وەزارەتا پێشمەرگە: چو بڕیار بۆ ھنارتنا پێشمەرگەی بۆ کۆبانێ نەھاتینە دەرکرن
ئەڤرۆ، ئەیاد بەرواری:
وەزارەتا پێشمەرگە ل ھەرێما کوردستانێ راگەھاند، ھەتا نوکە چو بڕیار ل دۆر ھنارتنا ھێزێن پێشمەرگەی بۆ کۆبانی نەھاتینە دەرکرن و چو ھێزێن پێشمەرگەی ژی نە ھاتینە ھنارتن بۆ کۆبانێ.
ھەلگورد حکمەت رێڤەبەرێ راگەھاندنا وەزارەتا پێشمەرگە گوت: “چو ھێزێن پێشمەرگەی نە ھاتینە ھنارتن بۆ کۆبانێ و ھەتا نوکە ژی چو بڕیارێن فەرمی بۆ ھنارتنا پێشمەرگەی بۆ کۆبانی نەھاتینە دەرکرن”.
ھەلگوردی زێدەتر گوت: “چوونا ھێزێن پێشمەرگەی بۆ کۆبانێ پێدڤی ب چەندین رێوشوینان ھەیە و یا ب ساناھی نینە”، لێ گۆتژی: “دبیت پێشمەرگە ھەر نەھێتە ھناترن بۆ کۆبانێ و ھنارتنا ھێزێن پێشمەرگەی دڤێت ل سەر داخوازا سەرکردایەتیا سیاسی یا رۆژئاڤایێ کوردستانێ بیت و پێشمەرگە ژی لایەنێ جێبەجێکارە و ھەر فەرمانەکا بۆ بھێتە دان دێ بجھئینیت”.