داخۆیانیا دەولەتا قانوونێ ل سەر چوونا پێشمەرگەی بۆ کۆبانێ
ئەڤرۆ، ئەیاد بەرواری:
ئەندامەکێ دەولەتا قانوونێ د داخوەیانیەکێ دا دیارکر ژ لایێ دستووری و قانوونی ڤە نابیت چو ھێزێن سەربازی بھێنە ھنارتن بۆ شەڕی ل وەلاتەکێ دی، لێ ژ بەر کو چەکدارێن تیرۆرستی یێن داعش مەترسینە ل سەر ھەموو جیھانێ و ل سەر عیراقێ و ھەرێما کوردستانێ ژی، یا رەوایە ھاریکاری بۆ کوردێن سووریێ دژی داعش ژ لایێ ھەرێما کوردستانێ ڤە بھێنە ھنارتن.
ئیبراھیم فەزەع ئەندامێ دەولەتا قانوونێ ب رەوا دبینیت ھێزێن پێشمەرگەی بھێنە ھنارتن بۆ کۆبانێ بۆ شەڕێ دژی تیرۆرستێن داعش و بۆ ئەڤرۆ گۆت: “ژ لایێ دستووری و قانوونی ڤە، پشکداریێ د شەڕێن دەرڤەی سنۆرێ عیراقێ دا ناکەین و قەبوول ژی ناکەین چو ھێزێن بیانی ژی بھێنە د ناڤ ئاخا عیراقێ دا بێ رازیبوونا جڤاتا نوونەرێن عیراقێ و حوکمەتا عیراقێ”.
ئیبراھیم فەزەع دیارکر کو حوکمەتا عیراقێ رازیبوویە کو ھێزێن ھەڤپەیمانیا نێڤدەولەتی ب رێیا فرۆکێن شەڕی پشکداریێ د شەڕێ دژی تیرۆرستێن داعش دا بکەت ل عیراقێ و ھەرێمێ کوردستانێ، لێ ھەتا نوکە رازیبوون نەھاتیە کرن ل دۆر ھنارتنا ھێزێن لەشکری بۆ عیراقێ.
ل دۆر پرسا ھنارتنا چەکی بۆ کوبانێ ب رێیا فرۆکێن ئەمریکی ژ فرۆکخانا ھەولێرێ، ناڤبری گۆت: “ھنارتنا چەکی بۆ کۆبانێ ب رێیا ھەولێرێ ژ لایێ ئەمریکا و وان وەلاتێن پشتەڤانیا عیراقێ و ھەرێما کوردستانێ دکەن دژی تیرۆرێ کارەکێ باشە و ئەم پێشوازیێ لێ دکەین”.
سەبارەت ئەگەرێ ھنارتنا ھێزێن پێشمەرگەی بۆ کۆبانێ و کارڤەدانا حوکمەتا بەغدا ل سەر ڤێ چەندێ، گۆت: “ئەم د ھەڤسۆزین ل گەل کوردێن سووریێ دژی تیرۆرستێن داعش، ھەر چەندە دستوورێ عیراقی رێگریێ ل ھنارتنا ھێزێن لەشکری دکەت بۆ دەرڤەی وەلاتی بێ قانوون و ھەبوونا ھندەک رازیبوون و فەرمانان، لێ یا رەوایە جۆرەکێ پشتەڤانیێ ھەبیت بۆ کوردێن سووریێ ب رێیا سنۆری ئەو ژی پشتەڤانیا چەکی و ھەتا ھنارتنا ھێزێن لەشکرێ بێ کو بھێتە ئاشکراکرن، ئانکو ب شێوەکێ نھێنی و بچن شەڕێ داعش ل دەڤەرێن کوردی ل سووریێ بکەن و ب دیتنا من داعش ل کیرێ ھەبیت، دڤێت ئەم شەڕی دژی بکەین، چونکو مەترسیە ل سەر ھەموو وەلاتێن جیھانێ، نە ب تنێ ل سەر عیراقێ و سووریێ”.
