گه‌له‌ك گڤاشتنان نه‌كه‌ن ، دێ هه‌رێما قاسم سلێمانی هێته راگه‌هاندن
شه‌ره‌نیخا پوَسته و كورسیان هه‌مبه‌ری دلسوَزی و قاره‌مانی و مێرخاسیا پێشمه‌رگه‌ی د شه‌رێ دژی تروَرستێن ده‌وله‌تا تاریكستانێ دا، به‌روَڤاژی هه‌موو دابونه‌ریت و ره‌وشتێن پاكسازیێ نه ل نیك كاخا مێرخاسیا كورد و كوردستانێ یا پێ هاتیه نیاسین هه‌ر ژ كه‌ڤندا و هه‌تا نها، ئه‌وژی كورد هیچ جو جاره‌كێ دوژمنێ به‌ر سینگی خوه دگرانترین و دژوارترین شه‌ردا نا خاپینن و ب خیانه‌ت ڤه دربێ خوه داناوه‌شینن.
لێ هه‌لبه‌ت هنده‌ك ئالی و حزبێن كوردستانی كو ب مخابنیه‌كا مه‌زن ڤه دبێژم د ناڤبه‌را دو گڤانان دا كوردستانی، ل گوَڕ دیتنا من چو سه‌روسیمایێ كوردستانی یان نه‌ته‌وه‌یا كوردی پێڤه دیار نینه، ژبه‌ركو هه‌موو ره‌فتار و پێشڤه‌چوونا وان د چارچوَڤێ به‌رژوه‌ندیا بلندا ده‌وه‌لتێن هه‌رێمی یێن ده‌ر دورێن هه‌رێما كوردستانێ دا دهێنه هه‌لسگاندن و به‌رده‌وام هه‌موو بزاڤێن وان دكه‌ڤنه خانه‌یا دژاتیا خه‌ون و حه‌زو ستراتیجیا بلندا نه‌ته‌وه‌یا ملله‌تێ كوردا، ب بهانه‌یا وێ چه‌ندێ ئه‌و حزب و ئالیێن پاراستنا به‌رژوه‌ندیێن خوه یێن به‌رته‌سك و به‌رته‌نگ و پوَست و كورسیێن خوه دكه‌ن، ل سه‌ر كیستێ خه‌ونا هه‌زار سالیا ملله‌تێ كورد و هه‌بوونا پێگه‌هه‌كا ده‌ستنیشانكری بوَ ملله‌تێ هه‌ژار و به‌لنگازێ كورد كو ئه‌وژی هه‌بوونا ده‌وله‌تا كوردیه، هه‌ر تاكه كه‌سه‌كێ كورد ئیروَ دزانیت گیروكرن و پاشخستنا هه‌ر پێنگاڤه‌كا هه‌ستیار به‌رب ده‌وله‌تبوونا كوردی د به‌رژوه‌ندیا نه‌حه‌زا و نه‌یارێن ملله‌ه‌تێ كوردا یه و چوو مفایه‌كێ دوَر یان نێزیك ناگه‌هیته به‌رژوه‌ندیا ملله‌تێ كورد و بتنێ دێ ئاسته‌نگ و رێگرتنه‌ك بیت هه‌مبه‌ری ده‌ركه‌فتن و هه‌بوونا وێ خه‌ونا نه‌هاتیه سه‌ر جیهانی و نه‌بوویه كه‌تواره‌كێ بنه‌جه.
دده‌مه‌كی دا هه‌موو سه‌نگه‌رێن له‌شكری و سیاسی و ئابوَری و جڤاكی ژی به‌رامبه‌ری هه‌رێما كوردستانێ هاتیه ئازراندن و شاراندن بتنێ مه‌ره‌م ژێ راگرتنا هه‌بوونا هه‌رێمه‌كا سه‌ربخوه‌یه ل ڤێ ده‌ڤه‌رێ، ئه‌ڤجا ئه‌و پیلان چو ژ ئالیێ وه‌لاتێن ده‌ردورێن هه‌رێما كوردستانێ هاتبنه دانان و راچاندن یان ژی ژوه‌لاتێن زلهزێن نێڤده‌ولی یێن سه‌ركێشیا شه‌رێ روَژهه‌لاتا ناڤه‌راست دكه‌ن بوَ هه‌بوون و پاراستنا پێگه‌هێن پراگماتیكی و ده‌ستهلاتا ئابوَری ل ڤێ ده‌ڤه‌رێ هه‌بیت، له‌ورا ئه‌م دبینن دوبه‌ره‌كی و شه‌ره‌نیخا ئالیێن سیاسی و حزبی ل هه‌رێما كوردستانێ ژی ل سه‌ر دوبه‌ره‌یان هاتینه به‌لاڤكرن و هه‌رئێك ژوان هه‌ردو به‌ره‌یێن جودا جودا داخوازا پاراستنا مافێنپشته‌ڤان و پالپشتی خوه دكه‌ت، كو ئه‌ڤه‌ژی مافه‌كێ سروشتی یه ل گوَڕ دیتنا هه‌ر ئالیه‌كێ و نێرینا و شروَڤه‌كرنا وی بوَ كه‌توارێ سیاسیێ ئه‌و تێدا دژیت، به‌لێ خالا هه‌ره گرنگ و هه‌ستیار ل ڤێرێ ئه‌وه هه‌ر ئالیه‌كێ كوردستانێ كا ره‌نگێ وی چو بیت یان ژی ئاراسته‌یا وی بوَ كیڤه بیت ئاریشه نینه، بتنێ پاراستن و راگرتنا به‌رژوه‌ندیا بلندا نه‌ته‌وه‌ی و ملله‌تی كورد ئارمانجا سه‌ره‌كیا وان بیت و دانانا به‌لانسه‌كێ ژ هه‌ژی بوَ هه‌ر ئای و وه‌لاتێن ده‌ردور و هه‌رێمی هه‌مبه‌ری كوردان و پیڤه‌ره‌كی تایبه‌ت هه‌بیت بوَ هه‌ر كاره‌كێ هه‌ستیار ل گه‌ل وان وه‌لاتان دهێته ئه‌نجامدان، كا هه‌تا چو راده ئه‌و كار د به‌ژوه‌ندیا ملله‌تێ كورد دایه نه‌ك د به‌رژوه‌ندیا حزب و ئالیێن سیاسی دا، وی ده‌می بتنێ ئه‌و حزب و ئالیێن سیاسی ل نیك هه‌موو خه‌لكێ كوردستانێ و ملله‌تێ كورد و د به‌رپه‌رێن دیروكێ دا ژی دێ بنه خودان هه‌لویسته‌كێ زێرین و دیروكه‌كا پڕ روومه‌ت و رێزگرتنه‌كا ژ هه‌ژی.
یا نها ئه‌م دبینن نه پاراستنا ماف و به‌رژوه‌ندیا ملله‌تی یه، ڕاڤه‌كرنا دئاڤا شێلی دا بوَ به‌رژوه‌ندیێن تایبه‌ت و ب ده‌ستڤه‌ئینانا هنده‌ك پوَستێن زێده‌تر یان ژی شكاندنا ئالیێ به‌رامبه‌ره، بدیتنا من نه یاریا سیاسی و سیاسه‌تمدارێن خودان شیان و بلیمه‌ته، به‌لكی كارێ ترسنوَك و خاپاندنێ یه، كارێ وان كه‌سایه یێن بتنێ ده‌لیڤه‌كێ دنێریت بوَ داڤدوَزیه‌كێ تێدا بكه‌ت و سه‌رنجا جه‌ماوه‌ری ساده و ساكار بخوه راكێشێت و بێژیته خه‌لكی ئه‌ز یێ ل مه‌یدانا سیاسی مایم هێشتا ئه‌ز نه‌مریمه و نه هاتیمه ڤه‌شارتن.
گه‌رمه گه‌رما شه‌رێ دژی ده‌وله‌تا تیروَرێ و تاریكستانێ چو هه‌لویسته‌كێ بوی ره‌نگی نه‌بوویه كو مروَڤ بێژیت جهێ شانازی و رێزگرتنێ یه، من بخوه هنده‌ك جاران هزردكر هه‌ر چوو نه‌بیت بلا سه‌ره‌دانا پێشمه‌رگه‌كێ بریندار ل نه‌خوشخانێ بكه‌ن، هه‌كه ئه‌و نه‌شێن قه‌ستا سه‌نگه‌رێن شه‌ری ژی بكه‌ن، بلا سه‌ره‌دانا پێشمه‌رگه‌كی ده‌مێ دهێته مال دناڤ زاروكێن خوه‌دا بكه‌ن و هاندانا مه‌عنه‌ویاتێن وی بكه‌ن، ل شوونا شاشێن وان ل ده‌سپێكا شه‌ری دی داعشێ پێشمه‌رگه‌ی ب كوشتی سالوخه‌ت بكه‌ن، بلا گوتبان ئه‌م ب هه‌وه سه‌رلبند و سه‌رفرازین پێشمه‌رگه، هه‌ما گوَتنه‌كا خێرێ دا ئه‌م شیاباین بێژین سیمایێ كوردستانی و نیشانێن خێرێ هه‌نه، به‌لێ بتنێ كوَمبوونێن بنئاڤكی و ده‌ره‌ڕێ ل گه‌ل به‌رپرسێن له‌شكری نه‌یێن سیاسی ژی یێن وه‌لاتێن بیانی چاڤه‌رێ بوون.
