پترى 80% تورێن ئاڤێ ل دهۆكێ هاتینه نووكرن
ئه‌ڤرۆ، حه‌مۆ محه‌مه‌د:
رێڤه‌به‌رێ ئاڤا دهۆكێ دیار كر كو نێزیكى 20% تورێن كه‌ڤن یێن ئاڤێ ل دهۆكێ ماینه و یێن دى تورێن نوو هاتینه دانان، لێ قه‌یرانا دارایى كارتێكرن ل پلانا وان كریه و نوكه یا راوه‌ستایاى.
ئه‌ندازیار جه‌لال جه‌میل محه‌مه‌د، رێڤه‌به‌رێ ئاڤا دهۆكێ ئاشكرا ژى كر، وان پلان یا هه‌ى كو ل هه‌موو تاخێن دهۆكێ تورا نوو یا ئاڤێ بدانن، ئه‌ڤ چه‌نده پلانه و دێ یا به‌رده‌وام بیت و بۆ ئه‌ڤرۆ گۆت: “ب تنێ لایێ نزارى هه‌تا نوكه هنده‌ك پارچه یێن ماین تورا نوو یا ئاڤێ بۆ نه هاتیه دانان، دیسا گه‌ڤه‌ركێ و مالتا گوندێ كه‌ڤن ژى یێن ماین، لێ قه‌یرانا دارایى كارتێكرن ل پلانا مه‌كریه و نوكه یا راوه‌ستایاى، ئانكو نێزیكى 20% تورێن كه‌ڤن ماینه و پترى 80% مه یێن گوهۆرین”.
ده‌رباره‌ى سه‌رپێچیێن ل سه‌ر ئاڤێ دهێنه و كرن و دانانا پیڤه‌رێن ئاڤێ ژى ئه‌ندازیار جه‌لال جه‌میل گۆت: “دانانا پێڤه‌رێن ئاڤێ باشترین رێیه بۆ كۆنترولكرنا سه‌رپێچیێن ل سه‌ر ئاڤێ دهێنه كرن، چونكو پیڤه‌ر دێ رێژا وێ ئاڤێ دیاركه‌ت یا بۆ هه‌ر ماله‌كێ دچیت، ڤیجا وه‌لاتى د چدا ب مه‌زیخیت ل سه‌ر حسێبه”.
خویا ژى كر، به‌رنامێ وان یێ به‌رده‌وامه و ل هه‌موو تاخێن دهۆكێ پێڤه‌ر دێ هینه دانان.
ئاماژه ب وێ چه‌ندێ ژى كر، د نوكه دا ل سه‌ر ڤان هه‌موو قه‌یرانێن هه‌ین، ئه‌و رۆژانه پترى 300 ليترێن ئاڤێ بۆ وه‌لاتیان دابین دكه‌ن.
