سازان رێیا ده‌سپێك و دوماهیێ
چێكرنا ڤێ ره‌وشێ دڤێ قۆناغا نهادا، یا كو هه‌رێما كوردستانێ تێدا ده‌ربازدبیت، بێگومان د به‌رژه‌وه‌ندیا چو ئالیه‌كی دا نینه، تنێ دێ پتر ره‌شبینیێ ل ده‌ف وه‌لاتیان په‌یداكه‌ت و هه‌ڤڕكیا نێڤبه‌را ئالیێن سیاسی دێ كۆرترببیت، هه‌ر چوار ئالیێن پڕۆژه پێشكه‌شی په‌رله‌مانی كری و ل رۆژا 23 خزیرانێ پشكداری كۆمبوونا په‌رله‌مانی كریه، ئه‌ڤێ راستیێ باش دزانن، پرسه‌كا هه‌ری گرنگا وه‌ك سه‌ر راستكرنا قانوونا سه‌رۆكایه‌تیا هه‌رێما كوردستانێ بێ سازان كاره‌ك مه‌حاله، ژبه‌ركو هه‌موو ئالی پشكداری حكوومه‌ته‌ك به‌رفه‌رهن و چو ئالی نكاره ئالیه‌كی بێ به‌هربكه ژ پرسێن نیشتیمانی و ئه‌ف قانوونێن ره‌هه‌ندێن نیشتیمانی هه‌نه، گه‌ره‌ك به‌ری هه‌ر گاڤه‌ك ل دۆر پرسا ئێكلاكرنا پۆستێ سه‌رۆكایه‌تیا هه‌رێمێ بهێته هاڤێتن، هزر ل ئێكڕێزیا نیشتیمانی و هه‌ڤسه‌نگیا نێڤبه‌را ئالیێن سیاسی وه‌ره‌كرن.
ل ده‌ف وان ئالیێن پڕۆژه به‌رهه‌ڤكرین خویایه، پارتی دیموكراتی كوردستان، هێزه‌كا هه‌ری سه‌ره‌كی و خوه‌دی جه‌ماوه‌ر و ده‌ستهه‌لاته ل هه‌رێما كوردستانێ، ب چو شێوه‌یه‌كی پرسێن سه‌ره‌كی بێی پارتی سه‌رناگرن، له‌وڕا پێویسته هه‌موو ڤه‌گه‌ڕێن بۆ دانوستانان، مادام هه‌ر ڤه‌گه‌ڕێن بۆ دانوستانان، پێویستبوو به‌ری كۆمبوونا 23 خزیرانێ رێكه‌فتن هاتباكرن، یانژی كۆمبوون نه‌هاتبا گرێدان، ب هه‌ر حال نها كۆمبوون هاتیه گرێدان و 23 خزیرانێ ژی ده‌ربازبوویه، دڤێت ئالیێن سیاسی ژ نها پێڤه ده‌ست ب دانوستانان بكه‌ن و چو ئالیه‌ك جاره‌ك دی ئه‌ڤێ رێكێ بخوه نه‌ده‌ت، بۆچوونا یه‌ك ملیۆن ده‌نگده‌رێن پارتی پشتگوه پاڤێت و كوردستان به‌ره‌ف پاشه رۆژه‌كا نه‌دیارببه‌ت، رێیا ده‌ستپێك و دوماهیێ هه‌ر دێ سازانبیت ل سه‌ر پرسێن گرنگ و نیشتیمانی، ل جهێ گوتارێن ئاگرین و داخویانیێن هند به‌رپرس و په‌رله‌مانتاران، كار ژبۆی لهه‌ڤگه‌هشتنا ئالیێن سیاسی و ده‌ستنیشانكرنا رێیێن چاره‌سه‌ركرنێ بهێته‌كرن، نه‌ك وه‌كی نها هند كه‌س خوه بكه‌ن رێنیشانده‌رێن ملله‌ت و بێی ڤه‌گه‌ڕیان بۆ دانوستانان پترۆلێ ب ئاگریدا بكه‌ن.
پشتی په‌یاما سه‌رۆك بارزانی، ده‌لیڤه‌یه‌ك باشتر ل پێش ئالیێن سیاسی و فڕاكسیۆنێن ناڤا په‌رله‌مانی هه‌یه، هه‌تاكو ده‌ست ب دانوستانێن خوه بكه‌ن و به‌ری 20 ی ته‌باخێ رێكه‌فتن چێببه لسه‌ر پرسا سه‌رۆكایه‌تیا هه‌رێما كوردستانێ، ژبه‌ركو ده‌م بۆراندن فایدێ چو كه‌س و ئالیه‌كی ناده و چێبوونا ڤالاییا قانوونی پشتی 20ی ته‌باخێ دێ هه‌رێما كوردستانێ به‌ره‌ف ره‌وشه‌كا خراپ ببه.
