شانۆیا یه‌كێتی و گۆڕانێ
پشتی رێكه‌فتنا پارتی دیمۆكراتی كوردستان و یه‌كێتی نیشتیمانی ئه‌وا ب رێكه‌فتنا ستراتیژی به‌رنیاس هاتیه مۆركرن، ژماره‌كا مه‌زنا به‌رژه‌وه‌ندیێن وان هه‌ردو پارتان كه‌فته د گه‌ل ئیكدا، به‌ری دروستبوونا ته‌ڤگه‌را گۆڕان و ئانكو ل ده‌مێ حوكمه‌تا ففتی ففتی دا ب سه‌دان پرسێن مه‌زنێن ڤی ملله‌تی ب باشی و خرابیڤه هه‌ردو پارتان پێكڤه ئه‌نجامددان. پشتی دروستبوونا ته‌ڤگه‌را گۆڕان یه‌كێتی كه‌فته د قووناغا مان و نه‌مانێ دا، پشكه‌ك ژ وان به‌رژه‌وندیان هاتنه سنۆرداركرن، به‌لێ هه‌ر پارتی پشتا یه‌كێتی به‌رنه‌دا، د ده‌لیڤێن به‌رته‌نگدا، ب تایبه‌تی پشتی مام جه‌لال تووشی نه‌خۆشیێ بووی، هه‌تا نوكه ژی ره‌نگه ب ده‌هان به‌رژه‌وه‌ندیێن نهێنی ئێن ئێكه‌تیێ د ده‌ستێن پارتی دابن، به‌لێ ئه‌وا پارتی چو جاره‌كێ چساڤه‌رێ نه‌دكر ئه‌ڤرۆ یا دهێته ئه‌نجامدان.
ل ڤێره دێ پرسیار كه‌م بۆچی یه‌كێتی و گۆڕان درژدن ل سه‌ر بریارێن خوه؟ هه‌ر ئیك ژ یه‌كێتی و گۆڕان و هه‌ر دو لایه‌نێن دی یێن سیاسی باش دزانن د ڤێِ قووناغێ دا و ب تایبه‌تی پارتی كو هه‌م ب جه‌ماوه‌ریێ خوه و هه‌م ژی ب هێزا خوه یا له‌شكری خودانا ب هێزترین هێزا له‌شكری و جه‌ماوه‌ریی یه ل باشۆری كوردستانێ، نه واقعی یه ئه‌و لایه‌ن جورعه‌تێ بده‌نه خوه و ئه‌ڤێ شانۆیی بكه‌نه ژیوار، چونكو چو ئێك ژ وان لایه‌نان نه‌شێن كوردستانێ د ڤێ قه‌یرانا دارایی دا و شه‌ڕی داعشێ بینیته ده‌ر، به‌لێ ئه‌و كه‌ڤتینه د هه‌ڤڕكیه‌كێ دا بۆ بده‌ستڤه‌ئینانا ده‌نگێ جه‌ماوه‌رێ دژی مالا بارزان. ل سالا 1975 چه‌ند كه‌سه‌ك بوون، ل وێ رۆژێ وه‌ره ئه‌وان جه‌ماوه‌ره‌ك دروستكریه كو پرانیا وی جه‌ماوه‌ری ل پارێزگه‌ها سلێمانیێ نه و دبێژنی جه‌ماوه‌رێ دژی مالا بارزان، ئه‌و جه‌ماوه‌ر ب تنێ ل وێ هێزی دگه‌رن ئه‌و هێزا دژی پارتی و مالا بارزان رادوه‌ستیت، ئه‌ڤجا چ ئه‌و دروست بن یانژی نه‌دروست بن، گرنگ ئه‌وه دژی مالا بارزان و پارتی بن!.
به‌ری دو سالان ده‌مێ یه‌كێتی رازیبووی ویلایه‌تا مه‌سعوود بارزانی بۆ ده‌مێ دو سالان وه‌كو سه‌رۆكێ هه‌رێمێ درێَژ بكه‌ن، ئه‌وی جه‌ماوه‌رێ دژی مالا بارزان چوونه پال ته‌فگه‌را گۆران ڤه، یه‌كێتی تووشی شكه‌ستنه‌كێ بوو، ئه‌وا ئه‌ڤرۆ هه‌ر ئێك ژ گۆران و یه‌كێتی د په‌ڕله‌مانی كوردستانێ و ده‌زگه‌هێن راگه‌هاندنێ دا دكه‌ن تنێ بۆ بده‌ستڤه‌ئینانا وی جه‌ماوه‌ری یه، هه‌كه نه یه‌كێتی باش دزانیت ئه‌و بێ پارتی دێ د ده‌سه‌تێن گۆڕان دا بنه ئالات و ئه‌وان دێ به‌ره ب ئاقاره‌كێ نه‌دیار به‌ن، هه‌ر وه‌سا گۆڕان ژی ل به‌ر شكه‌ستنه‌كا مه‌زنڤه دچیت، چونكو ئه‌وا جه‌ماوه‌ریێ وی چاڤه‌رێ دكر د ده‌مێ ئۆپوزسیۆنێ دا و ئه‌و به‌لێنێن ب خه‌لكێ خوه‌دا نه‌شیانه 5% ژ وان به‌لێنان جێبه‌جێبكه‌ن، ئێدی چاوا دێ خوه ئێخنه د شاشیه‌كا هۆسا دا كو سه‌رۆكاتیا هه‌رێما كوردستانێ د ڤان قه‌یرانێن مه‌زندا وه‌رگرن. ئه‌وا نوكه د گۆره‌پانا باشۆرێ كوردستانێ دا دهێته ئه‌نجامدان هه‌ر ئێك ژ ته‌فگه‌را گۆڕان و یه‌كێتی نیشتیمانی كوردستان ژماره‌كا شانۆڤانان ئیناینه سه‌ر ده‌بێ شانۆیی و هه‌ر ئێك ژ وانا دڤێت مه‌زنترین جه‌ماوه‌ی بۆ خوه بكێشن، 20 خزیرانا ئه‌ڤ ساله پشكا ئێكێ ژ شانۆیا وان برێڤه چوویه، پشكه‌ك ژ وی جه‌ماوه‌رێ دژی پارتی فیڕك بوو وان لێداینه و گۆتیه وان ده‌ست خۆش، به‌لێ هێشتا شانۆیان وان به‌رده‌وامه، چه‌ند رۆژه‌كێ به‌ر ب 20 ئابێ ڤه بچین ترسا ده‌رهێنه‌رێن وێ شانۆیێ زێده‌تر لێدهێن، چونكو ئه‌و دترسن ل دووماهێ فیڕك و كه‌نیا جه‌ماوه‌ێ هۆلێ ل شوونا هه‌ژاندنا هۆلێ، ببته جیز جێز ل شوونا بارینا گولان ل سه‌ر سه‌رێ وان پێلاف و بتلێن ئاڤێ ببارن، ئه‌و جه‌ماوه‌ر بۆ یه‌كگرتوو و كۆمه‌ل و پارتێن دی بچن؟ *مامۆستایێ زانكۆیێ
