هێلێت سۆر ؟؟!!
پیرۆزینه هێلێت سور، نازكترینه، ئه‌ڤینه، سنوره، سه‌رۆكه، وه‌لاته، شه‌ره‌فه، خێزانه. ئه‌ڤه‌نه مه هار و دین دكه‌ن! ئه‌ڤێ پێ ل لڤان په‌یڤا دانیت ئه‌م پێیا لێ دشكێنین، ئه‌ڤێ ده‌ست دكه‌ت ده‌ستا لێ دشكێنین!
ئه‌م بخوه پێل ل هێلێن سۆر دانین! بڤی شێوه‌ی ئه‌م بخوه ده‌ست و پییا لخوه دشكێنین! ژبه‌ر هندێ مه گه‌له‌ك ژڤان په‌یڤان ژ ده‌ست دا!.
ئه‌م یێ ئه‌ڤینێ دكه‌ین و هوزانا دڤه‌هینین ب جوانترین چێكریێ خودێ، لێ
بدره‌و و بێبه‌ختی ترانێت خوه ب حه‌ژێكرنێ دكه‌ین! ئه‌م چ مرۆڤین ئه‌م؟ ئه‌م خوه نانیاسین، ئه‌ڤین تنێ ئێكه و نه دوونه و نه سێیه! و نه ژنا چوواریێ ژی! خوه ته 29 ده‌زگر ژی هه‌بن ئه‌ڤین هه‌ر ئه‌و بۆ ئه‌ڤا نه بوویه ڕزق.
نازكترین چه‌رمێ له‌شێ مه‌یێ دهێته بڕین بزۆری! ئه‌و هێلا سۆره ئه‌و بێی ڕه‌زامه‌ندیا من نابیت بهێته بڕین! لێ ئه‌ڤا داعش دكه‌ت ده‌ی بابێت مه ژی یێ ل زارۆكێت خوه دكه‌ن! زاروكا گرێده‌ن و دیلكێ وان دبڕن و دشداشه‌كێ عه‌ره‌بان دكه‌نه به‌ر! ما چ جێوازیه؟ داعشێ ژی لگه‌ل ئێزدیا وه‌ها كرن! ئه‌ڤه پێلێكرنا هێلێن سۆرێن كه‌سایه‌تییه.
مه دوو جاران سنورێن كه‌ركوكێ دانان و مه بخوه پێلێدان ئه‌ڤ جاره تڤێت پێ ل هێلا سۆر نه دانین!. مه گه‌له‌ك جاران سه‌رۆكێن ژقه‌ستا هه‌بوون ئه‌ڤ جاره مه سه‌رۆكێ هه‌ی بلا ئه‌م پێ ل هێلا سۆر نه‌كه‌ین گه‌لو.
مه ئێشا كوره‌تییا ڕه‌نگا یا هه‌ی له‌ورا ئه‌م نزانین هێلا سۆر و مۆر كیژانه؟! لێبوورین و په‌شێمانی فایده‌ناكه‌ت پشتی پێلێكرنا هێلێن سۆر گه‌لو.
ئه‌م جوانترین (هه‌ڤالینی) گوری ده‌فته‌ره‌كا دولاری دكه‌ین! ما هه‌ڤالینی ژی نه هێلا سۆره كوردو؟.
ڕێزگرتن و پاراستنا هێلێن كه‌سایه‌تی و مرۆَڤایه‌تی چه‌وا دهێنه پاراستن؟ (وژدانا مه‌یه ڤان هێلا دپارێزیت) ! د كۆمه‌لا مه‌دا گه‌له‌ك ژ مه وژدانا خوه یا فروتییه پاره‌ی و ئاینی، ئه‌ڤ هه‌ردوو (ئه‌له‌مه‌نته) دكارن پێ ل هه‌رتشتی بكه‌ن ! ئه‌م ئێخسیرێن دده‌ستێن ڤان هه‌ر دوو ئه‌له‌مه‌نتانه، ئاین و ئولێ عه‌ره‌با پێل ل كه‌لتور و هه‌بوونا مه كر! ژ ئالیكێ دن دولاری و چه‌كی دلوڤانی ژمه‌ستاند!.. .
ئه‌م خولیسه‌رین ته‌په‌سه‌رین نه‌زانین! ئه‌م تڤێت هێلێت خوه یێ سۆر بدانین! تا ئه‌ڤرۆ مه هێلێت سۆر نینن! ژنا كورد هه‌ما هێل نینن نه یێن سۆر و نه یێت پیڤازی! یا دهێته كوشتن و یا د ته‌مه‌نێ زارۆكتیێ دا ده‌نه شووی! ما ژڤان هێلا سۆرتر هه‌نه بۆ ته هه‌ی نیڤه‌كا كومه‌لێ.
هێلا سۆر وه‌لاته ئه‌مێ دهێلین، هێلا سۆر خێزانه ئه‌مێ سێ چووار ژنا بسه‌ر دهینین! هێلا سۆر ل كیڤه‌یه دا براوه‌ستم! هێلا سۆر نابینم تو ژی نابینی ئه‌م هه‌می نابینین گه‌لو!.
حكومه‌تا كوردستانا نووی تڤێت هێلێت سۆر بو مه بدانیت ماده‌م ئه‌م كه‌رێ په‌زینه. حكومه‌ت تڤێت نفشێن نووی ئاڤا بكه‌ت ب په‌روه‌رده‌كا نووی لسه‌ر قانوونێن نووی و نه یێن كه‌ڤن ده‌وله‌تا عیراقا عه‌ره‌با.
حكومه‌تا كوردستانێ سنورێن وه‌لاتێ من نیشا من بده! هێلێن سۆر بكه ئاگر و بێژه جیهانێ ئه‌ڤه هێلێن سۆرێن كوردانه! هێلێن سۆر د دادگه‌هێ دا دیاربكه! هێلێن سۆر د دیموكراتیه‌تێدا سۆر بكه! هێلێن سۆر د بازرگانیێ دا بدانه! هێلێن سۆر ده‌ستنیشان بكه دا وه‌كی مرۆڤان بژیم!، حكومه‌ت مه نه هێله كه‌رێ په‌زی بێ ئاقل و نه‌زان و نه‌ساخ! پارێن نه‌فت و گازێ هه‌فت تێری من و ته و وه‌لاتێن بیانی ژی دكه‌ت! تو ژی دێ بییه وه‌لات حكومه‌ت! كۆمه‌لا جیهانی ژی بۆ ته سنۆر و هێلێن سۆر هه‌نه! مه هه‌میان هێلێن سۆر هه‌نه! نێزیك ئه‌م دێ چینه د كۆمه‌لا جیهانی دا! مه وه‌ك خێزانه‌كا ساخله‌م نیشا جیهانێ بده حكومه‌ت! جیهان مه نا حه‌بینیت بڤێ پرچا قژا تژی ڕشك و سپیه.
