سیسته‌مێ مه !
ئه‌م نزانین بوچی شه‌رم ژ سیسته‌مێ خوه دكه‌ین؟ ماده‌م سیسته‌مێ مه ئه‌شیره‌تكانێ یه؟ ل به‌رامبه‌ری ملله‌ت و وه‌لاتێن پێشكه‌فتی ئه‌م ژی یێ بڕێڤه دچین لێ نه‌وه‌كوو وان به‌لكی وه‌كی خوه.
ئه‌و دچنه ئه‌سمانا و سه‌ر هه‌یڤێ، ئه‌م ژی كه‌چكێن داری چێدكه‌ین و خوه ب سه‌رێ هه‌یڤێ ڕا دگه‌هینین.
ما بوچی ئه‌م حكومه‌ته‌كێ چێناكه‌ین كو چ وه‌لاتان وه‌كی مه نه‌بیت!؟ حكومه‌ته‌كا بێ په‌رله‌مان یا عه‌شیره‌تكانێ كو هه‌ر چوار سالا عه‌شیره‌ته‌ك مه بڕێڤه ببه‌ت ل بن سیبه‌ره‌كا حكومه‌ته‌كا دوورانێ و گه‌رانێ؟
ئانكو هه‌ر عه‌شیره‌ته‌ك لگوری هزر و زانینا خوه ڤی وه‌لاتی ئاڤا بكه‌ت.
بڤی ڕه‌نگی دێ هه‌ر چووار سالا كه‌رته‌ك د وه‌لاتی دا ئاڤه‌دان بیت ل سه‌ر ده‌ستێ ئاغایه‌كی ئه‌ڤ جووره حكومه‌ته دامه‌زرن:
حكومه‌تا كه‌رتێ چاندنێ و په‌زی و ئاژه‌لی و سپیاتیێ.
حكومه‌تا كه‌رتێ بازرگانی و حیل و حه‌والا.
حكومه‌تا شه‌رۆ و شه‌مه‌تا و حڕحڕێ و نڕنڕێ.
حكومه‌تا كهیژك و گویزا.
حكومه‌تا تری و زه‌رزه‌واتی.
حكومه‌تا ل سه‌ری شاش و لفه، و لمال نینه ئوفه.
حكومه‌تا تونه‌ل و ده‌ورا هه‌سپان
حكومه‌تا نینه بڕینه خوارێ!
حكومه‌تا ( ).. .
و هوسان هه‌ر چووار سالا دێ ده‌ڤه‌ره‌ك و گونده‌ك بیته باژێر وملله‌تێ وێ عه‌شیره‌تێ دێ بنه مرۆڤـ و مفای ژ داهاتیێ وه‌لاتی كه‌ت!.
دبیت ئه‌ڤی سیسته‌می ژی هنده‌ك ئیشكالاتێن خوه هه‌بن بۆ نمۆنه:
عه‌شیره‌تا ده‌ستهه‌لاتدار بێژیت: ئه‌م 6 هه‌یڤا مووچه‌ی ناده‌ین، دێ نێرییا و سه‌ر جه‌له‌با پێ كڕین دا ل سه‌ر كه‌رێ په‌زی په‌ڕن!.
یان عه‌شیره‌تا ده‌ستهه‌لات بێژیت: دڤێت هه‌می بێژنه ئێك و دوو (خاڵ) و بفه‌رمی ل هه‌می ده‌زگه‌هێن حكومه‌تێ!.
یان عه‌شیره‌تا ده‌ستهه‌لات بێژیت: ساله‌كێ زباره‌ییه! هه‌می ملله‌ت دێ زبارێ ل فلان گوندی كه‌ن.
یان عه‌شیره‌تا ده‌ستهه‌لات بێژیت: ئه‌م دێ ڕابین ب ئوپوزسیونێ داده‌ین هه‌تا مارێ مری دبن زكیڕا نه‌چیت!.
دوویر نینه جاره‌كێ كه‌لا مێرانیێ خوه لسه‌ری سه‌رجه‌له‌به‌كی بده‌ت و بڕیارا (ده‌وله‌ت بوونا كوردان) ڕابگه‌هینیت!!! كو موختارێ گوندی بكه‌ته سه‌رۆك وه‌زیر، و شڤانی بكه‌ته وه‌زیرێ كاهره‌بێ و قومارچیێ گوندی بكه‌ته وه‌زیرێ په‌روه‌ردێ، وه‌رازی بكه‌ته وه‌زیرێ ته‌ندرۆستی، گاڤانی بكه‌ته فه‌رماندێ له‌شكه‌ری، عه‌تاری بكه‌ته وه‌زیرێ سامانێن سرۆشتی و. .
هوسان دێ هه‌ر چووار سالا ده‌وله‌ته‌كا كوردی ڕاگه‌هیت و دیرۆك به‌حس كه‌ت.
ئه‌ڤه نه چ سیسته‌مه مه هه‌ی نوكه! و ئه‌ڤه بكێرمه ناهێت، پاشكه‌فتن و نه‌زانینه ئه‌م تێدا دژین د سالا 2015 دا! ئه‌م دڤێت سیسته‌مێ خوه یێ عه‌شیره‌تكانیێ خورت بكه‌ین و نوی ژه‌ن بكه‌ین و پێشبێخین! ئانكو هه‌ر چوار سالا ده‌ستهه‌لات بكه‌ڤیته ده‌ستێ عه‌شیره‌كێ!.
