پشتى 90 سالان ژ راگه‌هاندنا ده‌وله‌تا عيراقێ هێشتا كورد يێ دهێنه خاپاندن
ئه‌ڤرۆ نيوز، ناجی به‌ده‌ل:
ئه‌ڤرۆ 25\10\2014 ێ 90 سال ل سه‌ر دامه‌زراندنا حوكمه‌تا عيراقێ دا ده‌رباز دبن و بسپۆره‌كێ وارێ ديرۆكێ ژى دبيينت كو پشتى ڤى ماوه‌ى هه‌موويێ كورد هه‌ر يێ دهێنه خاپاندن.
د.حه‌كيم عه‌بدولره‌حمان زبێر بسپور د بیاڤێ دیرۆكێ دا ل زانكۆیا دهۆك بۆ ئه‌ڤرۆ نیوز دياركر كو ئه‌ڤه 90 ساله كورد قوربانيان دده‌ن ژ ئه‌گه‌رێ نيه‌ت پاقژيا وان ل گه‌ل حوكمه‌تێن ئێكێ ل دووڤ ئێكێ يێن عيراقێ به‌رامبه‌ر وان سۆزێن پێ هاتينه داين.
د. حه‌كيم گۆت: “هه‌ر ده‌م كوردان مافێ خوه ب چه‌كێ زۆريێ ب ده‌ست ڤه ئينايه و دانوستاندنێ چو پێڤه نه‌هاتيه، لايه‌نێ سياسى نه‌شياينه وان هه‌موو سيناريۆيێن بۆ وان هاتينه دانان بخوينن ژ ئه‌گه‌رێ نه‌ئێكرێزيا وان و په‌رت و به‌لاڤيا وان و هه‌بووينه به‌رژه‌وه‌نديێن خوه ل گه‌ل حوكمه‌تێن عيراقێ تێكنه‌داينه”.
گۆتژى: “چو ب رێيا رێكه‌فتناما سايكس بيكۆ يان هه‌ر ئێكا دى بيت به‌رده‌وام كورد هاتينه لاوازكرن و بن پێ كرن”، خۆيا ژى كر كو ژ سالا 1920 هه‌تا نوكه كورد يێن بووينه قوربانا سياسه‌ت و به‌رژه‌وه‌نديێن لايه‌نێن نه زه‌لال كو چه‌ندين جاران سۆز ب كوردان هاتبوونه دان و چ ژ وان ژى بجهـ نه‌هاتن”.
بسپۆرێ ديرۆكێ ل زانكۆيا دهۆك ئاماژه ب وێ چه‌ندێ ژى كر كو هه‌ر جاره‌كا عه‌ره‌ب ل عيراقێ لاواز ببن دانبپێدان ب مافێن كوردان كريه و هه‌ر ده‌ما ب هێز كه‌فت بن، جاره‌كا دى لێ هه‌ڤدژ راوه‌ستياينه و گۆت: “پێدڤيه مفا ژ وان خه‌له‌تيان بهێته وه‌رگرتن و شاشى و خه‌له‌تى نه‌هێنه دووباره كرن”.