سیستهمێ پهروهردا ههرێمێ و زهنگا مهترسیێ، كی بهرپرسه ؟؟؟ا
پشتی خزمهتا( 38) سالان د وارێ پهروهردێ دا وهك مامۆستا و رێڤهبهر و سهرپهرشت بۆ ماوێ (11)سالان وگهریان وسهرپهرشتیا قوتابخانان و دیتنا رۆلێ سهرپهرشتی د بلندكرنا ئاستێ زانستێ دا و رێژا سهركهفتنێ و دهركرنا چهندین راپۆرت و نامیلكه ل دۆر چاوانیا گۆتنا زمانێ كوردی ل قوتابخانێن بنهرهتی و بههڤكاری دگهل مامۆستایێن دلسۆزێن كارێ خوه كو ئهون فهرماندێن گۆرهپانا پهروهردێ و ئاڤاكرنا نفشهكی دلسۆز، هشیار و كوردپهروهر و تا رادهكێ باش شوونپهنجێن سهرپهرشتیاران ل سهر ئاستێ قوتابییان و دهواما مامۆستایان و رێڤهبهران یێ دیاربوو و كردارا پهروهردێ سهرهرای چهندین كێماسی بباشی برێڤه دچوو؛ بهلێ پشتی ڤان رێنما و بریارێن كونگرێ پهروهردێ و چهوساندنا رۆلێ سهرپهرشتیاران و سنورداركرنا سهرهدانێن وان ب بههانا كو یا بێ مفایه و خهلهكێن زێدهنه و قهیرانا دارایی بسهردا هات. مخابن زهنگهكا مهزن و مهترسیدار و كاڤلكهر و بهرهلایێ پهیداكر ل سهر ئاستێ زانستێ و دهوام بهرهف بهرهلایێ چوو دگهل رێزێن مه بۆ هندهكێن پێگیر و دلسۆز و سهرهدان كرنه بتنێ (12)رۆژ ل ههیڤێ و شوونا سێ سهرهدانێن سالانه كرنه دوو سهرهدان و ل ههموو جیهانێ رێنما دجێگیرن و ههر چار پێنج سالا جارهكێ دئێنه گوهۆڕین لێ كوردستانا مه یا دهلال سالێ دوو سێ جاران رێنما دئێنه گوهۆڕین و ئالۆزیهكا مهزن پهیدا دكهت د پرۆسیسێ پهروهردێ دا و ههر قوتابی قوربانیه و مخابن ئهوژی قوربانیهكا بێ بهرهڤانیه. پشتی چهند سالێن بێن دێ لهشكهرهكێ نهخوێندهوار ئێته گۆرهپانانێ و مهتریسه لسهر ئاسایشا نهتهوهیی و چ كار پێ نائێتهكرن و كهس خوه لهوان ناكهتن خودان و سهمیانێن وان و مامۆستا و رێڤهبهر ههولوێستی وهرناگرن یان هندهكا ژ وان نهخهما وانه وبلا قوتابخانێن تایبهت یێن كورێن بهرپرسان و زهنگینان ئاستێ باش بینن و یێن فهقیر وههژارن ببن كورێن كۆلانا و خولامێن خودان باوهرنامێن تایبهت ؟؟؟ نهخاسمه قوتابخانێن شوێفات. . وئهمریكی . . وبریتانی.. وتركی (ئشق)یێن فتح الله گولهن كو ههموو ههستێ نهتهوایهتی و نشتمانی ل دهف قوتابییان دسڕن و ناهێلن و بۆ بهرژهوهندا مللهتێن خوه قوتابییان ئاڤادكهن و جهێ داخێ كو ههموو لایهك یێ بێ دهنگه بهرامبهر ڤێ مهترسیا كوژهك؟؟؟ مخابن بێ ههلوێستیهكا مهترسیدار ژ لایێ مامۆستا و رێڤهبهر و سهرپهرشتان و رێڤهبهرێن لقێن پهروهردێن ناوچان نههاتیه دیاركرن و ئهو باش دزانن ئهڤ تێكڤهدان و گوهۆڕینێن سیستهم و رێنما و شێوازێن پهروهردێ و سهرپهرشتیێ چهند مهترسیه ل سهر ئاستێ زانستی و رێژا سهركهفتنێ لێ ههكه دهنگ و ههلوێست ههبن ژی وادیاره دهنگێ وان ناگههیت یان ههكه بگههیت كهس گوهداریا وان ناكهت و وهكی خونرژینهكا بهردهوام مهترسیێ پهیدادكهت و ههر وهلات و مللهت و سهركردێن پیاشهرۆژێ قوربانینه؟؟ سهرهرای ههبوونا سهرپهرشتان بهری نوكه لێ مخابن قوتابی ههنه ل پۆلا دوازدێ نزانن دوو رێزان بدروستی بنڤیسن یا دارشتنهكێ یان نامهكێ بنڤیسن ؟؟ گهلۆ پشتی ڤان گوهۆڕینان دێ زانن بباشی بتنێ ناڤێ خوه بنڤیسن؟؟؟ بدیتنا مه ئهڤ گوهۆڕینه ژ ئهنجامێ نهبوونا كهسێن بسپۆر و دلسۆز و وهلاتپارێز ل جهێ بریارێ؟؟ ههر راوێژكارێ ژدهرڤهی وهلاتی هات و بههر رێكهكا ههبیت خوه گههانده وهزیری و هندهك رێنما ژ سوید یان بریتانیا ئانین دێ ل سهر قوتابخانێن مه تاقیكهت و قوتابیێن مه دبیته قوربانی وبارو دۆخێن مه رهچاڤناكهت و یا گرنگ ل دهف وی ئهوه كو تشتهك گوهۆڕی و جهێ خوه خوهشكر و كی قوربانی بیت نهخهما وی یه؟؟!! لهوما دێ دهرچوون ب واستا بیت و بێ ئاست و ههموو پرۆسێ پهروهردێ دێ ههرهمهكی برێڤهچیت؟ ههموو كهس دزانن كو قوتابی بهرێ بنیاتا ئاڤاكرنا جڤاكیه و سهركرده و فهرماندێ پاشهرۆژێ یه، ههكه بدروستی نه ئێته پهروهردهكرن و فێكرن دبیته مهترسیهكا مهزن ل سهر ئاسایشا نهتهوهیی و ڤارێ دبن ژ رێكێن راست ود بنه كورێن كۆلانا؟ بهلكی دێ ب ئاسانی ئێنه خاپاندن و سهردا برن وخوه فرۆتن؟؟ مخابن ل كونفرانسێ پهروهردهی ل دهۆكێ كو ئهز ژ لایێ پهروهردا شێخان ڤه هاتبووم راسپاردن، پشكداریێ د تهوهرێ سهرپهرشتیاریێ دا بكهم، مهگهلهك داكوَكی لرۆلێ سهرپهرشتان و گهریانێن وان كر لێ ههرا ژخوهبوو. ئهو مامۆستایێن ژ ههولێرێ هاتین ئێك خال ژبۆچونێن مه نهنڤیسین بۆ پهسهندكرنێ و كار پێكرنێ و ههر مانه ل سهر وان بۆچوونێن وان ل ههولێرێ پهسهندكرین و ئێك ژوان خالان مه گۆتێ باشه ههكه ل سالێ سێ سهرهدان بوون و ههموو رۆژێن ههیڤێ سهرپهرشت سهرهدانا دكرن ورێژا سهركهفتنێ ژ 25%نه دبۆری لێ ههكه ببن دوو سهرهدان وبتنێ بۆ( 12) رۆژان سهرپهرشت سهرهدانا بكهت دێ چاوا بیت رێژا سهركهفتنێ ؟؟؟ههڤالهكی سهرپهرشت كو ل جهێ بریارێ یه گۆت دێ رێژه بیته100% ئهڤه بدیتنا من گونهههكا مهزنه مرۆڤ خوه بخاپینیت و راستیێ نهبێژیت؟؟ ههزار مخابن یاری ب ههست و چارهنڤیس و پاشهرۆژا قوتابیین مه بهێته كرن بۆ رازیكرنا سهیدایهكی یان بهرپرسهكی جهێ بریارێ ههر چهنده ئهو دوو سهرهدانه ژی نهمان ؟؟ دێ بۆ خوهندهڤانێ هێژا یێ دووری سیستهمێ پهروهردێ دیاركهین رۆلێ سهرپهرشتێ پهروهردێ و ئهركێ وی دبلنكرنا ئاستێ زانستێ و رێژا سهركهفتنێ دا. ههلبهت قوتابخانه دئێنه بهلاڤكرن ل سهر سهرپهرشتێن بسپۆر وئهو سهرهدانا وان دكهن ل ددووڤ بهرنامهكێ دیاركری بۆ ههردوو وهرزێن سالا خواندنێ و دهمێ سهرپهرشت دچنه قوتابخانێ گهریانهكێ ل ههموو ئاڤاهی دكهت و بهرێ خوه ددهته ههر تشتهكی و رێنما و راسپاردان ددهته رێڤهبهری پشتی هنگی سهرهدانا مامۆستایێ بسپۆریا خوه دكهت دپۆلێدا. سهرهدانا ئێكێ بۆ دیتنا ئاستێ قوتابییانه ودانا راسپاردان بۆ چاوانیا دانانا پلانا سالانه و رۆژانه یا مامۆستای و چهندێن شیرهت و ئامۆژگاریان ددهته رێڤهبهر و مامۆستایان وقوتابیبان و وان راسپاردان د تۆمارا سهرهدانان دا دنڤیسیت ژبۆ دیتنا چاوانیا پهیرهكرنا وان راسپاردان د سهرهدانا دووێ دا كو سهرهدانا دووڤچۆنێ یه و پرسیار ژ قوتابییان دئێنه كرن كا چهند مامۆستای بابهت گههاندیه قوتابییان. ههكه بهرسڤ دباشبن دهستخوهشی ل مامۆستای دهێتهكرن و ههكه قوتابییان بهرسفا پرسیارن نهزانین سهرپهرشت هندهك شرۆڤه ورۆنكرنا ددهته قوتابییان برێكێن ئاسان داكو مامۆستا بزانیت چاوا بابهتی شرۆڤهبكهت بۆ قوتابییان و پاشی دێ سهرپهرشت دیتن و راسپاردێن خوه بێژیته مامۆستایێ بابهتی و دتۆمارا سهرادانا دا نڤیسیت ژبۆ مفا وهرگرتنێ ژلایێ مامۆستایێ بابهتی ڤه. سهرهدانا سیێ بۆ ههلسهنگاندنا رێكێن گۆتنا بابهتان و ئاستێ قوتابییان و دیتنا پلانان كانێ ل دووڤ بهرنامهیه و بابهت دێ بداوی هێن یا نه ؟؟ دێ سهرپهرشت د پۆلێ دا رونیت و بهرێ خوه دهته مامۆستای كانێ دێ چاوا بابهتهكی شرۆڤهكهت بۆ قوتابییان و رێكێن وی دچاوانه ورهفتار وراسپاردێن مامۆستای ل چ ئاستن و ل سهر وان بنهمایان دێ مامۆستا ئێته ههلسهنگاندن و ههكه ههر هات مامۆستای دروست بكار نهئینابن و ئاستی قوتابیان نهیێ باش بیت دێ پێشنیاركهت ئهو مامۆستا خولهكا شیاندنێ ببینیت ژبۆ بلنكرنا ئاستێ وی و ههكه هات ههر بێ مفا بوَ دێ سهرپهرشت پێشنیار كهت ئهو مامۆستا بێته دووركرن ژكارێ وانه گۆتنێ و ببیته فهرمانبهر ل دیوانا پهروهردێ. دهمێ ئهز سهرپهرشتیارێ زمانێ كوردی ژبلی شرۆڤهكرن و راسپاردان و نڤیسینا رێنمایان ل تۆمارا سهرهدانان من ئهو رێنمایێن گوتنا ههموو لقێن زمانێ كوردی (وهكی خواندن –نڤیسین-رێنڤیس-راهێنان-خۆشنڤیس-دارشتن-رێزمان – و هۆنراو –)چاپ دكرن و ههر مامۆستایهكی وێنهك ژێ ددایێ بۆ مفا وهرگرتنێ وپشتی ئهز هاتیمه خانه نشینكرن من ئهو رێنما كرنه نامیلكه و ل سهر قوتابخانان بهلاڤكرن داكو مفای ژێ ببینن و بدان پێدانا زۆربهی مامۆستایێن دلسۆز یێن زمانێ كوردی كو ههكه 50%ژوان رێنما بێنه پهیرهكرن دێ رێژا سهركهفتنێ گههیته 90% نهخاسمه زمانێ كوردی بنیاتێ فێربوونا قوتابییانه ژبهر كو ههموو بابهت بكوردینه. ڤێجا ئهو ههموو سهرهدان و رێنما وراسپارده ههكه نهمینن دێ چ پرۆسێ فێربونێ برێڤه چیت؟ مه رێز ههیه بۆ ههموو مامۆستا و رێڤهبهرێن دلسۆزێن كارێ خوه لێ ههكه سهرهدان و دووڤچوون و ههلسهنگاندن و راسپارده نهبن وهك پێدڤی دهوام نائێته كرن. ئهز باوهر دكهم دێ بهرهلایی و نهپێگیری و ههرهمهكی كهڤیته پرۆسسێ پهروهردێ و نفشهكی نهخوێندوهار، بێ ههلوێست، لهرزۆك و نهزان ئێته بهرههم ئانین و گونهها قوتابییان و سهمیانێن وان و جڤاكی ل ستۆێ خودان بریار و دهسههلات د وارێ پهروهردێ دابیت لێ مخابن ئهز باوهرناكهم ئهوان دهم ههبیت ڤێ گوتارێ بخونن یان ههكه بخونن دێ خوه بێ دهنگ بكهن وئهڤه گونهههكا دی یا مهزنتره و خودێ هاریكارێ قوتابیان و سهمیانێن وانبیت ؟؟
