوسه‌ك ده‌نگێ وی بفرۆشیت یان بده‌ته كوسه‌كی كو وه‌ڵاتی ئه‌و نه‌ڤێت.
دوو: سه‌رۆك سه‌رۆكێ ملیوَنا خه‌لكی یه، و نه یێ چه‌ند سه‌د كوسێن په‌رله‌مانتاری بتنێ یه و پێدڤیه ئه‌و هه‌لبژێرن.
سێ: ئه‌گه‌ر كوسه‌كێ سه‌ربخوه ڤیا خوه هه‌لبژێریت بۆ سه‌رۆكاتیا هه‌رێمێ، وی كوسی په‌رله‌مانتار و لاینگر دناڤ په‌رله‌مانیدا نه‌بن؟ دێ چاوا شێت خوه هه‌لبژێریت و ده‌نگان بده‌ست خوه‌ڤه ئینیت، چونكو ده‌نگێن په‌رله‌مانتارا یێن لایه‌نێن وانن نه‌ك یێن كوسه‌كێ سه‌ربخوه نه، به‌لێ ئه‌گه‌ر سه‌رۆك ژلایێ خه‌لكی ڤه هاته هه‌لبژارتن هه‌ر كوسه‌كی دێ باوه‌ری بخوه هه‌بیت خوه كاندید بكوت چونكو دزانیت (چانسێ) سه‌ركوفتنێ هه‌یه و هه‌ردێ رێژه‌كا ده‌نگان بده‌ست خوه ڤه ئینیت، واته هه‌ر تاكوكێ كورد باوه‌ریا خوه كاندیكرنێ هه‌یه.
چوار: ئه‌و سه‌رۆكێ ژلایێ خه‌لكی ڤه بهێته هه‌لبژارتن دێ پتر به‌ره‌ڤانیێ ژمافێن خه‌لكی و پێدڤێن وان كوت، چونكو به‌رپرسیاره به‌رامبه‌ر ده‌نگێ خه‌لكی.
پێنج: هه‌ر گاڤا سه‌رۆكێ ژلایێ خه‌لكی ڤه هاته هه‌لبژارتن و ئه‌ركێن خوه ب جه نه‌ئینان، خه‌لك ماف هه‌یه و دشێت وی سه‌رۆكی لاده‌ت، ب تنێ ب ئه‌نجامدانا خوه‌نیشاندانا، چونكو ژلایێ وان ڤه هاتیه هه‌لبژارتن، به‌لێ ئه‌گه‌ر ژلایێ په‌رله‌مانی ڤه هاته هه‌لبژارتن بتنێ په‌رله‌مان و یاسایا په‌رله‌مانی دشیت وی لاده‌ت، نه‌ك خه‌لك.
شه‌ش: دبیت دناڤ په‌رله‌مانیدا هه‌ڤگرتن و پشككرن(محاصصه) بهێته‌كرن بۆ هه‌لبژارتنا سه‌رۆكێ هه‌رێمێ، و كوسه‌كێ بێ شیان و نه‌ژ هه‌ژی بهێته هه‌لبژارتن، به‌لێ د ناڤ خه‌لكی دا ئه‌ڤه نینه و هه‌ر ئێك یێ ئازاده كی دڤێت دێ وی هه‌لبژێریت. دیسان به‌حس ل سه‌ر ده‌ستهه‌لاتێن سه‌رۆكێ هه‌رێمێ دهێته‌كرن كو گه‌له‌ك ده‌سته‌لات هه‌یه، ئه‌ڤه كارێ په‌رله‌مانی یه، و دشێت برێكا هه‌مواركرنا یاسایا و ده‌سته‌لاتێن سه‌رۆكێ هه‌رێمێ د ناڤ هوَلا په‌رله‌مانی دا گه‌نگه‌شه بكون، ڤێجا چ ده‌سته‌لاتێن سه‌رۆكی دزێده بكون یان ژی كێم بكون، ئه‌ڤه كارێ وانه و خه‌لك ژی دێ پێرازی بیت. به‌لێ بابه‌تێ هه‌لبژارتنا سه‌رۆكێ هه‌رێمێ، بشێوه‌كێ گشتی خه‌لكێ هه‌میێ پێ خوه‌شه ئه‌و بخوه سه‌رۆكێ خوه هه‌لبژێرن، داكو هه‌ست ب وه‌ڵاتیبونا خوه بكون و ئه‌ڤه مافێ وان یێ ره‌وایه..
