جێگرێ لقا 17 ل چیایێ شنگال: ره‌وشا وه‌لاتیێن چیایێ شنگالێ به‌رب خرابیێ دچیت
ئه‌ڤرۆ نیوز: له‌زگین جۆقى:
جێگرێ لقا 17 پارتى دیموكراتى كوردستان ل چیایێ شنگالێ بۆ ئه‌ڤرۆ نیوز دیاركر،كو زێده‌تر ژ هزار خیزانان ماینه ل چیایێ شنگالێ و رۆژ دووڤ رۆژى ره‌وشا وان به‌رب خرابیێ ڤه دچیت، و گه‌له‌ك پێدڤى خارنێ و ئاڤێ هه‌نه و فرۆكه ژى وه‌كو پێدڤى خزمه‌تا خه‌لكێ مایه ئاسێ دچیایى دا ناكه‌ن.
قاسم ره‌شو جێگرێ لقا 17 پارتى دیموكراتى كوردستان ل چیایێ شنگالێ بۆ ئه‌ڤرۆ نیوز گۆت: نه دووره وه‌لاتیێن ماینه ئاسێ ل چیایێ شنگالێ تووشى كاره‌ساته‌كا مه‌زن ببن، ژبه‌ر نه‌بوونا خۆارنێ و ڤه‌خۆارنێ و پێدڤیان وه‌كو خیڤه‌تان وكه‌ره‌ستین زڤستانێ وداخوازێ دكه‌ن رێكه‌ك بهێته ڤه‌كرن بۆ گه‌هاندنا هاریكاریا بۆ خه‌لكێ مایه چیایێ شنگالێ وئێدى ب هیڤیا هه‌ردو فرۆكان ڤه نه‌مینن، چونكو هه‌ر ده‌ه رۆژان جاره‌كى یان دو جاران فرۆكه دهێن هه‌كه‌ر باران بیت یان سه‌قا نه‌یێ خۆش بیت فرۆكه نه‌شین بهێن.
