به‌لێ بۆ دستووره‌كێ هه‌رتشتی د ناڤ خوه دا هه‌مبێز بكه‌ت!!
هه‌ر وه‌كو خه‌لكێ مه گه‌له‌كێ پێشكه‌فتی و یێ شارازا و هشیار بووی و من ئاگه‌ه ژێ نه‌ی، مانه یا سه‌یره هه‌ر ژ سوحبه‌تا به‌ر ده‌رگه‌هی بگره هه‌تا دگه‌هیه توَڕێن كوَمه‌لاتی مژار یا بوویه ده‌ستوور و ئاین! حه‌رام بیت هه‌كه پتریا وان بزانن دستوور چیه هه‌ما وان ژی یا ژ كه‌نالێن پارتێن ئاینی گوه لێ بووی؛ ده‌مێ دبێژن پێدڤیه ئیسلام ببیته ژێده‌رێ سه‌ره‌كی و هه‌كه ده‌ستوورێ ڤالا بیت ژ ئاینی ئه‌ڤه كوفریه‌كه و ناهێت په‌ژراندن، خوه‌لی سه‌ری و كاره‌سات ژی ئه‌وه ده‌مێ گه‌ل نه‌زانێن نه‌گوهدار بن. ماده‌م ناڤێ ئاینی هات پێدڤیه تو ب چ ره‌نگا بوَچوونا خوه نه‌ده‌ی؛ هه‌ما به‌س بێژی (سه‌میعنا و ئه‌ته‌عنا)، مژار نه‌گرێدای ئاینا و پیروَزیا وانه هه‌لبه‌ت ئه‌مێن د ناڤا وه‌لاته‌كی دا پتریا خه‌لكێ وێ ئاینی پیروَز دبینن و ژبه‌خت ره‌شیا مه لجهێ په‌رستنا خودای بكه‌ن یێ په‌رستنا ئاینی دكه‌ن. هه‌روه‌كو نوزانن ب درێژیا دیروَكێ ل ناڤا روَژهه‌لاتا ناڤین باشترین كراس بوَ خه‌ملاندن و جوانكرنا تاوانان ئاین دهێته بكارینان، باشترین یاریه تو یاریێ پێ ب خه‌لكی بكه‌ی. من رێز بوَ هه‌موو ئاینان هه‌یه و چ جوداهی د ناڤبه‌را وان دا نابینم هه‌موو پێكڤه دپیروَزن لێ بوَ من گرنگ نینه ته باوه‌ری ب كیش ئاینی هه‌یه ل جهێ تو زه‌حمه‌تێ ببه‌ی و ئاینێ خوه بوَ من پێناسه بكه‌ی كه‌ره‌مكه بوَمن مروَڤ بوونا خوه دوپات كه، هه‌ر ده‌مێ من مرۆڤاتی د ناڤ ناخێ ته‌دا ددیت وی ده‌می دێ گه‌همه وێ ئه‌نجامێ كانێ ئاینێ ته چ خزمه‌تێ دكه‌ت. وه‌كی مه خوَیاكری نها مژار ئاین و ده‌ستوورن هه‌لبه‌ت ئه‌ڤه دوو تشتن گه‌له‌ك ژێك جودا و بهیچ ره‌نگه‌كی نابیت تێكه‌لی ئێك ببن و چ تشت وان پێكڤه گرێ ناده‌ت ژبلی به‌رژه‌وه‌ندی نه‌بیت، ئه‌و كه‌سێن دخازن ئاینی تێكه‌لی سیاسه‌تێ بكه‌ن هه‌لبه‌ت وان دڤێن ئاینی بوَ خوه بكه‌نه رێخوه‌شكه‌ر بوَ چه‌سپاندنا سیاسه‌تا خوه. بێگومان باشترین رێك ئه‌ڤه‌یه بوَ سه‌ردابرن و قانع كرنا خه‌لكێ ساده، دیروَكا كوردان دا به‌لگه‌یه لسه‌ر ڤێ چه‌ندێ كانێ چه‌ند جارا ل بن په‌ردا ئاینی هاتینه خاپاندن، ئه‌رێ كه‌نگی دێ ده‌م هێت ئه‌م بزانین هه‌رده‌ما ئاین تێكه‌لی سیاسه‌تێ بوو دێ پاشڤه‌مان و توَندو تیژی و كوشتن هێته گوَره‌پانێ دا وه‌كی نها ل وه‌لاتێن عه‌ره‌بی دبینین، وێ هه مه‌سیحی یه و یێ دی ئێزدیه و یێ دی موسلمانه وێ هه سوننی یه و یێ دی شیعه یه ژ كه‌ره‌ما خودێ هه‌ر ئێك هزر دكه‌ت به‌س ئه‌و یێ درسته و یێن دی هه‌موو دخه‌له‌تن، ڤێجا به‌س زه‌رێ ژمه‌حفیرێ كێمه به‌س ئه‌وا مای ئه‌ڤ گێله‌شوَكه نه‌بریه ناڤ ده‌ستووری دا یا ژ مه كێمه ئاین ببته ژێده‌رێ سه‌ره‌كی بوَ سیاسه‌تێ.
ئاین په‌یوه‌ندی یه‌كه ناڤبه‌را مروَڤی و خودای دا و سیاسه‌ت په‌یوه‌ندیه ناڤبه‌را مروَڤان دا ڤێجا كه‌نگی ئه‌ڤ هاوكێشه دێ وه‌كهه‌ڤ بیت! جهێ حێبه‌تیێ یه گاڤا ته خاست ئاینی و سیاسه‌تێ ژێك جودا بكه‌ی دێ هێیه تاوانباركرن ب علمانیه‌تێ وه‌ی حرام بیت هه‌كه تو درامانا علمانیه‌تێ بگه‌هی، هه‌كه علمانیه‌ت كوفری بیت ئه‌ز دبێژم ئه‌وه كوفری كو مروَڤ لبن په‌ردا ئاینی بهێنه سه‌ر ژێكرن، سه‌ر ژێكرنا مروَڤا كرێت كرنا ئاینی یه و ئه‌ڤرۆ ئیسلاما سیاسی ڤێ یه‌كێ دكه‌ت و د سه‌رهندێ را ژی سیسته‌مێن علمانی ب كوفر دده‌نه ناسكرن و هه‌موو سه‌كۆ و مه‌یدانێن راگه‌هاندنێ بۆ ڤێ مه‌ره‌مێ دانه خه‌بتاندن. لێ ب درێژیا دیرۆكێ هه‌رده‌ما ده‌ستهه‌ڵات ل ده‌ستێ ئیینداران دابیت، مرۆڤ و بهایێن مرۆڤی تێنه بن پێكرن و بێ رێزی ل مرۆڤان دهێته كرن و زێده‌باری ته‌ڤنێ جڤاكی تێته خرابكرن و جڤاك ل هه‌ڤ دبت نه‌یار و باوه‌ری دناڤدا نامینت و جڤاكا هه‌ڤ دبیت ره‌شه و جهێ كه‌سێ ره‌خنه‌گر و بانگخازێن وه‌كهه‌ڤیا مرۆڤان دكه‌ن، نین و ب دوژمنێن ده‌سهه‌ڵاتا حودایی تێنه تۆمه‌تباركرن. لێ د سیسته‌مێن علمانی دا ته‌ڤ مرۆڤ به‌رامبه‌ری قانوونێ وه‌كهه‌ڤن و چ جوداهی د ناڤبه‌را پێكهاته‌یێن جڤاكی دا نین و رێك ڤه‌كریه بۆ جوداهیێن هزری و ئایینی و سیاسی ئانكو هه‌موو ره‌هه‌ند بۆ ئازادیا كه‌سی و ئه‌فراندنێن زانستی ڤه‌كرینه لبن سیهوانا قانوونێ. ب ئه‌زموون هاتیه چه‌سپاندن هه‌ر جهێ ئازادی لێ سه‌رده‌ست بیت بها و نرخێن مرۆڤی دپارستینه و د ده‌ستووری دا ئه‌ڤ مافه هاتینه پاراستن؛ ژبه‌رهندێ مه ل هه‌رێما كوردستانێ پێدڤی ب ده‌ستووره‌كی یه ئازادیا هزرێ و باوه‌رێ لێ بهێته چه‌سپاندن و رێكێ ل هه‌موو وان بزاڤان بگریت یێن دخازن ل بن په‌ردا پرۆزیا ئایینی كێلبێن خه‌ندقاندنا ئازایا هزرێ و باوه‌رێ ل مه تیژ بكه‌ن و هه‌رده‌ما بیڤا خوه دیتن ده‌ستووری هه‌موویێ بگوهۆڕن و كوردستانێ وه‌كو سعودیێ و ئه‌فغانستان و ئیرانێ لێ بكه‌ن. ده‌ستوور بوَ هه‌موو وه‌ڵاتیانه بێ جوداهی لێ ئایین تنێ بۆ باوه‌ردارێن ئایینه‌كێ بتنێ یه و د ناڤ خوه دا ژی پارڤی چه‌ند چه‌ق و تایان دبیت و هه‌ر ئێك تایێ دن كافر دكه‌ت لێ سیاسه‌ت بۆ ته‌ڤ وه‌ڵاتیانه و بزاڤگرنه بۆ چاره‌سه‌كرنا ته‌ڤ ئاریشێن وان و ژبه‌ر هندێ سیاسه‌ت به‌رده‌وام د گوهۆڕینێ دایه چونكو ل چاره‌رێكێن گونجای دگه‌رهت و ل ڤی سه‌رده‌می مه پێدڤی ب سیاسه‌تێ یه نه‌ك ئولدارێن ئولی بۆ سیاسه‌تێ بكار دئینن.
