بسپۆرەکێ پەیوەندیێن دەرڤە: پێدڤیە دەست ب دانوستاندنێن سەربەخوەیێ ل گەل بەغدا بھێنە کرن
ئەڤرۆ نیوز:
بسپۆرەکێ پەیوەندیێن دەرڤە ل زانکۆیا دھۆکێ راگەھاند، ژ بەر کو ھەتا نوکە ھەرێما کوردستانێ ژ ئالیێن سیاسی و قانوونی ڤە گرێدای بەغدایە، حوکمەتا عیراقێ فشارێن رژد دکەت کو ھەرێما کوردستانێ نەچاربکەت ڤەگەریتە بەغدا، دبێژیت ژی پێدڤیە دانوستاندێن ھەرێما کوردستانێ و بەغدا سرۆشتێ خوە ب گوھۆریت و ببنە دانوستاندن ل سەر ئەنجامدانا گوھۆرینان د سیستەمێ سیاسی یێ عیراقێ دا بۆ کونفدرالیێ یان ژی سەربخوەیا کوردستانێ.
د.سەردار موسا بسپۆرێ پەیوەندیێن دەرڤە ل زانکۆیا دھۆکێ بۆ رۆژناما ئەڤرۆ گۆت” ژ سالا ٢٠٠٣ و تایبەت پشتی سالا ٢٠٠٦ ھەرێم بوویە خودان پێگەھەک تایبەت ئەوژی پێگەھەکێ قانوونی یە و چەندین رێککەفتن د ناڤبەرا بەغدا و ھەولێرێ دا ھاتینە ئیمزاکرن و تایبەت د وارێن بۆدجا پێشمەرگەی، پەترۆلێ کو ژ بابەتێن ھەرە سەرەکی نە، ھەر چەندە ڤان بابەتان پێگەھا خوە یا قانوونی یا ھەی، بەلێ ژبەر خواستێن سیاسی یێن بەغدا کو بزاڤێن رژد ھاتینە کرن ب ڕێیا فشارێ ل سەر ھەولێرێ کو بھێتە نەچارکرن بزڤریتەڤە بەغدا ژئالیێ سیاسی و قانوونی ڤە، ھەتا نوکە ھەرێما کوردستانێ گرێدای بەغدایە ھەم ژ ئالیێ سیاسی ڤە و ھەم ژی ژئالیێ قانوونی ڤە و چو دەرگەھێن دی ژبوو ھەولێرێ نینن.
خویا کر ژی” پشتی ھاتنا چەکدارێن تیرۆرستێن داعشێ و گورانکاریێن ل دەڤەرێ و عیراقێ پەیدابووین، نەخشەیا جۆگرافی یا ھاتیە گوھۆرین دڤێ مژارێ دا، داعشێ ھەولێر و بەغدا پتر ژ ھەڤدوو دوورکرن، ھەرچەندە نیەتا بەغدا ھەمبەر ھەولێرێ یا ئەرێنی نینە و ئەڤە ژی کێشەیە، بەلێ پێدڤیە ھەولێر و بەغدا بەردەوام بن ل سەر دانوستاندنان و پێدڤیە ئەنجامەک بۆ وان دانوستاندنان ھەبیت “.
د. سەردار موسا شەریف ھێشتا ژی گۆت”ھەولێر دبریارا خوە یا سیاسی دا یا رژد نینە، ئانکو ئایا ھەولێرێ سەربەخوەیی دڤێت، یان ژی جۆرە سیستەمەکێ دی یێ سیاسی ل عیراقێ، ھەر دو پێنگاڤان پێدڤی ب ھندێ ھەیە کو رازیبوونا بەغدا ھەبیت ، ھەولێرێ دڤێت و پێدڤیە پرۆژێ خوە یێ سیاسی ل بەردەست ھەبیت، ئانکو ھەکە کار ل سەر ڤێ چەندێ بکەت کو کونفدرالی ل عیراقێ بھێتە چەسپاندن، دڤێت ھەولێر ل دەستپێکێ گەش و ھەوایێ سیاسی و ناڤخوەیی و ب تایبەت ڤی بابەتی ل گەل لایەنیێن دیێن سیاسی گفتوگو بکەت و پرۆژەکێ سیاسی پێشکێشی بەغدا بکەت، ئارمانج ژی چارەکرن و ب دووماھی ئینانا نەخوەشیێن گەلێ کوردە ل عیراقێ، ھەکە ھەرێم پێنگاڤان بەر ب سەربخوەیێ ب ھاڤێژیت ، ڤێ چەندێ ژی پێدڤی ب کارکرنێ یە کو ھەموو لایەنێن سیاسی ل ھەرێما کوردستانێ پشتەڤانیێ لێ بکەن، ھەر دو بابەت دبەرژوەندیا ھەرێما کوردستانێ دانە ل سەر ئاستێ جیھانێ”.
ڤی مامۆستایێ زانکۆیا دھۆکێ خویاکر ژی” شەڕێ داعشێ مەزنترین فاکتەرێ پالدانێ بوو کو پشتەڤانیا جیھانێ ل ھەرێما کوردستانێ و ھێزێن پێشمەرگێ کوردستانێ بھێتە کرن، ل ناڤەندێن ستراتیژی و پەرلەمانێن وەلاتێن پێشکەفتی ب تایبەت ئەورۆپا و ئەمریکا و بریتانیا ئەو پرسە ھاتیە بەحسکرن، کو ئێدی دڤێت ھەرێما کوردستانێ بگەھیتە ئارمانجێن خوە یێن سەرەکی.”
ل دۆر دانوستاندنێن بەغدا و ھەرێمێ، ناڤبری گۆت” دانوستاندێن ھەرێما کوردستانێ و بەغدا دڤێت سرۆشتێ خوە ب گوھۆریت و ببنە دانوستاندن ل سەر ئەنجامدانا گوھۆرینان د سیستەمێ سیاسی یێ عیراقێ دا بۆ کونفدرالیێ یان ژی سەربخوەیا کوردستانێ، چونکی ھەموو پێنگاڤ رێیێن باشن کو ھەرێمێ ھەبووینە بەرامبەر بەغدا، بەلێ ھەموو دبێ ئەنجام و بەرسف بوون ژلایێ بەغدا ڤە، ژبەر کو بەغدا یا رژدە ل سەر گوتارا خوە یا سیاسی و دێ بەردەوام بیت ل سەر وێ چەندێ کو پێگەھێ ھەرێمێ لاواز بکەت”.
