هه‌لمه‌تا بێ ره‌وشت ل دژی كوردان
رۆژا ئینێ ٢٥ خزیرانێ ٢٠١٥ رۆژاڤایێ كوردستانێ، كۆمكوژیێن كۆبانێ، ئێریشێن داعشێ ل باژارێ حه‌سه‌كێ و هه‌ولێن تێكبرنا ئارمی و پێكڤه ژیانێ ل وی باژارێ خوه‌شه‌ویست د ده‌مه‌كێ ده هاتن هۆلێ كو شه‌رڤانێن كورد ل گه‌ل ئالیگرێن خوه ژ عه‌ره‌ب و كرستیانێن رۆژاڤایێ كوردستانێ سه‌ركه‌فتنێن مه‌زن ل دژی تێرۆرستێن داعشێ ل گرێ سپی و باژارۆكێن ئیسایێ ب ده‌ستخستن و د هه‌مان ده‌مێ ده هه‌لمه‌ته‌كی بێ ره‌وشت و خوه‌دی باندۆره‌ك پر خراب ژ هن كه‌سایه‌تی و رێكخستنێن ئۆپۆزسیۆنا سووریێ ل دژی سه‌ركه‌فتنێن كورد و مله‌تێن هه‌رێما رۆژاڤایێ كوردستانێ ده‌ست پێ كر و كه‌سایه‌تیێن كو دگۆتن ئه‌م ژ بۆ سووریه‌ك نوو خه‌باتێ ل دژی رێژیما سووریێ دكن دیار بوو كو ئه‌و وه‌ك ده‌نگێ شۆفینی و كولتێرخورێن عه‌ره‌بێن سووریێ نه و هات دیار كرن كو ئه‌و و ئالیگرێن داعشێ هه‌ڤالن و هات دیاركرن كو كۆله‌نه، هه‌لوێست و گۆتن فرۆشن، ده‌ما كو ئه‌و ل دژی رزگار كرنا گونده‌وارێ جه‌زیر، كۆبانێ و ره‌قایێ رادوه‌ستن و توهمه‌تێن بێ به‌لگه و ب مه‌به‌ستا خه‌نقاندنا پێكڤه‌ژیانێ و دوروستكرنا شه‌ر و ژناڤبرنا ئارامیێ ل رۆژاڤایێ كوردستانێ كورد و شه‌رڤانێ كوردان واته یپگه كو د ناڤا خوه ده رێژه‌یه‌ك مه‌زن ژ عه‌ره‌ب و سریانێن رۆژاڤایێ كوردستانێ دهه‌وینه ب كۆچبه‌ركرنا عه‌ره‌بان و كوشتنا ل سه‌ر بنه‌مایێ ره‌گه‌زیێ و ڤالاكرنا گوندان و په‌رچه‌كرنا ئاخا سووریێ و هن توهمه‌تێن دن كو به‌لكو ژ توهمه‌تێن رێژیمێ د ده‌ما كو رێژیم ل سه‌ر لوتكا هێزا خوه بوو خرابترن.
ئێدی ب ئێریشێن داعشێ بۆ سه‌ر كۆبانێ و كریارێن وێ یێن هۆڤانه ل دژی كوردان (ب تایبه‌ت كوردان) ل گوندێن وان، كوشتنا زارۆك، ژن و پیره‌مێرێن كوردان و هه‌لوێستا ئالیێن ئۆپۆزسیۆنێیا خاڤ و بێ ره‌وشت هه‌ر تشت ئه‌شكه‌ره كر و دا دیاركرن كو بێ كی كولتێرخوره و كی خوه‌دی نه‌رین و به‌رنامه‌یه بۆ سووریه‌ك نوو. خودان به‌رنامه و پرۆگرام، هه‌گه‌ر ئه‌م ل گه‌ل وێ به‌رنامه‌یێ بن ئان ئه‌م نه ل گه‌ل وێ بن لێ مرۆڤ گه‌ره‌ك نه‌كه‌ڤه گۆلا خیانه‌ت و بێ ره‌وشتیێ ئه‌و گۆلا كو هه‌ڤپه‌یمانیا سووریێ خوه تێ وه‌ركر و ئفنكا خوه‌یا ئه‌فله‌قی ئه‌شكه‌ره كر.
كریار و كۆمكوژیێن داعشێ ل دژی كوردێن سڤیل پشتی هه‌لمه‌تا فره‌ه ژ ئالیێ هن خوه فرۆشێن عه‌ره‌بان كو خوه وه‌ك پێشه‌نگێن شۆره‌شا سووریێ هه‌ساب دكن ئه‌و هێزێن شۆفینی ئه‌شكه‌ره كرن و هه‌ر تشت بۆ مله‌تێ سووریێ هات زه‌لال كرن، نه ته‌نێ بۆ مله‌تێن سووریێ به‌لكو بۆ جڤاتا ناڤده‌وله‌تی ژی له‌وما ئه‌ز ماتمایی نه‌مام ده‌ما من نووچه‌یا كو بێهترێن ئه‌ندامێن هه‌ڤپه‌یمانیا سووریێ ژ ئالیێ ئامه‌ریكا ڤه وه‌ك تێرۆر هاتنه قه‌ید كرن و ده‌رباس بوونا وان بۆ ئامه‌ریكا هاتیه قه‌ده‌خه‌كرن.
ئێدی ژ پێكهاته‌یێن رۆژاڤایێ كوردستانێ ره هاتیه ئه‌شكه‌ره‌كرن كو كیژان ئالی بازارێ ب خوینا وان دكن و كیژان ئالی خوه‌دی پرۆژه و مافخوازن.
د داخوازا پێكهاته‌یێن رۆژاڤایێ كوردستانێ ده مله‌تێ كورد ل وی به‌شێ كوردستانێ پێشه‌نگێ خه‌بات و هلگرێ ئالایا ده‌مۆكراتی و پێشكه‌تنێیه له‌وما ئیرۆ بێتر ژ هه‌می ده‌مان ئه‌ركێ سه‌ر شانێ هێزێن كوردی گرانتر دبه و تێ خوه‌ستن كو مالا كوردی بێ سه‌راستكرن و ل سه‌ر به‌رژه‌وندیێن مله‌تێ كورد بغێن یه‌ك تیفاق و رێكه‌فتنێ، نه ته‌نێ ژبۆ پێكانینا مافێن كوردان لێ به‌لێ ژ به‌ر كو ب پێكانینا مافێ مله‌تێ كورد ل وی به‌شێ كوردستانی پارستنا مۆزاییكا شارستانیا وێ هه‌رێمێ تێ پاراستن و رێز ژ مافێ مرۆڤان ره تێ گرتن و رێ ل به‌ر خوه‌فرۆش و شۆفینیێن كو ب شیر و رامانێ ئه‌فله‌قیان هاتنه خودیكرن تێ گرتن.